Azərbaycanın Hollandiyadakı “səfir”i: “Yığmada asanlıqla oynayaram”

Son vaxtlarda Rusiyada yetişən futbolçularımız Emin Mahmudov və Ramil Şeydayevin millimizə qazandırılması müsbət haldı. AFFA-nın bu addımı alqışalayiqdi. Amma ölkə xaricində yetişən bir futbolçu da var ki, son günlər özündən söz etdirməyi bacarıb. Bu, oktyabrda 18 yaşı tamam olacaq Ziya Əzizovdu. Hollandiyanın 2-ci liqa təmsilçisi “Den Boş”un formasını geyinən yarımmüdafəçi bir neçə gün əvvəl karyerasının ilk rəsmi matçına çıxıb. O, debüt oyunundaca 1 qol, 2 məhsuldar ötürmə ilə yadda qalaraq, Jupiler Liqada turun simvolik yığmasına düşüb. Bu əlamətdar hadisədən sonda futbolinfo.az Hollandiyada yaşayan futbolçunu və onun atası Qalib Əliyevi taparaq danışdırıb:

– Futbola gəlişi necə olub? 
Q.Ə. – Oğlumun 4 yaşı olanda Hollandiyanın cənubunda yerləşən Oistervyik şəhərinin həvəskar “Taksandriya” klubuna yazılıb. Ziyanın 11 yaşı olanda skautlar gəlib, 800 uşağın içindən seçib, “Den Boş”a apardılar. O vaxtan da elə bu klubun şərəfini qoruyur. Hətta 3 il də əvəzedcilərdə kapitan kimi çıxış etdi. 

– Kayerasına nəzər saldıqda görürük ki, 17 yaşlılardan ibarət milli komandamıza da dəvət alıb və 1 cəmi oyunda forma geyinib. Belə az çıxış etməsinə səbəb nə olub?
Q.Ə. – Əvvəl bir neçə yoxlama matçında forma geyinmişdi. Yalnız AÇSO-da 1 görüşdə meydana çıxıb. Məşqdə zədələnmişdi.

– Bəs o zamandan bəri niyə heç bir yaş qrupu üzrə milliyə dəvət almayıb?
Q.Ə. – Dəvət gəlməyib. Yalnız Mirbağır (İsayev) müəllim dəvət etmişdi. Sonradan heç kim çağırmadı. Hər il dəvət gəlirdi, amma bu il gəlmədi. Onun Bakıya çağrılması ilə bağlı məktub aldıq. Avopada belə bir qanun var: 1 ay əvvəldən həm kluba, həm də oxuduğu məktəbə məktub gəlməlidi. Mən də həmişə deyirdim ki, bunu 1 həftə, 5 gün əvvəl göndərməyin. Heç olmasa 20 gün əvvəl deyin ki, bütün işləri yerbəyer edək. Bu uşaq da təhsil alır. Axırda kollecdən mənə dedilər ki, “biz bir də Azərbaycandan belə məktub alsaq, icazə verməyəcəyik”. Hətta AFFA-ya da yazdılar ki, bizə vaxtında xəbər verin. Daha sonra U-19-un baş məşqçisi Nazim Süleymanov dəvət göndərib, milliyə çağırmışdı. Həmin vaxt da Ziya ayağından zədəli idi. Mən də göndərib, dedim ki, “get oynaya bilməsən də məşq elə, uşaqlarla, məşqçilərlə tanış ol”. Süleymanov da bununla razılaşmamışdı, demişdi ki, “meydanda oyununu görüm”. Bu da sakit uşaqdı, çıxıb o vəziyyətdə oynayıb. Sonra da geri qayıdıb. Nazim müəllim də narazı qalıb ki, bu nə oyundu göstərir. 

– Bundan sonra dəvət almayıb?
Q.Ə. – Xeyr, artıq 1 ildi dəvət olunmur.

– Bir az da Ziyanın özü ilə danışaq. Karyeranda ilk rəsmi matça çıxdın və bu görüşdə 1 qol, 2 məhsuldar ötürmə ilə yadda qaldın. Həyəcan var idi?
– Xeyr, həyəcan yox idi. İstəyirdim ki, komandaya xeyrim dəysin və oyunumu göstərim. Bunu da bacardım. Bu yaşımda nəyi bacarıramsa, onu da etdim. 
Q.Ə. – Hətta baş məşqçisi Uilyam Vloyt Ziyaya deyib ki, “sənə daim şans verəcəm”. Hələ çempionat başlamamışdan əvvəl də yoxlama matçlarında Ziyanı meydana buraxmışdı. Türkiyənin “Kızılordu” və Belçikanın “Brügge” klublarına qarşı çıxış etmişdi. Hətta “Brügge” ilə 0:2 hesabı ilə geridə olduqları oyunda 2:2-lik bərabərliyi təmin edə bilmişdilər. Ziya bu oyunda məhsuldar ötürmə ilə yadda qalmışdı. PSV-2 ilə qarşılaşma da ilk turun oyunu idi. Həmin matçda da forma geyinə bildi.

– Həmin oyundan söz düşmüşkən, 0:4 hesabı ilə geri düşsələr də sonradan dönüş yaradıb, bərabərliyi təmin etmişdilər. Amma yekunda 4:5 hesabı ilə məğlub oldular. Yenilginin səbəbi nə idi?
Q.Ə. – “Den Boş” təxminən, 47 dəqiqə meydanda azlıqda qaldı. Elə 4 qolu da azlıqda qala-qala vurublar. 

– Ziya, ilk matçındakı oyundan sonra turun “simvolik yığma”sına düşdün. Bunu gözləyirdin?
– Düzü, gözləmirdim, xəbərim yox idi. Komanda yoldaşlarım göstərdi ki, həftənin “simvolik komanda”sına düşmüsən.

– Bu, karyeranın dönüş nöqtəsi ola bilər. Çünki Hollandiya çempionatı skautların daim nəzarətdə saxladığı turnirdi. Gələcək planlarında hansısa başqa ölkəyə üz tutmaq fikrin varmı?
Q.Ə. – Bu suala mən cavab verə bilərəm. Futbolla da məşğul olmuşam, təcrübəm var. Məşqçilərlə, Hollandiyanın məşhur oyunçuları ilə də çoxlu söhbətlər etmişəm. Ziya ilə təkcə Hollandiyada 3-4 klub maraqlanır. 

– Hansı klublar maraqlanır?
Q.Ə. – “Vittes”, PSV, “Ayaks” “Villem ll”, “Tvente”. 18 yaşı tamam olduqdan sonra seçim edə biləcək. Ümumiyyətlə, Ziya 13-14 yaşında Hollandiya millisində çıxış edib, sonra ona söylədim ki, “sən Azərbaycan yığmasında oynamalısan”. Bundan sonra ilk dəfə 15 yaşında Azərbaycana getdi, onda uşaq idi, dərk etmirdi. İndi buna deyiblər ki, 18 yaşına kimi seçim edib, ya Hollandiya, ya da Azərbaycan yığmasına üstünlük verə bilərsən. Amma biz əvvəlcədən qərarımızı verib, ölkəmizi seçmişik. 

– “Ayaks”, PSV kimi klubların maraq dairəsindədi. Özü daxilində bir seçim edibmi?
Q.Ə. – Bu komandalar həmişə çempionluq uğrunda yarışır. Güclü klublardı. “Vittes” bu dəqiqə çağrır ki, gəl. Özü hələ ki, oynamaq haqqında fikirləşir. Klub seçimi məsələsi ilə meneceri məşğul olsun.

– Özünü əsas milli komandamızda oynamağa hazır sayırsanmı?
Z.Ə. – Bəli, asanlıqla oynayaram (gülür).

– Sonuncu dəfə yığmamızın hansı matçını izləmisən?
Z.Ə. – 3 il əvvəl Rusiya ilə 1:1 oynadığımız görüşü izləmişəm. 

– Əvvələr də Hollandiya çempionatında azərbaycanlı futblçunun olmasından xəbərin var?
Z.Ə. – Bəli Vaqif Cavadov burada idi. Hətta onunla görüşmüşdük. Amma onu əsas matçlarda meydana buraxmırdılar. Yenə də qürurumuzdu. Həmçinin “Tvente”nin Avropa Liqasının pley-off matçında “Qarabağ”ı qəbul etdiyi görüşü də stadiondan izləmişdik.

ELMAR ABDULLA-ZADƏ