Layihə
Stadionları necə doldurmaq olardı? – LAYİHƏ
17 yaşlılar arasında Avropa çempionatının final mərhələ…
17 yaşlılar arasında Avropa çempionatının final mərhələsi ölkə futbol ictimaiyyətinin gözünü fərqli prizmadan da açdı. Futbolsevərlər tribunaları doldurmamaqla, bu idman növünə məsul şəxslərə mesaj göndərdilər: “sizin bu cür futbolunuz bizə lazım deyil”.
Nəinki digər millilərin oyunu, heç Azərbaycan formasını geyinən beynəlmiləl yığmanın qarşılaşmalarında da tribunalar “ala-bula” rənglərə bürünür. Pulsuz bilet paylamaq, məktəblilərə bel bağlamaq, şəxsi mülkiyyətlərinə çevirdikləri müəssisələrdən əməkdaşları işdən qovmaq qorxusu ilə tribunalara daşımağın cavabı göz önündədi.
İndi kimlərsə Avropa çempionatının final qarşılaşmasının stadionunun dəyişdirilməsinə “Olimpiya stadionu çökür”, “Stadionun ətrafındakı bədbəxt hadisəyə görədi” başlıqları ilə öz aləmlərində gündəmi zəbt edirlər. Əslində, onları başa düşmək çətin deyil. Stadionlara gedən, gecəsini-gündüzünə qatan 2-3 media orqanının araşdırdığı informasiya ətrafında rəqs etməkdən başqa çarələri yoxdu. Axı, işləməlisən ki, ortaya nəsə çıxarasan. Axı, işləməyi bacarmalısan ki, hansısa reytinqə sahib olasan. Bu olmadıqdan sonra yeganə çarə divardan səs çıxarmaq qalır. Bu, “nəzəriyyəçilər”in payı. Qayıdaq azarkeşlərin yanına.
Fanat hansı gününə futbola gəlsin? İşsizlik baş alıb gedir, maaş alanlarsa 12-14 saat işləyirlər. Kimin yadına futbol düşür? Varlılarsa fanat deyil, onlar ən yaxşı halda stadiona kiminsə gözünə görünmək üçün gələr. Yaranmış vəziyyətdə futbolsevərlərdən qarışıq dolmanı xatırladan yığmaya dəstək olmadıqları üçün incimək yersizdi. Bu vəziyyətə gətirib çatdıran nə futbolinfo.az-dı, nə də 1-2 manat tapa bilməyən sıravi azarkeşlər.
Deməli, tamaşaçıların tribunaya qaytarılması barədə məhz səltənətə sahib olan yoldaşlar düşünməlidi. Ancaq nəzərə alsaq ki, onların maraq dairəsinə yalnız “qaz vurub, qazan doldurmaq” daxildi, bu missiyanı üzərimizə götürüb “Avropa çempionatında tribunaları necə doldurmaq olardı”, sualına aydınlıq gətirək.
1. Ölkə mətbuatının monitorinqini aparmaq və ən nüfuzlu çap və elektron KİV-lərlə mart, aprel və may aylarını əhatə edən 3 aylıq reklam əməkdaşlığı müqaviləsi imzalamaq (daha AÇ-ni işıqlandırmağa dair gülünc layihə ideyası yox ha!)
Bu müddət ərzində elektron KİV-lər təbliğat xarakterli çoxsaylı videosorğular keçirir, qaliblərə 17 yaşlılardan ibarət yığma üzvlərinin imzasıyla müxtəlif atributlar hədiyyə edir, habelə yığmamızın oyunlarına biletləri təqdim edərdi. Qəzetdə isə oxucular arsında mini-müsabiqələr keçirməklə həmin mükafatları təqdim etmək olardı.
Bununla yanaşı, KİV-lər ölkəmizdə fəaliyyət göstərən fanat qrupları ilə görüşlər keçirib, stadiona gəlişlərini təmin edən təbliğat kampaniyasını da üzərinə götürə bilərdi.
2. Oyunlarda uduşlu lotereya keçirmək tamaşaçı sayının artmasına təkan verərdi.
Bu bənddə hansısa avtomobili uduşa çıxarmaq kimi absurd ideyanı nəzərdə tutmuruq. Çünki “qara camaat” belə nağıllara çoxdan inanmır. Ancaq DVD, musiqi mərkəzləri, fotoaparat, kiçik videokameraları uduşa qoymaqla minlərlə insanı tribunalara gətirmək mümkün olardı. Bütün bu məlumatları da əməkdaşlıq edilən nüfuzlu KİV-lərdə təbliğ etmək gərək idi.
3. Yığmanın baş məşqçisi, yığma üzvləri və Allah bilsin, neçə yüz min ödəyərək, əməkdaşlığa cəlb olunan Röya Ayxanın iştirakıyla ali təhsil ocaqlarında görüşlər keçirmək və həvəsləndirici müsabiqələri təşkil etmək mümkün idi. Əlbəttə ki, bu kampaniyanı da ölkənin aparıcı KİV-lərində təbliğini təşkil etmək şərti ilə.
İndi də sərt, bəzən kəskin suallardan avropasayağı təbəssümlə yayınmağa ehtiyac qalmazdı. Deyilmi, hörmətli AFFA-nın baş katibi?
CEYHUN ƏLİYEV
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Premyer-liqa2024-04-12 20:56
“Sumqayıt”la “Zirə”dən heç-heçə