Ölkə futbolu
Elxan Məmmədovun “səhər küləyi”
Məqsəd, amal yaxşıdı, reallaşdırılma metodu, seçimlər …
Məqsəd, amal yaxşıdı, reallaşdırılma metodu, seçimlər haqda isə eyni sözləri deyə bilmərik. Model kimi ən yüksək dəyərlər nəzərə alınıb, amma işin içində iş var.
***
İyulun 19-da yeni yaradılmış “Səbail” FK-nın təqdimat mərasimi keçirildi. Növbəti mövsümdən 1-ci divizionda oynaması nəzərdə tutulan yeni klub idarə heyətini açıqladı, rəhbərləri vəzifələrdən danışdı. Və elə ilk mətbuat konfransında bəlli oldu ki, niyyət başqa, reallıq başqadı.
Bəribaşdan qeyd edək ki, klubun adı, emblemi müzakirə olunmalıdı. Klub kimi rayonun adı da müzakirə mövzusu olmalıdı. Çünki Səbail son illərə kimi Səbayel adlanırdı və bu, ən doğru variantdı. Farsmənşəli bu sözün açması “səhər küləyi” deməkdi. Rayonun dəniz kənarında yerləşdiyini nəzərə alsaq, səhər vaxtı sahilə əsən dəniz küləyini tərənnüm edən bu sözü “Səbail” kimi yazıb-oxumaq doğru deyil, çünki sözün kökü saxlanılsa da, “il” dolğun mənanı itirir.
Təbii ki, bu, klubun problem deyil. Ancaq gələcəkdə tarixi adlara qayıtmaq lazım gələndə klub da dəyişikliyə məcbur olacaq.
Klubun emblemindəki qalanı hardasa başa düşmək olar. İşərişəhər, Bayıl qalası məhz Səbail rayonu ərazisindədi, amma onu mühafizə edən 3 şirlə bağlı hətta əfsanə də yoxdu. Ona görə də dalğaları özündə əks etdirən buta və ya elə küləyin simvolikası bu klub üçün daha məqsədəuyğun variant olardı.
Yeni klubun Bakıda təsis edilməsi də yaxşı hal deyil. Ölkə futbolunu daha geniş areala yaymaq, kütləviləşdirmək üçün bölgələrdə iş görmək məqsədəuyğundu. Bu komandanı ənənələri olan, amma hazırda futbola həsrət qalan hansısa rayonumuzda təsis etmək daha yaxşı olardı. Bərdə, Cəlilabad, Göyçay, Quba variantları daha ağlabatan variant idi. Bir halda ki, vaxtilə AFFA prezidenti Rövnəq Abdullayev də “İnter”, “Rəvan”, AZAL kimi klubların bölgələrə köçürülməsi təklifini vermişdi. İndi onun son mətbuat konfranslarının birində “Səbail”in yaradılmasından və bu klubun gələn il Premyer Liqada oynayacağından bəhs etməsi çox maraqlıdı. Ya o əvvəlki sözlərini unudub, ya da ona məsləhət verənlərin sözünü deyir.
***
Klubun idarə heyətinə nəzər saldıqda isə “məsləhət verənlər”in və bu işin ideya müəllifinin kim olması aydınlaşır. 18 yaşadək futbolçulardan ibarət Azərbaycan millisinin baş məşqçisi Təbriz Həsənov, “Mancester Yunayted” Yay Futbol Məktəbinin koordinatoru Ramin Həsənov, “Sport Marketinq Group” şirkətinin direktoru Ayaz Əhmədov, “Neftçi”nin veteran oyunçusu Əbdülqəni Nurməmmədov və tanınmış teleaparıcı Tural Əsədov.
İlk 3 şəxsin adını birbaşa AFFA-nın baş katibi Elxan Məmmədovla bağlamaq olar. Təbriz bəy Məmmədovun sevimli kadrıdı, daim onun müdafiəsindədi. Bu adam Berti Foqtsun köməkçisi olmuşdu, ovaxtdan bəri də daim milli komandalardadı. Ramin bəyin işlədiyi yer birbaşa Elxan bəyin layihəsidi, “Sport Marketinq Group” da yenə baş katibin nüfuzu çatan şirkətdi. Müşahidə Şurasının sədri seçilən Yusif Həsənov hər nə qədər klubun Elxan Məmmədova aid olmadığını desə də, faktlar bunun əksini göstərir.
İdarə heyətində təmsil olunan veteran futbolçu Əbdülqəni Nurməmmədov gözdən pərdə asmaq üçün seçilən şəxsdisə, Tural Əsədovun burada təmsil olunması biabırçılıqdı. O, yaxşı teleaparıcıdı, başqa heç nə… Gedib öz işi ilə məşğul olsa, yaxşıdı. Kiminsə dostu, “kruq”u olmaq özünü futbola soxmağa səbəb olmamalıdı. Biznesmen, iş adamı, futbola pul yatıran adam olsaydı, başa düşərdik, indiki halda Əsədov qohumbazlığın, dostbazlığın nümunəsidi.
***
Ümumiyyətlə, Elxan Məmmədovun müşahidə şuraları ilə bağlı layihələri təqdirəlayiqdi. Mənsimovların “Xəzər Lənkəran”ı, Məmmədovların “Bakı”sı klubların bir adamın əlində cəmləşməsinin hansı fəsadlara səbəb ola biləcəyini göstərdi. Ancaq yeni struktur, yeni idarəetmə forması yaradılırsa, bu, niyyətə uyğun olmalıdı. Müşahidə şuraları kluba pul yatıran insanlardan təşkil edilməli, onların inkişafda marağı olmalıdı. “Neftçi”, “Kəpəz” və “Sumqayıt” nümunələrində isə bunun əksini görürük, şura üzvləri nəinki aksiya sahibləri deyil, əksinə, klubdan maaş alırlar. Bu isə daha çox sponsor olan SOCAR-ın maliyyəsinin bölüşdürülməsi kampaniyasına oxşayır.
“Səbail”də də vəziyyət oxşardı. Düzdü, Məmmədov bura inandığı adamları yığıb, amma qalanları futbolda az-çox fəaliyyət göstərirsə, Bəhram Bağırzadə kimi incəsənətlə futbolu sintez edib arada qalacaq Tural Əsədovdansa, həqiqi bir mütəxəssisi işə qoşmaq daha yaxşı olardı. Bu adam Təbriz Həsənovdan daha titullu məşqçi Arif Əsədov da ola bilərdi, Yunis Hüseynov da, bir başqası da. Hətta uğurlarla müşaiyət olunan karyeraya sahib Tahir Süleymanov da…
***
Təbriz bəyə inansaq, “Səbail” klubunda əsas işi komandanın formalaşdırılmasına yardım etmək olacaq: “Bildiyiniz kimi, son olaraq U-17-nin baş məşqçisi idim. İndi isə U-18 mənə tapşırılıb. Gənc futbolçuları daha yaxşı tanıyıram. Bilirəm kim klubunda oynamır, kim boşdadı. Həm də əksəriyyətinin potensialına bələdəm. U-18 hələ təsdiqlənməyib. Rəsmiləşəndən və ölkə çempionatlarının təqvimi bəlli olandan sonra buna uyğun plan tərtib edəcəyik. Çempionatda fasilələr yaranan zaman U-18-i yigib yoxlama oyunları təşkil edəcəyik. “Səbail” əvvəlki “Şəfa” modeli deyil. Həmin komanda ovaxtkı AFFA rəhbərliyinin göstərişi ilə ən yaxşılardan qurulmuşdu. İndi isə belə bir şey yoxdu. Oyunçularını bizə vermələri üçün klublara təzyiqdən söhbət gedə bilməz. Hər klubun öz strategiyası var”.
Axı, Müşahidə Şurasının mahiyyəti bu olmamalıdı. İdarə heyəti bütün işləri icraçı direktora tapşırmalı, qərarları hesabata əsasən kollegial şəkildə verməlidi. Həsənov oyunçu seçəcəksə, menecer, seleksiyaçı və ya məşqçilər kimə lazımdı? Və ya Tural bəy Bağırzadə kimi fanat yığmaqla məşğul olacaqsa, aqibət indidən bəllidi. Özünüz baxın: avrokuboklarda ən uğurlu təmsilçilərimiz Müşahidə Şurasının idarə etmədiyi klublardı: “Neftçi” transferə, “Kəpəz” məşq etməyə pul tapa bilmir, cavab oyunları ərəfəsində də taleləri tükdən asılıdı.
***
“Səbail”in baş məşqçi postuna baxın. Burada da dostluq münasibətləri ön plandadı. Elman Soltanov nə futbolçu kimi özünü sübut edib, nə də məşqçi kimi. Belədə onu Premyer Liqaya yüksəlməsi planlaşdırılan kluba gətirməyin mənası nədi? Yenə şəxsi münasibətlər, yenə “kruq” söhbəti. Elə Faiq Əzizov da belə seçilib. Maraqlıdı, indi onu əsas millidə də qapışılarla işləyən məşqçi kimi saxlayacaqlar, yoxsa?..
"Bayıl Arena" AFFA-nın balansındadı, direktoru Rza Həsənov baş katibin qaynıdı. “Səbail”in oyunlarını burada keşirməsində bir “hikmət” var. Maraqlıdı ki, klubun Müşahidə Şurasının sədri Yusif bəyin də soyadı Həsənovdu. “Həsənov Yusif, Həsənov Təbriz, Həsənov Ramin – biz qohum deyilik” – bu sözlər isə təqdimat mərasimində Yusif bəyin dediyi ilk sözlərdi. Sədr özü də təəccüblənib, deyəsən.
İdarə heyətinin bütün üzvlərinin Elxan bəylə tanış olması, dostluq münasibətlərinin mövcudluğu inkarolunmazdı. Bəzilərini şəxsən, bəzilərini qiyabi tanıyıram. İndidən onların heç nəyi bacarmayacağını iddia etmirəm. Baş katibə bu səlahiyyəti veriblər, o da inandığı adamları seçib, nəticəsinə görə də cavab verəcək. Amma məni narahat edən ideyanın reallaşan addımlarla uyğunsuzluğudu. Çünki idarə heyəti səhmdarlardan qurulmayıb, “Səbail” ictimai birlik olsa da, Müşahidə Şurası tanışlıq prinsiplərinə əsasən formalaşdırılıb.
Amma yenə də baş katibin bu klub layihəsinə inanmaq istəyirik. Həsənov “Səbail”in biznes-model olacağını deyir. Ümid edirik, belə də olacaq, dənizdən axan külək – “səba yeli” bütün futbolumuza yeni nəfəs gətirəcək.
VÜSAL MAHMUDOV
P.S.: AFFA-nın baş katibi Elxan Məmmədovla Peşəkar Futbol Liqasının prezidenti Ramin Musayevin fərqi bilirsiz nədədi? Hər ikisi klubların saxlanılması üçün sponsorun ayırdığı maliyyəni aidiyyatı üzrə yönəltməklə məşğuldu. Fəqət, Musayev “Şuşa-Qarabağ”ı mən yaratdım, “Şəmkir”ı mən saxladım, “Turan”a mən pul ayırdım” deyir, Məmmədov isə bunu tanışları vasitəsilə edir, klub yaradır, saxlayır, maliyyələşdirir, amma heç biri ilə yaxınlığını etiraf etmir.
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Premyer-liqa2024-04-30 09:30
“Yalnız birlikdə olaraq uğurlar qazana bilərik” – Ozobiç
- I Liqa2024-04-30 14:45
“Araz Saatlı”nın məşqçisinə 2 oyunluq cəza