Ölkə futbolu
Bütün yanlışları ilə… "Qarabağ"
Elvin Yunuszadə nə idi, Qurban bəy? "Günah keçisi&…
Elvin Yunuszadə nə idi, Qurban bəy? "Günah keçisi" axtarmırıq, amma bu "canlı bomba"nı həssas zonaya, "barıt çəlləy"i olan yerə necə atdız axı?
***
Hamı yanlış əvəzləmələrdən danışır, "Qarabağ"ın baş məşqçisi Qurban Qurbanov isə əksini düşünür. Əslində, "Viktoriya"nı udmağı, mərhələ adlamağı, tarix yazmağı ən çox elə Qurbanov istəyirdi. Bu səbəbdən onun məyusluğu başadüşüləndi, amma gətidiyi dəlillərlə razılaşmıram.
Dünənin qəhrəmanı, bugünün ən reytinqli məşqçisi sabahın uğursuzu ola bilər. Bu, gözləniləndi. Lakin buna görə Qurbanovu siyahıdan silmək olmaz, o, yenə də futbol tariximizin ən yaxşılarından biri kimi qalacaq. Bununla belə, Çexiya klubuna məğlubiyyətin əsas səbəbkarlarından danışarkən ilk olaraq Qurban bəyi göstərməliyik.
***
Muarrem zədələndi, Almeyda əvəzlənməyini özü istədi, Kintana yorulmuşdu. Bütün bunlar başadüşüləndi, lakin onları əvəz edənlər bir ildi ayağına top dəyməyənlər idi – elə səhv də burada idi. Əl-Hərbi yanlış transfer siyasətinin başında duranlardandı, Elvin hətta AZAL-a qarşı oynatmağa yaramır, Əfran İsmayılovun futbolu isə "Bakı"ya gedərkən bitmişdi.
Taktiki anlamda Yunuszadənin oyuna buraxılması düzgün idi. Cinahlarda üstünlük qazanan rəqibin asmalarını məhz üçlü oynayacaq mərkəz müdafiəçiləri qarşılamalı idi. Amma Elvin o qədər yararsız futbolçudu ki, bir anda 85 dəqiqə intizamlı oynayan müdafiə xəttini tar-mar etdi, Bədavi Hüseynov, Rəşad Sadıqov və dayaq yarımmüdafiəçisi Qra Qarayevin fədakarlığını yerə vurdu. Məhz Elvinin oyuna qoşulması ilə mərkəz müdafiəçiləri rəqib oyunçuları necə bölüşdürdüklərini unutdu, xaos yarandı və qapımıza vurulan yeganə sanballı zərbə bərabərlik qolu ilə nəticələndi.
Əl-Hərbi Daninin kölgəsi də ola bilməz. Qurbanov israrla cinahlara yeni qüvvə yeritməklə oyun modelinin pozmamağa çalışsa da, bu legioner effektivliyi maksimum azaltdı, halbui Kintana tək ayaqla ondan daha çox xeyir verərdi. Bəlkə də Coşqun Diniyev, Rahid Əmirquliyev rəqibi öndə qarşılamaq baxımından daha çox fayda verər və komandaya kifayət qədər vaxt qazandırardı. Bəlkə, bəlkə, bəlkə…
Qurbanov da bu "bəlkə"ləri düşündü. Həmin Əfran oyuna qoşularkən ilk toxunuşundaca ikinci qolu vursaydı, indi Qurbanovun uğurlu əvəzetməsindən danışırdıq. İnsaf naminə, İsmayılov günahını az sonra yudu, lakin onun ideal ötürməsini Migel Madeyra tamamlaya bilmədi. Halbuki məhz həmin epizoda görə Dani və Almeydanın ölüsünü meydanda saxlayıb, son dəqiqələrdə sanki rəqibin heyətində oynayan bu ispanı kənara almaq lazım idi.
***
"Qarabağ"ın uğursuzluğuna bu qədər üzüldüyüm olmamışdı. Hətta İtaliya "İnter"i ilə oyundan sonra da daha sakit idim. Amma bu, real tarixi şans idi. Əldən verilməməsi lazım idi. Qorxuram bu oyunun şokunu Avropa Liqasının pley-offunda da hiss edək. Bax, o zaman "Qarabağ" erası"nın sonu başlaya bilər.
"Qarabağ" zəif oynasa, adamı bu qədər yandırmazdı. Təsir edən parlaq oyunun son 10 dəqiqəsində başverənlərdi: şok əvəzetmələr və ölümcül zərbəyə çevrilən cavab qolu. Ondan sonra meydanda xaos idi, 2 mərkəz müdafiəçisi hücumda oynasa da, onların mərmidaşıyanları qalmamışdı – bu zaman Almeyda ilə Kintana ehtiyat oyunçular skamyasında tərini soyudurdu.
Almeyda, Əfran, Migel, Dani elə şansları qaçırdılar ki, Qurbanovun mətbuat konfransında qismətlə bağlı dediklərinə inanmaq istəyirsən. Ancaq bu işlər qismətlə, bəxtlə bağlı olmur. "Qarabağ" illərdi normal mərkəz hücumçusu tapa bilmir, sol cinahda daha rahat oynayan Reynaldo isə sivri ucda əzəmətli deyil. Əvvəllər seleksiya işinin nəticəsi sevindirmirdi, indi isə büdcə yoxdu. Mahir Mədətovun ümumiyyətlə, iştirak ərizəsinə salınmaması isə ayrı mövzudu. Plzendə start heyətdə oynayan birinin hətta "18-liy"ə salınmaması tapmacaya bənzəyir.
***
"Qarabağ"ı, Qurbanovu yerə vurmaq da doğru deyil. Qəzadan oldu, "qismət" olmadı, yoxsa etimad göstərilənlər ümidi doğrultmadı – hər nədisə, nəticə məlumdu. İndi komandaya dəstək olmaq, heç olmasa, Avropa Liqasında qrupa düşməsi üçün ağdamlıların yanında olmaq lazımdı. Amma lütfən, rəhbərlik heyətə bir az əl gəzdisin. Əl-Hərbidən nicat ummaq olmaz, onsuz da bacarıqlı yarımmüdafiəçilər kifayət qədərdi, komandaya forvard lazımdı. Vüqar Nadirovu heyətə pərçim etmək problemin həlli deyil, söhbət "Qarabağ"a yaraşan hücumçudan gedir. Bir də Rəşad Sadıqov hər nə qədər toxunulmaz olsa da, təcili mərkəz müdafiəçisi alınmalıdı. Zədəni, cəzanı nəzərə alsaq, Sadıqovla Hüseynova alternativ tapılmalıdı, Yunuszadə ilə heç Premyer Liqanı da yola vermək olmaz.
FƏRİD
P.S.: Elvin meydana daxil olan kimi "Qarabağ"qol buraxdı. Bu adam isə hələ oyuna kimi komandanın əhval-ruhiyyəsini korlamışdı. Matçdan bir gün öncəki açıq məşqdə Nadirovla dalaşmaqla o, "enerji"sini büruzə vermişdi. Oyunöncəsi ab-havanı pozmamaq üçün bu xəbəri gizləmişdik, ancaq indi saxlamağın mənası yoxdu. 2 lazımsız, artıq yük olan oyunçunun kiçik münaqişəsi nəticəyə təsir etməsə də, hər halda, fakt idi. Bekarşılıq, məsuliyyətsizlik onları bu həddə çatdırıb ki, hətta "kvadrat" oynayan zaman da komanda yoldaşlarının qanını qaraldırlar.
P.P.S.: Deputat Qənirə Paşayevanın paltardəyişmə otağına gəlib təsəlli verməsi, tribunaları tam doluran 30 mindən çox azarkeşin müdhiş dəstəyi uğursuz nəticəyə mane ola bilmədi. Hətta bərabərlik qolunun müəllifi olan futbolçunun tribunada Çexiya bayrağı açan azarkeşlərin yanına qaçıb onlara forma atmasını pis qarşılayanlar da oldu. Polis əsəbindən həmin futbolçnun üstünə gedənləri yerindəcə "tərksilah" etdi. Halbuki qıcıq verən hərəkəti izləyən fanatların incimək üçün haqqı var. "Viktoriya"nın gücünü şişirtməklə deyil, dünən axşam tərifli BATE-ni darmadağın edən İrlandiya "Dundalk"ı göstərdi ki, istəyəndə hər şey mümkündü. Necə ki, bunu ötən il Albaniya "Skenderbeu"su, Qazaxıstan "Astana"sı etmişdi. "Qarabağ" isə yenə bacarmadı…
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”
- Milli komanda2024-04-22 13:46
Fişer: “AFFA-dan təklif almamışam”
- Ölkə futbolu2024-04-23 08:00
“Səbail” “Sabah”a uduzsa…