Müsahibə
“Qəbələ” azarkeşləri göz qorxudur: “İndidən etiraz etmək lazımdı”
“Qəbələ” – “Kəpəz” oyunu baxımlı …
“Qəbələ” – “Kəpəz” oyunu baxımlı alındı. Rəqiblərin oyun səviyyəsi azarkeşləri darıxmağa qoymadı, 90 dəqiqə həyəcan yaşadıq. Düzdü, nominal meydan sahiblərinin yorğunluğu, gəncəlilərin isə mövsümə tam hazır olmadığı sezilirdi. Bununla belə, taktiki mübarizə izləyə bildik.
“Qəbələ” azarkeşləri də oyuna rəng qata bildi. Kiçik bir qrupla Mərdəkanda görünən əyalət təmsilçisi azarkeşləri komandanı ruhlandırır, müxtəlif şüarlarla onlara dəstək olurdular. Amma hələ “bismillah” deməmiş səsləndirilən “istefa” şüarları sanki matçın ahənginə uyğun deyildi. Hələ 8-ci dəqiqədə – hakimin hər hansı xırda bir səhvi belə olmayan zaman fanatların AFFA Hakimlər Komitəsinin sədri Xaqani Məmmədovu istefaya səsləmələri maraq doğururdu. Bunun səbəbini “Red Black Army” fan-klubunun rəhbəri Elvin Qurbanovdan öyrəndik.
– Yan xətt hakimi bir epizodda ofsayd vermək istəsə də, fikrindən daşındı. Bir də “Qəbələ”nin futbolçusuna qarşı kobudluq olsa da, referi cərimə zərbəsi təyin etmədi. Biz də ona görə istefa şüarları səsləndirdik.
– Sırf oyundakı hakim səflərinə görə bu şüarları səsləndirdiniz?
– Bəli. Düzdü, elə də ciddi səhvlər olmayıb. Sadəcə, oturduğumuz yer meydançaya yaxın idi və hər şey də azarkeşlərimizin gözü önündə baş verirdi. Ona görə də etiraz etdik. Yəni “istefa” şüarlarının klubumuzun heç bir futbolçusuna və ya rəsmisinə aidiyyatı yoxdu.
– Mövsümün 1-ci oyununun ilk dəqiqələrindən bu cür şüarlar səsləndirməyiniz qəribə idi…
– Azarkeşlərin gözü qarşısında səhv qərar vermək… Ola bilər, hakim düz qərar verib. Mən epziodu dəqiq görməmişəm. Hansı ki, 2 epizod var – şübhəlidi. Bir ofsayd qərarı, digəri isə oyunçumuzun yerdə qaldığı epizoddu. Məhz bundan sonra uşaqlar “Xaqani çıx, get, AFFA-nı tərk et” şüarlarını səsləndirdi. Bütün şüarlarımız Xaqani Məmmədova qarşı olub. Yalnız 1 nəfər baş hakim Fariz Yusifova etiraz edib.
– Ötən mövsün bəzi matçlarda hakimlər “Qəbələ”nin oyunlarında səhvə yol vermişdi. Bunu o zamandan qalma aqressiya kimi qəbul etmək olarmı?
– Hakimlər çox oyunlarda “Qəbələ”yə qarşı yersiz qərarlar qəbul edib. Ola bilsin, bunun da təsiri olub. Rəşad Sadiqovun avroliqa oyunu öncəsi zədələnməsinə hakimin kobudluğa göz yumması səbəb oldu, Filip Ozobiçin istədiyi kimi çıxış etməsinə də referi imkan vermirdi. Allah var, ciddi hakim səhvləri olmadı. Yalnız xırda səhvlər idi ki, bunlar da uşaqların gözü qarşısında olurdu.
– Səncə, xırda hakim səhvlərinə görə birbaşa komitə sədrini istefaya çağırmaq bir az ağır qərar deyil?
– Ötən mövsüm də lap biabırçı səhvlər olmuşdu. İndidən xırda epizodlara etiraz etmək lazımdı ki, sonra böyük səhvlər buraxmasınlar. Məndə olan məlumata görə, Xaqani Məmmədov matçın hakim-inspektoru olub.
– Bu şüarları növbəti oyunlarda səhv etməmələri üçün göndərilmiş bir ismarıc saymaq olar?
– Ay sağ ol (gülür).
– Gözlərini qorxudursunuz?
– Azarkeş həmişə etirazını bildirməldi.
Məsələyə Xaqani Məmmədovun da reaksiyasını öyrəndik. O, bu hərəkəti anlamadığını bildirdi: “Səhvlər olur və buna görə hakimlər cəzasını alır. Bəlkə də bu şüarlar indidən hakimləri təzyiq altında saxlamağa hesablanmışdı”.
ELMAR ABDULLA-ZADƏ