Şahin Diniyev: "Həyatımın ən məsuliyyətli oyunudu"

“Pafosdan, reklamdan uzaq qaçmaq lazımdı. Reallığı danışmalıyıq. İlk oyunu hamınız görmüsüz, “Admira”nın necə sürətli komanda olduğunu bilirsiz”. Futbolinfo.az. xəbər verir ki, bu sözləri “Kəpəz” klubunun baş məşqçisi Şahin Diniyev deyib.

Avropa Liqasının ikinci təsnifat mərhələsinin cavab oyunları çərçivəsində Gəncə təmsilçisi sabah “Admira”nı qəbul edəcək. Avstriya təmsilçisi ilə səfərdə keçirilən ilk matç “Kəpəz”in 0:1 hesablı məğlubiyyəti ilə başa çatıb. Cavab görüşündən öncə mətbuat konfransı keçirən Şahin Diniyev iddialı danışıb.
 
O bildirib ki, komandası sabahkı qarşılaşmada lazım olan nəticəni qazanmaq üçün əlindən gələni edəcək: “Onlara qarşı ilk oyunda üslublu çıxış etməyə çalışdıq. Hardasa arzumuza çatdıq, amma fərdi səhvdən qol buraxdıq. Səliqəli müdafiə olunmağı tapşırmışdım. Üç oyunda cəmi 1 sarı vərəqə almışıq. Bu da müdafiəçilərin səliqəli oyunundan xəbər verir. Şanslar 50-in 50-yədi. Biz orda döyüşü uduzduq. Sabah isə meydana müharibəni uduzmamaq üçün çıxacağıq. Şadam ki, belə futbolçularla işləyirəm. Məsuliyyəti dərk edirlər. Çalışırıq ki, başımızdan yuxarı tullanaq. Bəlkə də əlimizə heç vaxt belə şans düşməyəcək. Sabah bizi ağır matç gözləyir. “Admira” aqressiv, təzyiq yaradan komandadı. Ebah və Renanda kiçik zədələr var idi, amma dünəndən məşqlərə başlayıblar”.
 
– Sabah riskə əl atacaqsızmı?
– Sabah risk ölümə bərabər olar. Belə oyunlarda daha ağıllı, soyuqqanlı oynamaq lazımdı. Rəqibin səhvlərindən yararlanmaq lazımdı. Sabah hər iki komanda ehtiyatlı, nəticəyə oynayacaq.
 
– Penaltilər seriyasının üzərində məşq etmisizmi?
– “Daçiya” ilə cavab görüşündən öncə bunu etmişdik, amma bu dəfə etməmişik.
 
– Demək olarmı ki, sabah ən məsuliyyətli oyununuza çıxacaqsız?
– Uğursuz olsa belə, futbolçuları nədəsə günahlandırmağa haqqımız çatmaz. Həyatımın ən məsuliyyətli oyunudu. İnsan həmişə itirəcəyi şeyə görə qorxmalıdı. “Admira” “Daçiya”dan ikiqat güclü komandadı. Kağız üzərində onların şansı daha çoxdu. Bizim 2 üstünlüymüz ola bilər: motivasiya və aqressivliyimiz. İnanıram komandama. Belə olmasa, meydana çıxmağa dəyməz. Meydanın hər qarışı uğrunda mübarizə aparmalı, daha çox hərəkət etməliyik.
 
– “Admira”nın Şişxanovu varmı?
– Bu komandanın Şişxanovu prezidenti və baş məşqçisidi. Soyuqqanlı davranmaq lazımdı.
 
– Rəqibin zəif tərəflərini təhlil edib, tapmısızmı?
– Rəqibin 3 oyununa baxdım, boş sahə görmədim. Mən bu gün pafoslu danışa bilərəm. Amma bu günün sabahı da var. Mən təriflənəsi komandanı tərifləyirəm. Öz komandamızda nəyi gücləndirə biləcəyəm, onu axtarıram.
 
– Qorxunun olması sabah sizə problem yarada bilərmi?
– Qorxu komandada yox, məndədi. Bunu komandaya keçirmərəm. Uşaqlarda irəliləyiş var. Bizim qorxacağımız, itirəcəyimiz şey yoxdu. Rəqibdən çəkinirəm. Elə olmasa, başqa motivasiya ola bilər. Mənə elə gəlir ki, futbolçularımızda motivasiya yerindədi. Amma yenə deyirəm ki, işimiz çox çətindi.
 
– Start heyətini müəyyənləşdirmisizmi? İlk oyunla müqayisədə hansısa dəyişiklik olacaqmı?
– Bir mövqedə dəyişiklik etmək istəyirəm. Amma risk etmək istəmirəm. Seçim qarşısında qalmışam. Sabah axşama kimi qərarımı verəcəm. Ola bilsin, 1 mövqedə dəyişiklik edəm. Sevindirici haldı ki, zədəli oyunçumuz yoxdu.
 
– Adətən zarafat etməyi xoşlayan məşqçi olmusuz, amma bu gün elə görünmürsüz. Məşqə çıxanda da belə olacaqsız?
– Məşqə çıxanda daha ciddi olacam. Özümüzü ab-havaya uyğun aparmaq lazımdı. Gülüş insanı bir qədər “boşaldır”. Əlbəttə ki, zarafatın öz yeri var. İndiki vəziyyət onu tələb edir ki, həm mən, həm də futbolçular oyuna ciddi yanaşaq. “Boşalmaq” olmaz.
 
ELMAR ABDULLA-ZADƏ