Ölkə futbolu
Qələbəni yarımmüdafiə xətti “istəmədi”
“Qarabağ” tarixi nəticəyə imza atdı. Çempionla…
“Qarabağ” tarixi nəticəyə imza atdı. Çempionlar Liqasının 3-cü təsnifat mərhələsində indiyədək heç bir Azərbaycan klubu səfərdən xalla dönməyi bacarmamışdı.
Ağdamlıların bu statistik göstəricisi müsbət emosiyalara rəvac verir. Bəs, oyun? Qarşısına Çempionlar Liqasının qrupuna düşmək vəzifəsi qoyan, tarixinin ən güclü heyətinə malik “süvarilər” sərgilədikləri futbolla cavab qarşılaşması öncəsi nikbin əhval-ruhiyyənin təməl daşını qoydularmı?
Start heyətində Mahir Mədətovun yer alması, ən yaxşı halda, “təəccübləndirici” statusu ala bilər. Əlbəttə, gənc hücumçunun bişməsi üçün bu cür məsul qarşılaşmlarda meydana çıxması olduqca önəmlidi. Özü də Riçard Almeyda, Miçel, Reynaldo, Dani Kintana kimi oyunçuların əhatəsində. Ancaq hələ futbol əlifbasının “A” hərfini öyrənən oyunçu start heyətində çıxmalı deyildi. Bəli, məqsəd oyunun ilk yarısında rəqibin müdafiə xəttini yormaq, fasilədən sonra Reynaldonu hücuma atıb, texnikası və sürətindən istifadə etmək ola bilər. Ancaq Mədətovun 45 dəqiqəyə bu vəzifənin öhdəsindən gəlməyəcəyi əvvəlcədən məlum idi. Gəlmədi də…
İlk dəqiqələrdən Azərbaycan çempionunun rəqibindən çəkindiyi hiss olunmağa başladı. Komandanın ən zəifləri sıralamasına Riçard Almeydanın başçılıq edəcəyini görmək olduqca üzücü mənzərə idi. “Qarabağ”ın “dirijor”u sanki orkestri “çubuqsuz” idarə etməyə çıxmışdı. Çoxsaylı səhvləri sıralayan braziliyalının oyunu getməyincə, mərkəzdə Plzen təmsilçisi istədiyi futbolu ortaya qoya bilirdi. Daha çox yük Maksim Medvedevin cinahına düşürdü. Rəqibin kəsərli hücumlarının məhz sağdan alınmasında Maksdan çox Dani günahkar idi. Müdafiə xəttinə kömək etməyən ispaniyalı millimizin müdafiəçisini daim 2 rəqibə qarşı qoyurdu ki, belədə, boşluqlar qaçılmaz olurdu. Elə Miçel də “qab”ında deyildi. Komandanın 3 aparıcı yarımmüdafiəçisi inamsız oynayırsa, bu kollektivdən hansısa fövqaluğur gözləməyə dəyməz.
Nə yaxşı ki, dünənki axşam Qara Qarayev karyerasının ən yaxşı oyunlarından birini keçirdi. Qaranın “qara” işi də, “ağ” işi də göz oxşayırdı. Söhbət təkcə topu boş qapıdan çıxarmasından getmir. Qarayev sözün yaxşı mənasında “harda aş, orda baş” idi. Uzun ötürmələri də yerində idi, komanda yoldaşlarını sığortalaması da, rəqibin kəsərli hücumlarının qarşısını xırda follar hesabına alması da.
Müsbət qəhrəmanlardan danışarkən, “müdafiə naziri” Rəşad Sadıqovu unutmaq olmaz. Bəli, kapitanın sürəti əvvəlki deyil, ancaq təcrübə! Futbolda ağıl həmişə sürətdən üstün keyfiyyət olub. Sadıqov da mövqe seçimi, rəqibin gedişlərini oxumaq bacarığı ilə müdafiənin mərkəzinin ipini əlində saxlayırdı.
Ortaya çıxan təbii sual: “Bəs, “Qarabağ”ın qapısı qarşısındakı qol vəziyyətləri”? Yuxarıdakı abzaslarda qeyd etmişdik ki, ağdamlıların əsas kozırı sayılan yarımmüdafiə xətti olduqca inamsız təsir bağışlayırdı. Bax, həmin keyfiyyətsiz futbolun acısı qapımız qarşısındakı təhlükəli epizodlara rəvac verirdi.
Bununla yanaşı, İbrahim Şehiç də çıxışlarda olduqca inamsız təsir bağışlayırdı. Ötən il “Seltik”lə görüşdə buraxdığı mövqe səhvi “Qarabağ”ı Avropa Liqasının pley-offuna yuvarlamışdı, Allah təkrardan saxlasın.
Fasilədən sonra Qurban Qurbanov Muaremi döyüşə ataraq, Reynaldonu hücum xəttinə keçirdi. Bu yerdəyişmədən sonra “süvarilər” qismən də olsa, özlərinə gəlməyə başladılar. Ancaq Almeydanın inamsız oyunu komandanın ansabl şəklində görünməsini əngəlləyirdi. Ümumiyyətlə, “Qarabağ” hər epizodda oyunu “söndürməyə” çalışırdı və aşkar şəkildə səfərdən heç-heçəylə dönmək arzusunda olduğunu hiss etdirirdi.
Əgər Muarem az-çox komandanın oyununu canlandırdısa, Əfran İsmayılov nəyə görə ehtiyatda qaldığını meydanda olduğu dəqiqələrdə rahatlıqla ortaya qoydu. Vaxtilə parlaq oyunuyla adından söz etdirən Əfrandan ancaq kölgəsi qalıb.
Ən xoşagəlməz məqam budu ki, rəqib azlıqda qaldığı 15 dəqiqədə də “Qarabağ” hücum edib hesabı açmağa meyl göstərmədi. Topu özündə saxlamaqla kifayətlənən çempionumuz “buna da şükür” dedi. Unutmayaq ki, cavab oyunu Bakıda keçirilsə də, rəqib həmin rəqib olacaq, amma ilk görüşdəki son 15 dəqiqədən fərqli olaraq, “Viktoriya”nın heyətində 11 oyunçu yer alacaq.
Ağdam klubunun potensialı “Viktoriya” səddini aşmaq üçün yetərlidi. Bu da faktdı ki, “Qarabağ” ideal formasını hələ yığmayıb. Ancaq Plzen təmsilçisi də Azərbaycan çempionuyla eyni vəziyyətdədi: Çexiya çempionatı hələ ki, start götürməyib. Bizə indi yalnız ümid etmək qalır. İnanaq ki, növbəti 1 həftə ərzində Qurban Qurbanovun yetirmələri relsə düşəcəklər və Respublika stadionunda adət etdiyimiz əzəmətli “Qarabağ”ı görəcəyik.
CEYHUN ƏLİYEV
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib