Premyer-liqa
Natamam “Qəbələ”
“Qəbələ” Premyer Liqaya hazır deyil. Bəli, “Qə…
“Qəbələ” Premyer Liqaya hazır deyil. Bəli, “Qəbələ”! Həmin komanda ki, Avropa Liqasında qrup mərhələsinin bir addımlığındadı, həmin komanda ki, qitə klublarını bir-bir dizə gətirir.
Paradoksdu, bilirəm. Amma həm də reallıqdı. Çünki Avropada oynayan “Qəbələ” ilə Azrbaycan klubları ilə mübarizə aparan kollektiv arasıda ciddi fərq var.
“İnter”lə dünənki 2-ci tur matçında buna bir daha əmin oldum. Meydanda əzmkar, lakin ustalıq səviyyəsinin aşağı olması səbəbindən istəyinə çata bilməyən, ağıllı müdafiə olunan rəqibə qarşı dişsiz olan bir komanda var idi.
“Qəbələ”də hər hansı eniş yoxdu, Roman Qriqorçukun da ağlı yerindədi. Ukraynalı mütəxəssisi çarəsiz edən əlindəki qandallardı. Premyer Liqada tətbiq olunan limit onun bacarığını, komandasının imkanlarını zəncirləyib. Səviyyəli yerli oyunçuların qıt olduğu bir vaxtda qolunun gücü əcnəbilər olan Qriqorçuk susuz çalaya düşmüş balıq kimidi.
Çempionat matçında 5 yerli futbolçu oynamalıdı. Belədə ukraynalı əsas silahlarından kimlərisə ehtiyatda oturtmağa məcburdu. Rəşad Sadiqovun zədəli olduğunu nəzərə alsaq, Qriqorçuk həmin beşliyi seçmək üçün çox əziyyət çəkir. Həm də qarşıda “Maribor”la pley-off oyunu olduğundan o, aparıcı əcnəbiləri qorumalıdı. “İnter”lə matçda bunu etmək istədi və vacib 2 xaldan məhrum oldu.
Rəhbərlik büdcəni azaldıb, yerli oyunçu transferinə vəsait ayırmayıb. Qriqorçuk akademiya uşaqlarından istifadə etməlidi. Onların səviyyəsi isə boşluqları doldurmaq üçün yetərli deyil. Asif Məmmədov, Ürfan Abbasov, Tellur Mütəllimov və başqaları çempionluğa oynayan komandanın “aktyor”ları deyil, Rəşad Eyyubov isə divizion səviyyəli oyunçudu. Dünənki matçda hücumçu əvəzetmədən oyuna qoşuldu, ön xətti iflic etdi, şəkildiyi sol cinah yarımmüdafiəsində də işləri korladı, iş o həddə çatdı ki, əsəbləşən Qriqorçuk onu dayaq oyunçusu mövqeyinə çəkdi. Burada isə Rəşad yalnız rəqiblərə mane olmaqla ümumi işə faydalı olmağa çalışdı, yaradıcı planda isə “Qəbələ”ni axsatdı. Hətta son əvəzləmə məhz Eyyubova uyğun yer tapılmasına görə edildi.
Sergey Zenyov da əvvəlki səviyyəsində deyil. Yəqin çempionatın hər iki matçında oynayan estona “Maribor”la görüşdə şans verilməyəcək. Rikardinyo 2 həftədi dincəlir, Sloveniya klubu ilə görüşdə əvəzedilməz olacaq. Vitali Vernidubsa yəqin ki, Rafael Silva – Voislav Stankoviç cütlüyünün kölgəsində qalacaq.
“İnter”lə oyun “Qəbələ”nin mövsümdəki ən pis matçı idi. Hətta Qriqorçukun arxasını çevirib baxmadığı, mövsümün boşa verilən ilk penaltisinə rəğmən, “qırmızı-qaralar” bu oyunu udmağa layiq deyildi. Sırf zəif yerli oyunçular amilinə görə komanda solğun təsir bağışladı. Bəlkə də təmsilçimiz oyunu izləyən sloveniyalıları aldada bildi, çünki avrokubokda fərqli heyət, bütün əcnəbilərin çıxış edəcəyi kollektiv daha güclü olacaq. Lakin Rəşad Eyyubov, Asif Məmmədov, Ürfan Abbasovla çempionluq xəyaldı.
“Maribor”la oyuna 5 gün qalıb. Həmin matçı da udulmuş saymaq olmaz. Düzdü, həmin görüşdə daha güclü “Qəbələ” görəcəyik, lakin işi təkcə futbolçuların boynuna da qoymaq olmaz. “Qəbələ” rəhbərliyi elə bugündən uzaq “Dalğa Arena”nın azarkeşlə doldurulması üçün fəaliyyətə başlamalıdı. Xüsusi nəqliyat vasitələri ayrılmalı, təbliğat işi görülməlidi ki, komanda 12-ci oyunçu ilə daha yaxşı oynasın.
CAVAD
- Premyer-liqa2024-04-14 20:55
“Qarabağ” “Sabah”a uduzdu
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı