Ölkə futbolu
“Cıdır düzü”ndə “Qarabağ”-şou
0:1-lik məğlubiyyət. Avrokubokdakı son qələbənin üstü…
0:1-lik məğlubiyyət. Avrokubokdakı son qələbənin üstündən 4 oyun keçib. Rəqib vaxtilə UEFA Kubokunu başı üzərinə qaldırmış komandadı. Bu, İsveç “Höteborq”uyla oyunöncəsi “Qarabağ”ın əleyhinə işləyən faktorlar idi.
Tofiq Bəhramov adına Respublika stadionunu gördükdə isə, dərdimizin üstünə dərd gəldi. Ot örtüyü həftələrlə davam edən cıdır yarışmasından sonrakı meydanı xatırladırdı. Bu cür meydanda kombinasiyalı oyun qurmaq, hücum etmək, dəqiq ötürmə vermək əsl başağrısıdı. De-fakto Azərbaycana məxsus stadion Azərbaycan klubuna oyun başlamamış badalaq vurmuşdu…
Start heyəti və ehtiyat oyunçular skamyasında qalan oyunçuların siyahısına baxdıqda da ürəkaçan mənzərəni görmədik: Bədavi Hüseynovun yoxluğu müdafiənin mərkəzindən ciddi narahatlığa əsas verirdi. Elə start dəqiqələri də bu həyəcanın əbəs olmadığını isbatladı. Elvin Yunuszadənin mövqe səhvləri komanda yoldaşlarının hücum qurmasına belə, mane olurdu. İstər-istəməz hamının bir gözü Yunuszadədə idi…
Ancaq dəqiqələr ötdükcə “Qarabağ”ın meydanın hər qarışındakı hegemonluğu özünü göstərməyə başladı. Qol yetişirdi və artıq 19-cu dəqiqədə Respublika stadionu partladı. Özü də Azərbaycan futbolunun ağrılı yeri – standart vəziyyətdən sonra: Rişard Almeydanın künc zərbəsindən yerlə ötürdüyü topu əvvəlcə Qara Qarayev buraxdı, ardınca Dani Kintana üstündən tullandı və nəhayət, Rəşad Sadıqov ayağının içiylə uzaq küncə göndərdi. Kapitanın zərbəsi qüvvətli alınmadı və bunun səbəbi yenə də meydançanın faciəvi durumda olması idi. Top sanki minalanmış zonadan keçərək, Sadıqovun önünə gəlmişdi. Lakin məşhur mahnıda olduğu kimi “qoca çinar bilirdi” – 1:0!
Qoldan sonra da Azərbaycan çempionunun hücumları göz oxşayırdı. “Höteborq”u düzgün təhlil edən Qurbanov yetirmələrinə bütün ötürmələri müdafiəçilərin arxasına ünvanlamağı tapşırmışdı. Ucaboy skandinaviyalılar bu cür ötürmələrdən sonra seyrci rolunu alırdı. Belə epizodlardan birində Reynaldo kəsmə ötürməylə Dani Kintananı Con Alvboqe ilə üz-üzə çıxardı. İspaniyalı yarımmüdafiəçi iti bucaq altında idi və qapı torunu silkələmək şansı yüksək olsa da, daha ağıllı gedişə əl etdi: əks tərəfdən qapıya şığıyan Muaremə ötürmə etməklə. Qalanı isə asan idi: makedoniyalı Muarem komandamızı ümumi hesabda önə çıxardı.
26 dəqiqəyə vurulan 2 qol istənilən komandanı hövsələdən çıxara bilər, amma doyunca şimal havası udmuş “Höteborq” bu tərs şillələrdən şoka düşmədi. Eyni oyun üslubunu davam etdirən qonaqlar ilk oyundakı qolun ab-havası altında idilər. Onlar gözəl başa düşürdülər ki, istənilən an çempionumuzu məyus etməklə, bütün arzularımızı puç edə bilərlər.
Lakin fasilədən sonra gələn qol da “Höteborq”un qapısının payına düşdü. Muarem elə bir ötürmə etdi ki, bunu ancaq qədim nağıllardakı ifadəyə bənzətmək olar: “yemə-içmə, bu ötürmənin gözəlliyinə bax”. Bununla da Muarem ilk yarıda aldığı hədiyyənin xəcalətindən çıxmış oldu. Çünki ötürmə Dani Kintanaya verilmişdi. “99” da əlinə düşən fürsətdən maksimum faydalanaraq, 3-cü dəfə qonaqları meydanın mərkəzinə dəvət etdi.
Qalan 40 dəqiqə ərzində “Höteborq” minimum 2 dəfə ağdamlıların qapısına yol tapmalı idi, lakin nəzərə alsaq ki, meydanda yalnız bir komanda var idi, isveçlilərin fatihəsi çoxdan verilmişdi…
Azərbaycan çempionu sonadək təşəbbüsü əldən vermədi və layiq olduğu parlaq qələbəylə Avropa Liqasının qrupuna vəsiqə əldə etdi. Ardıcıl 3-cü dəfə bu uğura imza atan “süvarilər”in sıralarında bir nəfər çatmırdı. O, bu qarşılaşmanı xəstəxanadan izləyirdi. Amma doğma komandası Asif Əsgərov üçün hər şey etdi: 3-cü dəfə Avroliqanın qrupuna 3 qolla adlamaq klubun baş menecerinə ən gözəl məlhəm oldu.
Nəhayət, “Qarabağ” gözlənilən və arzulanan oyunu nümayiş etdirdi! Nəhayət, “Qarabağ” ağırlığını ortaya qoydu! Nəhayət, “Qarabağ” coşdu və tribunaları coşdurdu! Bu qələbə ölkəmizdə on minlərlə evə əsl bayram əhval-ruhiyyəsi gətirdi. Bayramınız mübarək!
CEYHUN ƏLİYEV
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Premyer-liqa2024-04-30 09:30
“Yalnız birlikdə olaraq uğurlar qazana bilərik” – Ozobiç
- I Liqa2024-04-30 14:45
“Araz Saatlı”nın məşqçisinə 2 oyunluq cəza