“İnter” üçün pul xərcləmədən fanat ordusu qazanmaq imkanı

“Futbol azarkeşlər üçün oynanılır” – döyülmüş, bəlkə də kif basmış ifadədi. Ancaq qocalmaq bilmir bu deyim. Tribunalara nəzər saldıqda, məntiq fontan vurur və dilə gəlir: “əhalinin sosial rifahı stadiona gələn tamaşaçı sayında öz əksini tapır”.

Paytaxtda məskunlaşan çoxsaylı klublar onsuz da kasad fanat ordusunu bir neçə yerə parçalayır. Belədə ortaya sual çıxır: nəyin hesabına tamaşaçı sayını artırmaq mümkündü?

Bu yöndə dünya praktikasına boylanmaq kökündən yanlışlıq olardı. Çünki Azərbaycan cəmiyyəti spesifik, özünəməxsus baxış bucağına sahib bir varlıqdı. Hələ sovetlər dönəmində “Neftçi”nin ev oyunlarına qiymətli uduşlar qoyulurdu. Daha doğrusu, avtomobillər. Bu da Respublika stadionunun dolmasına ciddi təkan verirdi. 

Müstəqillik qazandıqdan sonra analoji praktika həyata keçirilsə də, tribunalara toplaşanlar tezliklə anladılar ki, onlar heç vaxt evlərinə avtomobillə yollanmayacaqlar. Niyəsini bu cür lotereyaları təşkil edən klublar bilir…

Bu gün də hansısa klub uduşa 10-15 minlik avtomobil qoysa, hər qapısından da “Quran” assa və and-aman eləsə ki, uduş təmiz keçirilir, ölkədəki söz sahiblərinin imici elə bir vəziyyətdədi ki, əhali onlara inanmayacaq. Bəs, alternativ varmı?

Bu sualın cavabını axtarmazdan öncə diqqətimizi çəkən bir məqam barədə yazmaq istəyərdik. “İnter” rəsmi saytı vasitəsi ilə son 100 gündə görülən işlərin hesabatını ortaya qoyub. Bu hesabatda da diqqət çəkən məqamlardan biri(ncisi) klubun azarkeşlər arasında həvəsləndirici lotereya təşkil etmək planıdı. Nəzərə alsaq ki, “İnter Arena” 5300 tamaşaçı tutumuna malikdi, biletlərin qiyməti isə 1 manat təşkil edir, 10-15 minlik avtomobilin uduşa çıxarılacağı real deyil. Üstəlik, yuxarıda qeyd etdiyimiz “insan inamı” faktorunu da unutmaq olmaz. 

İndi də qayıdaq alternativ variant məsələsinə. Stadiona toplaşanlar kimlərdi? 15-30 yaş aralığında olan futbolsevərlər. Başqa sözlə, gənc nəsil. Gənclər əyləncəyə meylli olur – bunu deməklə də Amerikanı yenidən kəşf etmədik. Paytaxtda çoxsaylı əyləncə mərkəzləri mövcuddu. Bu mərkəzlərlə işbirliyi qurmaqla “İnter” “bir gülləylə iki dovşan vura bilər”. 

Konkret misal göstərək ki, praktiki yol üzə çıxsın. Klubla “X” Əyləncə Mərkəzi arasında müqavilə imzalanır. Anlaşmaya əsasən, “İnter”in hər ev oyununda 5 azarkeş 100 manatlıq uduş kuponuna sahib olur və bu məbləğə həmin mərkəzdə istədiyi əyləncədən yararlana bilər. Qarşılığında klub həmin Əyləncə Mərkəzinin bannerini stadionunda yerləşdirir.

Analoji misallar sadalamaq niyyətindən uzağıq. Başlıca məqsəd bunu çatdırmaqdı ki, de-fakto, pul xərcləmədən tamaşaçılar üçün alternativ əyləncəyə yol açmaq və bununla da fanat ordusunu genişləndirmək mümkündü. Əlbəttə ki, bu kampaniyanın təbliğinə də xüsusi önəm vermək gərəkdi. Ancaq təbliğatı tək “bankirlər” aparmayacaq.

Məsələ burasındadı ki, bu xəbər olduqca qısa müddətdə yayılacaq. Pulsuz reklamı stadiona gələn azarkeşlər özləri edəcək. Şəbəkə marketinqi ilə bircə gün məşğul olan yoldaşlar bunun necə baş verəcəyini yaxşı bilir. Qalır klubun deyilənləri dürüst şəkildə həyata keçirməsi. Yəni, əmioğlu, bibinəvəsi və s. kimi yoldaşlar qalib olsalar, heç bu layihəyə start verməyə ehtiyac yoxdu. Konkret kluba heç bir aidiyyatı olmayan insanlar lotereyanın qalibi olmalıdılar ki, dediyimiz şəbəkə xətti müsbət effektini versin.

İndi qalır gözləmək. Bu plan həyata keçdikdən sonra isə tribunalarda artım sezilməyə başlayacaq. Əlbəttə, addım-addım. Ancaq “Moskva da dərhal tikilməmişdi”…

CEYHUN ƏLİYEV