3 turun qənaəti: “Böyük beşlik” bir addım öndədi

Premyer Liqa ilk antraktını götürdü. Sentyabrın 10-dən “atəşkəs” elan edən elita təmsilçiləri bu boşluğu alternativ çıxış yolları aramaqla, aradan qaldırmağa çalışır. Bəs, çempionatın startı 8 komanda üçün necə alındı? Axı, debütdən çox şey asılıdı.

3 turdan sonra çempionatın potensial lideri “Qəbələ”di. Komanda ilk oyunda “Kəpəz”dən 3 xal alsa da, növbəti tur “İnter”dən üstün futbol sərgiləməsinə rəğmən, bunu tablodakı nəticədə əks etdirə bilmədi. Roman Qriqorçukun komandasının şən futbol oynaması nə qədər ümidverici olsa da, ehtiyat oyunçular skamyasının kasadlığı, bir o qədər düşündürücüdü. Yerli futbolçuların azlığını çempionatın gedişatında özünü qabarıq şəkildə büruzə verəcək. Ruslan Qurbanvun transferi isə… Zaman bu futbolçunun faydası barədə yekun fikri formalaşdıracaq.

“Qarabağ” startda büdrəsə də, bunun təsadüf olduğunu növbəti 2 qarşılaşmada sübuta yetirdi. Qurban Qurbanov yenə də 2 bərabərsəviyyəli heyəti qorumaqla 2 "cəbhə”də döyüşə hazır kollektiv formalaşdırıb. “Qarabağ”ın çempionluğa yenə də əsas namizəd olacağını ilk 3 turdan sonra əminliklə söyləmək olar.

“Zirə” də “böyük qardaşı”nın izi ilə yolunu davam edir. İlk turda “Sumqayıt”dan alınan məğlubiyyətdən sonra “qəsəbəlilər” “Neftçi”ni səfərdə, AZAL-ı isə evdə məğlubiyyətə uğratdılar. Ötən mövsüm Elvin Məmmədov, bu il isə Cavid Tağıyevi “Kəpəz”ə verməkdən imtina edib, “Zirə”yə isə “hə” deyən Ağdam təmsilçisi gümüş medalçının sıralarını xeyli gücləndirdi. Ancaq bunu da qeyd edək ki, “qəsəbəlilər” seleksiya işində öncüllər sırasındadı. Ötən il də, cari mövsümdə də Adil Şükürovun rəhbərlik etdiyi komandaya Azərbaycan ölçüləri ilə göz oxşayan futbolçular cəlb olunur.

“İnter” cari mövsüm məğlubiyyət acısı dadmayan yeganə komandadı. 3-cü turda “Kəpəz”lə heç-heçənin nəticə olaraq “bankirlər”in passivinə yazmaq olar. Ancaq nəzərə alsaq ki, son dəqiqəyədək gəncəlilər hesabda öndə idilər, Zaur Svanadzenin bu xala sevinməli olduğunu bildirməliyik. “İnter”in qızıl medallara əsas namizəd – “Qarabağ” və “Qəbələ”ylə oyunlardan 4 xal toplaması isə “bankirlər”in avrokubok zonasına düşmək iddiasından xəbər verir.

Turnir cədvəlinin aşağıdakı 4 komandasından müsbət sözlərə yalnız “Kəpəz”i layiq görmək olar. Ya zəlzələdən, ya vəlvələdən xal ehtiyatı olduqca kasad olan “sarı-göylər”in oyun baxımından problemi yoxdu. Sadəcə, bir xatırlatma yerinə düşür: ötən mövsüm də “Kəpəz” ilk dövrədə uğursuz nəticələrə imza atmışdı.

“Neftçi”, “Sumqayıt” və AZAL-ın isə ilk 3 turdan sonra turnir cədvəlinin alt hissələrində qərarlaşacaqlarının siqnalını əvvəlcədən vermək olardı. “Sumqayıt” və AZAL-ın büdcəsi daha yüksək yerlər barədə düşünməyə əsas vermirdisə, “ağ-qaralar”ın transfer siyasətindəki uğursuzluq analoji fikrin formalaşmasını şərtləndirirdi. Hər halda, bu heyətin hansısa əlahiddə uğura imza atacağı inandırıcı görünmür. Əlbəttə, ilk baxışdan yaranan fikir yanlış ola bilər. Lakin biz də ilk süni fasiləyə çıxarkən bu qiymətləndirməni vermişik.

Yekunlaşdıraq. “Qarabağ” əvvəlkitək çempionluğa 1 nömrəli namizəddi. Ağdam təmsilçisinə “əlcək atmaq” şansı olan yeganə klub “Qəbələ”di. Medallar uğrunda mübarizə aparacaq komandalar sırasında “Zirə”, “İnter” və “Kəpəz”i göstərə bilərik. Adlarını sadaladığımız “Böyük beşlik” də avrokubok zonasına şanslı görünən komandalar sırasındadı. Hərçənd, ölkə kuboku vasitəsi ilə qitəmiqyaslı yarışlara vəsiqə əldə etmək üçün “Neftçi”nin də adını bu siyahıya şərti olaraq əlavə edə bilərik.

CEYHUN ƏLİYEV