Ölkə futbolu
Yamaq Premyer Liqası
“Köhnə hamam, köhnə tas”. PFL yenə təqvimi b…
“Köhnə hamam, köhnə tas”. PFL yenə təqvimi baş-ayaq elədi. 8 komandalı çempionat ola, arxada 3 tur qala, bu qədər dəyişiklik baş tuta…
Düşünmək olardı ki, çempionatın tam təqvimi açıqlandıqdan sonra çempionata “barmaq” olunmayacaq. Ancaq sən saydığını say…
“Qarabağ” – AZAL matçının tarixi dəyişdi. Bunu başa düşdük. Ölkə çempionunun avrokuboklarla əlaqədar qarşılaşmanın 1 gün öncəyə çəkilməsi üçün müraciəti təbiidi. Bu, PFL-in Əsasnaməsində də var. Bəs, oyunun “AZAL Arena”dan “Əlincə”yə daşınması?
Bəli, “təyyarəçilər”in meydanı süni örtüklüdü, bu da Ağdam təmsilçisinin Avropa Liqasının ilk turundakı oyununa hazırlıq prosesinə mane ola bilər. Yenə də mənəvi dəyərlər. Maddi dəyərlər isə ənənəvi hala çevrilərək, arxa plana çəkilir.
“Qanun şalban kimi bir şeydi, üstündən tullanmaq olmur, yanından keçmək olur”, – mərhum sənətkarımız Yaşar Nurinin “Göz həkimi” tamaşasındakı bu sözləri necə də yerinə düşür. Qaydalar kim üçün yazılıb? Yəni, Azərbaycandan başqa heç bir ölkə klubları avrokubokların qrupunda mübarizə aparmır?
“Təqvim barmağı” ilə əlaqədar daha bir yerdəyişmə. Söhbət oktyabrın 2-də “İnter”lə “Zirə” arasında baş tutmalı olan matçdan gedir. U-21 yığmamızın təlim-məşq toplanışı ilə əlaqədar, sözügedən görüş də daha erkən tarixə – 30 sentyabra çəkilib.
Yenə də sual: məgər U-21 yığmasının təqvimi, təlim-məşq üçün toplanacağı tarix əvvəlcədən müəyyənləşməmişdi? Sualın cavabı bəlli, hadisələr isə əvvəlki axarı ilə davam edir…
Bu halların yaşanmaması üçün çıxış yolu varmı? Əlbəttə ki, var, özü də olduqca sadə yol. Milli komandalara rəsmi oyuna 72 saat qalmış futbolçuları dəvət etməyə icazə verilsin. Milli komandalara yoxlama görüşünə 48 saat qalmış futbolçuları sıralarına qatmağa icazə verilsin. Milli komandaların təqvimi əvvəlcədən bəlli olur. Belədə, çempionatın təqvimini qurmaq da asanlaşır. Onsuz da ölkə xaricində çıxış edən futbolçularımıza FİFA-nın qaydalarına uyğun olaraq, yığma matçlarına 72 və 48 saatdan çox icazə verən olmayacaq. Bəs, nəyə görə Azərbaycan çempionatını hörmətdən salıb, bu qərarı verirsiniz? Onsuz da nüfuzu olmayan çempionata onu təşkil edən qurumun (söhbət həm AFFA, həm də PFL-dən gedir) endirdiyi zərbəyə heç bir ad vermək olmur.
Klubların çempionat oyunlarına “barmaq” etməsinin səbəbkarı isə PFL-di. Yumruq yerə vurulub, reqlamentə riayət edilməsini tələb etdikdən sonra, heç bir klub ağlının ucundan da bu cür addımları keçirməyəcək. Bir dəfə sərt üzünü göstərməlisən ki, təşkil etdiyin çempionat 1001 cildə düşməsin. Düşünün, cənablar, düşünün….
AĞA