Araz Abdullayev: "Belə davam etsək…"

Azərabycan Premyer Liqasının 5-ci turu çərçivəsində baş tutan "İnter" – "Neftçi" (2:1) matından sonra qonaqların kapitanı Araz Abdullayev jurnalistlərin suallarını cavablandırıb. Futbolinfo.az sizi həmin müsahibə ilə tanış edir: 

– Araz, bu məğlubiyyəti 8:0-la müqayisə etmək olar?
– Bir dəqiqə. Qardaşımsan, normal suallar verin də. Oyun haqqında suallar verin…
 
– 8:0-dan sonra bu oyuna hazırlaşmaq necə idi?
– Düzdü, çətin idi. Amma heyəti yenidən toparlaya bildik. Bildiyiniz kimi, komandamızda da bir sıra dəyişikliklər oldu. Hiss edirəm ki, bu komanda daha yaxşı təsir bağışlaya bilər. "İnter”ə qarşı oyunumuz pis alınmadı. Bundan əvvəlki oyunlarda komanda şəklində çox dağınıq oynayırdıq. Bu gün göstərdik ki, qələbə qazana bilərik. Məğlub olduq. Amma gələcək oyunlara ümid var. Fikirləşirəm ki, belə davam etsək, növbəti turlarda lazımlı nəticəni qazana bilərik. 
 
– Komandanın dağınıq olmasını dedin. Səncə, Vəli Qasımov komandanı yığa bilmirdi?
– Belə deyək, komanda uğursuzluq yaşayır və "qara zolaq”dadır. Amma bu dəfə əvvəlki matçlardan daha yaxşı oynadıq. 
 
– Ancaq turnir cədvəlində aşağı pillələrə yuvarlanırsız…
– Xalları boş-boşuna xərcləməməliyik. Bacardığımız qədər xallar toplamalıyıq. Amma futbolda belə nəticələr olur. Kim gözləyərdi ki, 5 dəqiqəyə 2 qol buraxaq? 
 
– Sənin imkanların çox genişdi, amma son ötürməni verməkdə çətinlik çəkirsən…
– Qətiyyən belə düşünmürəm. Mən sırf olaraq komanda üçün çalışıram. Fikrim kollektivə kömək etməkdi.
 
– 1:0-dan sonra nə oldu ki, iki qol buraxdınız?
– Biz də məğlub olmaq istəmirdik. Ehtiyat oyunçular skamyamız da o qədər geniş deyil. Ümid edirəm ki, gələcəkdə yaxşı olacaq.
 
– Komandanın fiziki hazırlıq baxımından əziyyət çəkdiyini düşünmürsən?
– Çempionata yaxşı başlamasaq da, toparlanmağa çalışırıq. Düşünmürəm ki, bizim fiziki durumumuz zəifdi. Kapitan olaraq komandanın potensialına güvənirəm. Bilirəm ki, gələcək oyunlarda potensialımızı daha da yüksəldəcəyik.