Roman Qriqorçuk: "Fransızları bilərəkdən cinaha qovmuşduq"

Avropa Liqasının 3-cü təsnifat mərhələsinin cavab qarşılaşması çərçivəsində sabah Fransa "Lill"ini qəbul edəcək "Qəbələ"nin baş məşqçisi Roman Qriqorçuk mətbuat konfransı keçirib. Futbolinfo.az ukraynalı mütəxəssisin cavab matçı ilə bağlı fikirlərini təqdim edir: 

– İlk oyunda "Qəbələ" hücumlarıyla "Lill"i təəccübləndirə bildi. Sabah nəylə təəcübləndirə biləcəksiniz?
– Necə oynayacağımızla bağlı bunu deyə bilərəm ki, hücumdakı oyunumuz qarşılaşmanın nəticəsinə təsir edəcək.

– Dayaq yarımmüdafiəçisi mövqeyini gücləndirmək barədə düşünmürsünüz?
– İlk növbədə hücum xəttinə futbolçu axtarırıq. Əlbəttə, bütün xətləri gücləndirmək istəyərdik. Ancaq bu gün qənaət şəraitində çıxış edirik. Bu mövqedə çıxış edən futbolçularımıza inanırıq.

– "Qəbələ"nin əks-hücumdakı bacarığını rəqib görüb. "B" planınız varmı?
– Heç kimin fikrini şərh etmək istəmirəm. Ancaq bizim oyun üslubu mövqe hücumudu. 

– Ederə qarşı fərdi oynamağı düşünmürsünüz?
– Oyun üslubumuzu ona uyğun dəyişmək niyyətimiz yoxdu. "Lill"in heyətində xeyli futbolçu var ki, bizə təhlükə yaşada bilər.

– Rəqibin cinah hücumları olduqca təhlükəli alınırdı. Buna cavab olaraq, əsas diqqəti cinahlara yönəltmək fikriniz yoxdu?
– Razılaşmıram. "Lill"in mərkəzdən hücum edəcəyini nəzərə alıb, əsas diqqəti həmin mövqelərə yönəltmişdik. Onların cinah oyunçuları güclüdü, ancaq biz bilərəkdən bu taktikanı seçmişdik.

– Bu gün Mendinin sosial şəbəkədə komandanıza dəstək video yayılıb. Görmüsünüz?
– Görməmişəm, yenicə eşitmişəm. Ona təşəkkürümü bildirirəm. Çox şadam ki, onun kimi peşəkarla birgə çalışmışam. 

– Sabiq köməkçiləriniz və komandanı tərk etmiş futbolçularla əlaqələriniz qalıbmı? Onların gedişinə heyfslənirisiniz?
– Həyat davam edir. Dünənə boylanmağı sevmirəm. Sabiq köməkçilərimlə əlaqələrimiz var, futbolçularla isə danışmamışam. Amma əminəm ki, əlaqələrimiz olacaq.

– "Samtredia" ilə oyundan əvvəl demişdiniz ki, yeni qurulmuş komandanızın necə oynayacağını özünüz də bilmirsiniz Bəs, indi necə?
– Desəm ki, istədiyimizi ayyarıma almışıq, heç siz də məni düzgün başa düşməsiniz. Ancaq etiraf edim ki, bu müddət kəsiyində xeyli iş görmüşük və əldə etdiyimiz nəticə məni sevindirir. Komandamın istədiklərimi tez qavraması da məni sevindirir.

– Bir çox avrokubok qarşılaşmalarından öncə 5, 6 top fərqli qələbə qazanmaq istəyinizi demisiniz. Rəqibin Fransa təmsilçisi olduğunu nəzərə alsaq, iştahınız korlanmayıb?
– Əsla! Biz yenə də 5:0-lıq qələbə istəyirik. Rəqiblər dəyişir, arzularımız isə əvvəlkitəkdi!

CEYHUN ƏLİYEV