Layihə
"Yad klub"dan doğmalaşmaya doğru
“İnter”. Ölkənin ən təzadlı klubu. Yarandığı …
“İnter”. Ölkənin ən təzadlı klubu. Yarandığı gündən fərqli simaları qəbul etmiş bu komanda “Xəzər Universiteti” adı altında yaşadığı dövrlərdə də azarkeş sarıdan korluq çəkirdi, “bankir” olduqdan sonra da.
“Beynəlxalq Bank”ın qanadı altına keçdikdən sonra komanda ölkə futbol ictimaiyyətinə yadlaşmağa başladı. Klub daxilində az qala ana dilinin rus dili olduğunu nəzərə alsaq, bu klubun niyə bu qədər yad hesab olunduğu aydın olar. “Azərbaycan dilini bilməsən də olar, ancaq rusca danışmalısan”, – bu idi “İnter”in başlıca şüarı.
Elə bunun nəticəsi idi ki, “bankirlər” avrokuboklarda belə, boş tribunalar qarşısında oynamağa məhkum idilər. “Ağ-göylər”in vaqon-vaqon əcnəbi futbolçulara qucaq açması da futbol ictimaiyyəti tərəfindən birmənalı qarşılanmırdı.
Belə olan halda azarkeş kimi dəstəkləməli idi?! Yəni, “İnter”in fanat sarıdan korluq çəkməsinin obyektiv və böyük ehtimalla, başlıca səbəbi məhz özlərini əcnəbiləşdirmələri idi. Bolqar, polyak, nigeriyalıya “vur-vur”, qaç-qaç” deyəndə nə dəyişirdi ki? Futbolçu azarkeşi başa düşmür, azarkeş də futbolçunu. Bu, bir növ lalla karın söhbətinə bənzəyir.
Günümüzdə tribunalara azarkeş toplamaq həqiqətən müşkül məsələdi. Hətta qitəmiqyaslı turnirlərdə xarüqələr yaradan təmsilçilərimiz ölkə çempionatında bu sarıdan korluq çəkirlər. Ancaq desək ki, mümkünsüzdü, həqiqəti əks etdirməz. Sadəcə, istiqaməti düzgün götürmək, bu sahədə hansı yöndə iş görülməsini təhlil etmək gərəkdi.
Hansısa kommersiya obyekti açmazdan əvvəl ətraf rayonu təhlil etmək mütləqdi. Çünki təklif edəcəyin məhsul ilk növbədə yaxın ərazidə yaşayanların tələbatına uyğun olmalıdı. Məsələn, qızıl satışı mağazasını birmərtəbəli həyət evlərinin əhatəsində olan bir kasıb məhəlləsində açsanız, bunun axırı əvvəlcədən məlumdu – fiasko!
Qayıdaq “İnter”ə. Klub rəhbərliyinə məlum dəyişiklərdən sonra “ağ-göylər”in siması nəzərəçarpacaq dərəcədə dəyişdi. Komandada çalışanların böyük əksəriyyəti yerli insanlar oldu. Bu, komandada da öz əksini tapdı. Bu gün meydana çıxanların böyük əksəriyyəti azərbaycanlılardı. Deməli, fanat ordusunun güclənməsi yolunda ilk addım atılıb. Özü də əsaslı addım. İndi fan-klublar “kimə gəlib baxaq e, hamısı legionerdi” cavabları ilə rastlaşmayacaqlar. “İnter”in Rauf Əliyev, Səlahət Ağayev, Ruslan Abışov kimi liderləri var. Onların yanında klubun bir sıra yetirməsi oynayır, təcrübə toplayır və yaxın gələcəkdə parlayacaqlarına böyük ümid verirlər. Bunlar arasında Sərtan Taşkın, Mirsahib Abbasov, Fuad Bayramov artıq adlarından söz etdirə biliblər.
Komandanın növbəti addımı azarkeşlərlə sıx əlaqələrin yaradılmasıdı. Bu yöndə xeyli işlər görüləsidi ki, bu barədə növbəti yazıda bəhs edəcəyik. Hələliksə futbolsevərləri turnir cədvəlinə diqqət yetirməyə çağırırıq: ilk turda ölkənin ən güclü komandaları ilə üz-üzə gələn “bankirlər” hazırda turnir cədvəlinin birinci pilləsini bölürlər.
CAVAD
- Ölkə futbolu2024-04-12 08:00
Mikayıl Cabbarovun kadrları azərbaycanlılara qarşı
- Digər idman növləri2024-04-12 00:29
“Anadolu Efes” növbəti mərhələdə
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Milli komanda2024-04-12 18:00
Millinin Gürcüstanla oyunlar üçün heyəti açıqlandı