İki fərqli “Qəbələ”: cəsur və çarəsiz

“Qəbələ” müdafiədən deyil, ağıllı və səliqəli hücum futbolu oynamalıydı – plan belə idi. Kaş ki, “CBC Sport”un canlı yayımı 80-ci dəqiqədən sonra yox, elə fasilə zamanı texniki problem səbəbindən kəsiləydi. Biz də yekun nəticəni – 1:1-lik bərabərliyi əldə rəhbər tutaraq, matçın Roman Qriqorçukun ssenarisinə uyğun oynanıldığını söyləyə bilərdik. Amma…

Amması-filanı yoxdu: Eşq olsun, “Qəbələ”yə! Bir neçə il öncə hər hansısa Azərbaycan təmsilçisinin səfərdə Fransa klubu ilə başabaş oynamasını, uduzmamasını yalnız xəyal edə bilərdik. Bu gün isə komandamızın qalib gələ bilməməsinə üzülürük. Hərçənd, pley-off xarakterli çəkişmələrdə səfərdə qollu heç-heçə əla nəticə sayılır.

Bəli, “Qəbələ” qələbə də qazana bilərdi. Oyuna çox yaxşı, cəsur başladılar. Nika Kvekveskirinin ötürməsini Vitali Vernidub qola çevirəndə, komandamızın fərqlənməsini sensasiya kimi deyil, normal qarşıladıq. Hətta, Teo Uiks hücum zamanı ötürmə verməyə gecikən zaman belə, irəliləyən dəqiqələrdə daha çox şansımızın olacağını güman edirdik. Lakin fasilədən sonra “Lill” meydanda öz ağırlığın qoya bildi.

İkinci hissədə qapımız önündə qol vəziyyətləri bir-birini əvəz edirdi. İlk yarıdakı cəsurluq yerini çarəsizliyə vermişdi. Müdafiəmiz o qədər çaş-baş qalmışdı, futbolçularımız elə kobud səhvlərə yol verirdilər ki, dadımıza ancaq Dmitri Bezotosnı ilə bəxt amili çatırdı. Hərçənd, elə ən çox səhv edənlərdən biri də qapıçımız idi, çıxışlarda düzgün oynamırdı. Vernidub isə bu dəfə vurduğu qolu nəzərə alıb danlamayaq. Lakin susmağımız onun etibarsız mərkəz müdafiəçisi olması gerçəyini dəyişdirmir.

Təbii ki, ikinci yarıda “Lill”in qapımız önündə xeyli qol vəziyyəti yaratmasının günahı yalnız müdafiəçilərin üzərinə düşmür. “Qəbələ” öndə istədiyi kimi oynaya bilmədiyi üçün arxa xətdə sıxıntı çəkdi. Təsəvvür edin, ikinci hissədə Rikardinyonun cinah ötürməsini Uiks qapıya istiqamətləndirəndə, 75-ci dəqiqə idi. Yəni, ilk hücumumuzu yarım saatın tamamında etdik.

“Qəbələ” fasilədən sonra ilk yarıdakı kimi oynaya bilməsə də, əldə edilən nəticə nikbin olmağa əsas verir. Bizim üçün tarixi nəticədi. Komandamız rəqibi üzərində üstünlük əldə edib. Lakin qarşıda hələ oynanmamış 90 dəqiqə var. Dəstəyimizi əsirgəməyək! Kimin yoluna davam etməsindən asılı olamayaraq, “Qəbələ” sərgilədiyi futbola görə xoş sözlərə layiqdi.

AĞA