Ölkə futbolu
Şeydayev nədən ehtiyat edir?
Ramil Şeydayev Rusiyada aləmi bir-birinə qatıb, hamı ondan danı?…
Ramil Şeydayev Rusiyada aləmi bir-birinə qatıb, hamı ondan danışır. Rusiyanın gənclərdən ibarət milli komandasında çıxış edən soydaşımızın vətəndaşlığını dəyişmək məsələsi əsas müzakirə mövzusuna çevrilib. Əksəriyyət belə bir futbolçunu əldən buraxmağın böyük səhv olduğunu düşünür.
Məsələn, bir neçə il öncə Azərbaycanı deyil, Rusiya millisini seçməsi üçün Aleksandr Səmədovu dilə tutan və onu inandırmağı bacaran Nikita Simonyan, indi Şeydayevi əldən buraxdıqlar üçün üzgündü. Rusiya Futbol İttifaqının birinci vitse-prezidenti soydaşımızın əsas yığmada oynamaqla bağlı seçimini şimal qonşularımızdan yana edəcəyini zənn edirmiş.
“Zenit”in yetirməsinin millimizdə forma geyinməsi ehtimalı barədə əvvələr də söhbətlər olub. Lakin indi vəziyyət fərqli və eyni zamanda bir qədər qarışıqdı.
Dünən Şeydayevlə bağlı AFFA-nın rəsmi saytı vasitəsi ilə yayılan məlumatda bildirilir ki, futbolçu federasiyaya müraciət edərək Azərbaycan milli komandasında çıxış etmək arzusunda olduğunu ifadə edib. Bunun hüquqi baxımdan mövcud qaydalara uyğun olub-olmamasının müəyyənləşdirilməsi məqsədilə AFFA FIFA-nın müvafiq komitəsinə müraciət ünvanlayıb. Son sözü ali futbol qurumu verəcək.
İctimaiyyət FIFA-dan gələcək xəbəri gözləməkdə olsun, biz məsələdə maraqlı olan tərəflərin açıqlamalarına diqqət yetirək…
AFFA-nın baş katibi Elxan Məmmədov bildirib ki, FIFA-nın reqlamentinə görə, bir oyunçunun milli komandada çıxış etməsi üçün o ölkənin pasportuna sahib olmasına gərək yoxdu. Əgər onun özü, atası, anası, nənəsi və ya babası oynamaq istədiyi ölkənin ərazisində doğulubsa, buna haqqı çatır. Şeydayevin atası isə Bakıda doğulub.
Rusiyalı idman hüquqşunası Mixail Prokopets isə əksini iddia edir. Onun sözlərinə görə, Ramil Azərbaycan millisində çıxış edə bilməz. Buna səbəb isə futbolçunun Rusiyanın yeniyetmələrdən və gənclərdən ibarət milli komandalarında çıxış etdiyi müddətdə Azərbaycan pasportuna sahib olmamasıdı.
Elə Şeydayevin açıqlaması da dəqiq bir şeydən xəbər vermir. Vətəndaşlığını dəyişmək haqqında düşünəcəyini və buna yaxın zamanlarda aydınlıq gələcəyini söyləyir. Onun “dəqiq heç bir şey yoxdu, ancaq anlaya bilmirəm ki, bu xəbərlər hardan çıxıb və internetə necə düşüb?” – şəklində danışması da qəribə görünür. Axı, onun vətəndaşlığını dəyişməsi boş söz-söhbət deyil, məsələ ilə bağlı AFFA-nın rəsmi saytı məlumat yayıb. Və ola bilməz ki, Şeydayev bundan xəbərsiz olsun.
Bu açıqlamalardan belə qənaətə gəlmək olur ki, Ramilin millimizdə oynamaq istəyi var, lakin FIFA-dan gələcək yekun qərar olmadan bu barədə danışıb, özünü “yandırmaq” istəmir. Şeydayev düşünür ki, birdən Azərbaycan millisi ilə bağlı variant alınmaz, ruslar da acığa düşüb ondan imtina edər.
Elxan bəyin “bir oyunçunun milli komandada çıxış etməsi üçün o ölkənin pasportuna sahib olmasına gərək yoxdu, əgər onun özü, atası, anası, nənəsi və ya babası oynamaq istədiyi ölkənin ərazisində doğulubsa, buna haqqı çatır” söyləsə də, bu, məsələnin 100 faiz lehimizə həll olunacağı anlamına gəlmir. Əks halda AFFA-nın FIFA-dan gələcək qərarı gözləməyə gərək qalmazdı…
AFFA-nın milliyə oyunçu cəlb etmək siyasəti hamıya bəllidi. Elxan Məmmədov və ətrafı bu işdə o qədər ifrata varıblar ki, hətta Şamil Qurbanovun timsalında dağıstanlı bir gənc Azərbaycanın gənclərdən ibarət yığmasının formasını geyinəndən sonra Ermənistanın "Uliss" klubunun düşərgəsində baxışda olmuşdu. Lakin klub futbolçunun millizin sabiq üzvi olduğunu anlayınca, onun transferindən vaz keçmiçdi. Sözümüzün canı odu ki, AFFA-da bu məsələrə baxanlar o qədər başıpozuq davranıblar, bu səbəbdən ictimaiyyət milliləşdirmə mövzusuna laqeyd yanaşır. Federasiyada çalışanların deyilib-yazılanları qulaqardı etməsi azarkeşlərin millimizin formasını kimlərin geyməsinin onlar üçün heç bir önəm daşımaması halına gətirib çıxardıb. Daha doğrusu, yığma komandalarımızın oyunlarına gələnlərin, maraqlananların sayı yetərincə azalıb. Dağıstanlı və ya Almaniyada yaşayan türklərin formasını geyindiyi yığma komanda onlara lazım deyil!
Azərbaycan millisində bu torpaqlara aid olan insanlar oynamalıdı. Şeydayev isə soydaşımızdı və Səmədovdan fərqli olaraq, bunu qürurla söyləyir. Üstəlik, yığma komandamızda oynamaq niyyətindədi. Belə olan halda, dağıstanlılara bir gecədə pasport vermək bacarığı olan Elxan bəy indi bütün bacarığını işə salmalıdı. Leqal və ya qeyri-leqal – hər halda, FIFA-da oturanlar da aydan arı, sudan duru deyillər…
FƏRİD