Taleyin istehzası: AZAL-a 1 həftədə 2-ci dərs

Ramil Diniyev  öz ampulasındadı. Ötən çempionatın sonuncu turunun “Rəvan” – “Xəzər Lənkəran” matçında verdiyi gülünc penalti qərarı ilə hakimlik karyerasını bir qədər “zənginləşdirən” referi sevənlərini intizarda saxlamayacaq qədər anlayışlı biridi. Budu, yeni mövsümün açılış matçı və ön planda yenə odu. Adam qalmaqalsız yaşaya bilmir, artıq bu işi özü hobbi halına gətirib. AFFA da o biabırçılıqdan sonra onu cəzalandırmayıb, elə ilk turdaca etimad göstərib.

Zarafat deyil e, onun ad və soyadını “YouTube”də axtarış bölməsində yazanda qarşımıza biri digərindən cəlbedici sərlövhələr çıxır: “Polislər Ramil Diniyevi azarkeşlərin əlindən güclə aldılar”, “Ramil Diniyev bizi boğaza yığıb”, “2011-ci il, Qəbələ – Neftçi (1-0). Ramil Diniyevdən oyunun 90+2-ci dəqiqəsində səhv penalti qərarı”, “Rəvan”–“Xəzər Lənkəran” oyununda hakimin biabırçı səhvi”,  “2011-ci il. Ramil Diniyevin qərarlarına görə “İnter” oyunu dayandırır” və daha nələr-nələr…

Dünən AZAL – “Neftçi” matçında köməkçi hakim kimi qapı arxasında dayanan Diniyevin meydan sahiblərinin təmiz qolunu saymamısı da ən çox izlənilən videolardan olacaq, buna əminik. Amma Ramil bəyin PFL prezidenti Ramin Musayevə xitabən “Ramil müəllim, qol olmadığına əminəm” söyləməsi qolu qeydə almaması qədər əcaib görünür. Yenə xəta eləmisən, heç olmasa, dinmə də, ay Diniyev. Bir gün yalançının evi yanacaq, heç kəs inanmayacaq…

İşin maraqlı tərəfi bilirsiniz nədi?AFFA-nın Hakimlər Komitəsinin sədri Xaqani Məmmədov bir neçə gün öncə futbolinfo.az saytına müsahibəsində “Çempionatın başlamasına bir həftə qalıb,  dəhşətə gəlirəm. Böyük mübahisələrə səbəb olacaq yeniliklər var, lakin bugünə qədər klublardan heç biri bizə müraciət etməyib ki, gəlin bizə 2 saatlıq seminar keçin” deyə, şikayətlənmişdi.

Sən taleyin istehzasına bax ki, çempionatın startına qədər sədrin çağırışına yalnız bir klub reaksiya verdi – AZAL. Xaqani bəy də FİFA referisi Orxan Məmmədovu götürüb komandanın üzvlərinə hakimlik və oyun qaydalarından dərs keçməyə yollandı.  Həmin seminarla bağlı xəbərdə bunlar qeyd olunmuşdu: “Təxminən 2 saat ərzində Xaqani Məmmədov və onun rəhbərlik etdiyi nümayəndə heyəti oyun qaydalarında edilən yeniliklərdən söhbət açıb və əyani vasitələrlə, foto-video görüntülərlə şərh veriblər. AZAL-ın üzvləri görüşdə fəallıq göstərib və konkret epizodlar üzrə suallar veriblər.  Sonda onu da qeyd edək ki, baş məşqçi Tərlan Əhmədov və Xaqani Məmmədov belə görüşlərin hər ay planlaşdırılıb keçirilməsi üçün razılıga gəlib”.

Sonuncu cümləni oxuyan zaman gülməmək mümkün deyil. Daha Əhmədova seminar-zad lazım deyil. Cənab sədr, ona hər ay “volidol” yollayın, “volidol”.

AĞA

P.S. AÇ-2016-da həyata keçirilən bəzi oyun qaydaları milli  çempionatında da tətbiq ediləcək.  Dəyişikliklərdən biri də əlavə köməkçi hakimlərdən imtina edilməsidi. Lakin AFFA-nın Hakimlər Komitəsi bizimkilər əlavə 3-5 manat qazansın deyə, qapı arxasında dayananları ixtisara salmayıb. Çox nahaq! Zatən, əksəriyyəti növbədə yatan “dnivalni”dən fərqlənmirlər. Diniyev Rəhim Həsənovu, yan xətt hakimini xilas etmək üçün ora təyin edilmişdi, bunu bacarmadısa, əlavə hakimə nə ehtiyac var?