Bəhmən Həsənov: “Əsas hədəfimiz yenidən Premyer Liqaya qayıtmaqdı”

“Rəvan”ın baş məşqçisi Bəhmən Həsənovun futbolinfo.az saytına müsahibəsi:

– Yeni mövsümə hazırlıq planlarınız bəllidimi?
– Komandanın vəziyyəti normaldı. Avqustun 5-dən məşqləri bərpa edəcəyik. Düzdü, hazırlıqları bir az tez başlamaq istəyirdik. Amma 1-ci dəstədə yarışların sentyabrın 15-də start götürməsi çalışalarımıza gec başlamağımıza səbəb oldu. Hazırlığın ilk hissəsi Bakıda olacaq, “Bayıl Arena”da məşq edəcəyik. Daha sonra 19-28 avqust tarixlərində Salyanda olacağıq. Ümumi toplanış müddətində 4 yoxlama oyunu nəzərdə tutmuşuq. Amma rəqiblərin kimliyi bəlli deyil. 

– Heyətdə futbolçulardan kimlər qalıb?
– Ötən mövsüm heyətdə olanlardan kimlər digər klublara keçməyibsə, bizimlədi. Növbəti mövsüm üçün əsas hədəfimiz yenidən Premyer Liqaya qayıtmaqdı. Ona görə də heyətə legionerlər cəlb edəcəyik. Komandanı ukraynlı futbolçularla gücləndirmək fikrindəyəm. Klubun vitse-prezidenti İlqar Axundovla da bu barədə danışmışıq, legionerlər ayın 5-də Bakıda olmalıdılar. Elvin Əliyev, Cəmşid Məhərrəmov, Əziz Hüseynov, Elnur Abdulov hazırda bizimlədi. Bir çox yerli futbolçu ilə də danışıqlar aparmışıq. 1-ci dəstədə mübarizə güclü olacaq, fikrimcə, Premyer Liqaya vəsiqə uğrunda 8 komanda savaşacaq. 

– Futbolçuların borcları ödənilibmi?
– Son ayların maaşlarını almışdılar. Ola bilər ki, əvvəlki ayların pulları qalsın. 

– Hazırda “Rəvan”ın hansısa futbolçuya borcu qalıbmı?
– Dəqiq bilmirəm, bu haqda mənə müraciət edən olmayıb.  

– Yeni mövsümün büdcəsi bəllidi?
– Təlim-məşq toplanışının, meydançanın pulu, həmçinin, 1-ci dəstəyə uyğun maaş sistemimiz olacaq.

– Yəni konkret rəqəm bilinir?
– Kimə nə qədər məvacib verilməsi ilə bağlı futbolçularla fərdi danışmışam. Deyilən rəqəmlərin siyahısını isə İlqar müəllimə təqdim etmişəm. Məhz bundan sonra büdcə formalaşdırmışıq. Minumum aylıq 15-18 min büdcə ayrılacaq.

– “Rəvan”ın akademiyasında vəziyyət nə yerdədi?
– Akademiyada aşağı yaş qruplarında olan komandaların hamısı fəaliyyətini davam etdirir. Çox yaxşı, istedadlı uşaqlarımız var. Onlara da dəstək oluruq, tez-tez təlim-məşq toplanışı keçirik. Bu yaxınlarda Gürcüstanın Batumi şəhərində onlar üçün yoxlama matçı da təşkil etmişdik. Yaxın günlərdə də Xaçmaza gedəcəklər.

– Köməkçilərinizlə yol davam edəcəksiniz?
– Bəli, Anar Vəliyev və Kamil Qafarovla işimə davam edəcəm.

ELMAR ABDULLA-ZADƏ