Müsahibə
Diniyevin avrokubok debütü: “Büdcəmiz hansısa bir futbolçunun qiymətinə bərabərdi”
Dünən “Kəpəz” Avropa Liqasında debüt mat&cce…
Dünən “Kəpəz” Avropa Liqasında debüt matçı öncəsi, hər hissəsi yarım saat olmaqla, son yoxlama görüşünə çıxdı. Birinci divizion təmsilçisi “Bakı”yla oyunun nəticəsi nə Şahin Diniyev, nə də media üçün heç bir əhəmiyyət kəsb edirdi. Başlıca məqsəd təmsilçimizin Moldova “Daçiya”sı ilə oyunöncəsi son durumunu görmək idi.
Oyunun saat 18:00-da başlaması futbolçular üçün zülm oldu. Görünür devalvasiya və iqtisadi böhran hətta projektorları yandırmamaqla, büdcəyə qənaətə təkan vermişdi. “Bakı”nın durumu hər kəsə bəllidi, “Kəpəz”in isə Gəncə şəhər rəhbərliyi tərəfindən dəstək görmədiyi və yalnız AFFA-nın ümidinə qaldığı da hər kəsə məlumdu…
Gəncəlilərin sıralarında xüsusi diqqət yetirdiyimiz oyunçular yeni braziliyalıları idi – Serjo Manuel Kosta Karneyro (Serjinyo) və Renan da Silva Alves (Renan). Mərkəz müdafiəçisi mövqeyində oynayan Renanın üzərinə ciddi iş düşmədi. Birinci divizion təmsilçisi ilə oyunda onun bacarığına real qiymət vermək mümkün deyil. Amma fiziki göstəriciləri ilə istənilən hücumçunun “gözünün odunu almaq” iqtidarındadı. Gövdəsi ilə oynamaq bacarığı da ən yüksək səviyyədədi.
Serjinyo isə meydanı görmək bacarığı ilə sevindirdi. O, 30-40 metrlik məsafəyə zərgər dəqiqliyi ilə ötürmə verməyə qadirdi. Yetər ki, komanda yoldaşı boş zonaya şığısın.
Ötən mövsümün ilk yarısında haqqında ən yaxşı sözlər dediyimiz, lakin zədələnərək, sıradan çıxan Dario Federiko isə hələ ki, formada deyil. Ağır, ləng, əvvəlki oyunundan əsər-əlamət yoxdu. Ancaq bir il əvvəl də Darionu məhz bu cür görmüşdük. “Kəpəz”in ADBTİA-nın stadionundakı məşqini izləməyə getmişdik. Məşq ikitərəfli oyunla bitmişdi və Şahin Diniyevlə dialoq zamanı “bu qarabaladan gözüm su içmir”, demişdim. Diniyev isə “o, 2-3 həftədən sonra komandamızın liderinə çevriləcək. İkitərəfli oyunda həvəslə oynaya bilmir”, cavabını vermişdi. Zaman təcrübəli mütəxəssisin sözlərini təsdiqlədi. Ümid edək ki, Dario bu dəfə də yoxlama görüşü olduğu üçün həvəssiz idi və “Daçiya” ilə görüşdə özünü ən yaxşı tərəfdən göstərə biləcək.
Matç başa çatdıqdan sonra isə Diniyev oyunu izləməyə gələn jurnalistlərin əhatəsinə düşdü.
– Komandanın səfərdən yeni qayıtdığını, yorğunluq olduğunu nəzərə alsaq, futbolçulardan nə dərəcədə razı qaldınız?
– İki cəhətdən pis vəziyyətdəyik. Birinci, oyun praktikamızın olmamağı çox böyük problemdi. Birdən-birə 5 əsas heyət oyunçusunun yerinə yenilər gəlir və onları sistemə "otuzdurmaq" üçün vaxt lazımdı. Vaxt az olanda da səhvlər qaçılmaz olur. Buna görə səhvləri minimuma endirməyə çalışırıq. İkincisi də adaptasiya ilə bağlıdır. Bu, elmi cəhətdən də sübut olunub ki, 7-10 gündən sonra qaydasına düşür. Dəniz səviyyəsindən 2800 metr yüksəklikdən aşağı düşəndən sonra orqanizmdə dəyişikliklər baş verir və bu da qəbul etməlidi. Bunun üçün futbolçular daha çox havada olmalıdı, nəinki kondisionerli otaqda. Üstəlik, oyunun 2 gün əvvələ çəkilməsi bizi çox çətin vəziyyətə salıb. Ancaq sadaladıqlarımı bəhanə kimi qəbul etməyin. Nə olursa-olsun, iyunun 28-də səhvlər olmamalıdı. "Daçiya" ilə matçda səhvlərin olması gözləniləndi. Ancaq mən bu komandaya çox inanıram. Keçən il başlayanda bundan da pis vəziyyətdə idik. Ancaq bu gün oyunçu da var, keyfiyyət də. Ən çox məni sevindirən rəqabətin olmasıdı. Ehtiyat oyunçular skamyamızda yaxşı futbolçular var ki, meydana çıxıb oyunun taleyini həll edə birlələr. Səhvlərin düzəldiməsi üçün oyun epizodları üzərində xüsusi çalışmağa, hücumda və müdafiədə etibarlılığa diqqət yetirməyə çalışacağıq.
– Rəqibi necə dəyərləndirərdiniz?
– Bizi çətin rəqib gözləyir. Bu, onlardan qorxduğumuz anlamına gəlmir. "Daçiya" doğrudan da güclü rəqibdi. Moldova çempionatında “Şerif”ə qarşı "qızıl oyun"larına baxmışam. “Daçiya”nın oyunu məni yaxşı mənada təəccübləndirdi. Komandanın iddialı olması, qrup mərhələsinə düşməsi gücündən xəbər verir. "Daçiya"nın iddiası barədə eşitmişdim. Sadəcə, oyununa baxandan sonra o gücə malik olduğunu gördüm. Ancaq biz əlimizi qaldırıb təslim olmayacağıq. "Kəpəz", Gəncə adından başqa Azərbaycanı layiqincə təmsil etməyə çalıaşacağıq.
– Komandada problemlərin olduğunu nəzərə alsaq, inam nədən irəli gəlir?
– Bəli, qələbə qazandığımız 6:0 hesabı yaxşı nəticədi. Ancaq hesab məni maraqlandırmırdı. Xətlər arasında əlaqə bu gün yaxşı vəziyyətdədi. Əsas inamım ondan irəli gəlir ki, futbolçular çətinliklərə sinə gərə bilirlər və bu, çox vacibdir. Burda xarakterdən söhbət gedir və yoxlama oyunu da mənim üçün çox vacib idi. Bu matçda buraxdığımız səhvləri 4 günə düzəltməliyik. Doğrudu, ideal vəziyyətə gətirib çıxara bilməyəcəyik. Ancaq çalışacağıq ki, minimuma endirək. Futbolçuların xarakterinə, ustalığına inamım var.
– Futbolçularınızdan yalnz litvalı qapıçı Tadas Simaitisin avrokubok təcrübəsi var. Bu, sizə çətinlik yaratmır ki?
– Onlarla bərabər elə baş məşqçinin də avrokubok təcrübəsi yoxdu. Bunu həyata keçirmək bizim üçün böyük bir sevincdi. Bu gün pafoslu sözlər danışaq ki, 2 mərhələ keçəcəyik, qrupa yaıxnlaşacağıq, bu, real görünmür. Proqnoz vermək qeyri-mümkündü. Çalıçacağıq ki, yaxşı futbol oynayaq, kiminsə qarşısında aciz olmayaq. Demirəm ki, biz uduzmağa gedirik. Ayın 28-də yeni, sürətli bir komanda görəcəksiniz. Bizim qarşımıza məqsəd Avropaya düşmək idisə, indi bundan da yaxşı nəticəyə nail olmaq istəyirik. Necə deyərlər, “iştah diş altındadı”. Ancaq istəyimizə nə dərəcədə nail olacağımızı zaman göstərəcək. Bizdə hər şey ideal deyil. Şəraitə uyğun addım atdıq. Futbolçularımızın qiyməti o dərəcədə böyük deyil. Büdcəmiz bəlkə də hansısa bir futbolçunun qiymətinə bərabərdi. Minimum imkanla, maksimum yaratmağa çalışan bir komandayıq.
– "Daçiya" mövsüm ərzində cəmi 12 qol buraxıb ki, bu da müdafiəsinin çox güclü olduğunu göstərir. Hesab etmirsiniz ki, sürətli futbol mənfi nəticəyə gətirib çıxara bilər?
– Hücumda sürətli futbol göstərməyə, kompakt şəkildə oynamağa çalışacağıq. Mənim müsahibəm artıq Moldova mətbuatında gedib. Necə oynacağımızı demək istəmirəm. Məqsədimiz müdafiədə etibarlı, hücumda sürtətli oynamaqdı.
– Rəqib hansı amillərdə "Kəpəz"i üstələyir?
– Ən başlıcası oyunçu seçimində. Heyətində xeyli legioner var və futbolçularının hamısı mübariz keyfiyyətlərə malikdi. "Şerif"lə oyunda meydanın hər qarışı uğrunda mübarizə aparırlar və sürətli oynayırlar. Müdafiədə çox etibarlıdılar, təcrübəli futbolçuları var. Biz ehtiyatlı olmalıyıq. Kapitanları müdafiənin dayağıdır. Əsas məqsəd evdə qol buraxmamaqdır. Məncə, səfərdə qol vurmaq gücündəyik. Bizdə belə oyunçular var.
– Bəs "Kəpəz" rəqibi nədə üstələyir?
– Yumruq kimi birləşib, komanda şəklində meydanın hər qarışı uğrunda mübarizə aparmaqda.
– Bakıda 0:0 hesabı sizi qane edəcək?
– Oyunun taleyi yüz faiz Kişinyovda həll olunacaq.
– Azarkeş amili "Kəpəz"in xeyrinə ola bilərmi? "Daçiya" ilə Bakıdakı matça 5-6 min azarkeşin gəlməsi gözlənilir…
– "Kəpəz" azarkeşləri möhtəşəm olduqlarını ötən mövsüm göstərdilər. Onlar həmişə arxamızda durublar. "Qəbələ" ilə matçda azarkeşlər iki gün yollarda qaldılar. İnanıram ki, yenə stadionu dolduracaqlar. Onlar bizə dəstək olaraq "12-ci oyunçu" funksiyasını yerinə yetirəcəklər. Onlara ehtiyacımız var. Azarkeşlərimiz indiyədək "Kəpəz"i tək buraxmayıblar. İnanıram ki, Avropa Liqasında da belə olacaq.
CEYHUN ƏLİYEV