Andorranın tarixinə düşən millimiz və Prosineçkinin yubileyi

Avstriyada təlim-məşq toplanışında olan millimiz dünən ilk yoxlama matçında Andorra ilə bərabərə qaldı – 0:0. Futbolinfo.az xəbər verir ki, 2016-cı ildə 2-ci matçına çıxan komandamız hələ ki, qol hesabını aça bilməyib. 

Sonuncu dəfə belə uğursuzluq 2005-ci ildə yaşanmışdı. Həmin vaxt Karlos Alberto Torresin rəhbərlik etdiyi komandamız Tirnidad və Tobaqoya qarşı keçirdiyi 2 qarşılaşmanı quru hesabla məğlub olmuşdu. 

Maraqlıdı ki, bu, yığmamızın cırtdan ölkənin komandasına qarşı 5-ci oyunumuzda 4-cü qolsuz bərabərliyidi. Millimiz yalnız 1 matçda – 2008-ci ildə səfərdə bu rəqibi üstələyə bilib – 2:1. Bu, millimimizin 1 rəqibi ilə keçirdiyi oyunlarda 4-cü dəfə eyni hesabın qeydə alınması baxımından ilkdi. Hər dəfə yığmamızın baş məşqçiləri "yoxlama matçında nəticə önəmli deyil" deyib, bu həvəskarlardan ibarət yığmanın qapısına yol tapa bilmir. Yəqin ki, Andorra üçün Azərbaycan tarixinin ən uğurlu rəqibidi. Çünki sözügedən ölkə yığmasının tarixi ərzində bu qədər oyun keçirib, ən çox məğlub olmadığı rəqib məhz Azərbaycandı.   

Dünənki qarşılaşma Prosineçkinin millimizin baş məşqçisi kimi yubiley – 10-cu matçı oldu. Bu qarşılaşmalarda komandamız 2 qələbə qazanıbsa, 4 görüşdə bərabərlik qeydə alınıb. Qalan oyunlarda isə rəqiblər üstün olub. Vurulan 8 qolun qarşılığında, qapıçılarımız 13 dəfə topu tordan çıxarıb.