Hay və vay

Hayla gələn vayla gedər. Sıxışdıraraq, təzyiq edərək, badalaq vuraraq gəlmişdilər, elə də gedəcəkdilər. Elə yeni gələnlər də elə olacaq. Deməli, "Neftçi" həmişə belə olacaq…

"Neftçi"nin indiki rəhbərliyinin 1 il, ilyarım əvvəlki günlərini yadınıza salın. Öncə Sadıq Sadıqovun sağ əli Tahir Süleymanovu zərərsizləşdirdilər, sonra ona müavin gətirdilər, ardınca prezidenti şura üzvü edib, Çingiz Abdullayevi ona sədr təyin etdilər, sonra isə birdəfəlik getməsindən başqa yol qoymadılar. O isə Ttahir bəy kimi şərəflə gedə bilmədi, sin günəcən ən kiçik ümiddən astana qaldı, qolları yorulanda əlini buraxdı.

İndi nə baş verir? Adlar fərqli, ssenari eynidi.

Bəs, nədir "Neftçi"ni daim intriqa mərkəzi, qalmaqallar meydanı edən? Pul! Dövlət büdcəsindən ayrılan sərhədsiz büdcə! Onu mənimsəmək, yekə tikəni götürmək həvəsi!

"Neftçi" həmişə yem yeri sayılıb. Bu klubda bütün dövrlərdə oliqarxlar, dövlətə, əsas sponsora bağlı adamlar söz sahibi olub, pul onların adına görə ayrılıb, büdcədən çıxıb, müəyyən qismi kluba, əsas hissəsi kimlərəsə çatıb. Və bu pulu "düzgün idarə edənlər" daha uzun müddət iş başında olub.

"Neftçi" yenə dəyişir. Pulu məqsədyönlü xərcləməklə yanaşı, nəticə də verə biləcək yeni rəhbərlik axtarılır. Çingiz Abdullayevin şurası bacarmadı, bu səbəbdən islahatlar qaçılmazdı.

"Neftçi" elə klubdu ki, orada eyni vaxtda 5-6 cəbhənin marağı olur, hər otaq, hər post uğrunda döyüşlər gedir, hər otaqdan xəyanətkar çıxa, hər otaqda qiyam ola bilər. Bu döyüşdə şahları da qurban verirlər, piyadaları da.

Aydın İbrahimovun vaxtndakı "Neftçi"ni yada salın: avrokuboka bir heyət hazırlaşdı, oyuna digər heyət çıxdı. Və ya Əkbər Hacıyevin Hans-Yürgen Gede vasitəsi ilə viran qoyduğu komanda. Birmi, ikimi, üçmü?

Hayla gələn vayla gedər. Çingiz Abdullayev nəvaxtsa bu ilyarımda gördükləri barəsində bir əsər yazacaq. Və bu kitab daha maraqlı olacaq. Eşitdikləri, oxuduqları olmayacaq, başına gələnləri qələmə alacaq. Qələmə ala bildiklərini açıq, üstündən keçməli olduqlarını eyhamla yazacaq.