Əfqan Talıbov: "Premyer Liqada çıxış etmək fikrindəyik"

Dünən Azərbaycan çempionatının 1-ci divizionunda 3-cü tura start verildi. Günün maraqla gözlənilən qarşılaşmalarından biri “Qaradağ Lökbatan”la “Səbail” arasında baş turdu. Matç meydan sahiblərinin 4:2 hesablı qələbəsi ilə yekunlaşdı. Qarşılaşmadan sonra lökbatanlıların baş məşqçisi Əfqan Talıbov futbolinfo.az saytına müsahibə verib:

– Bu çempionatın özünəməxsus marağı və oyunları var. Bunu hamı deyir. Əvvəlki turlarda “Səbail”in çətin rəqiblərlə qarşılaşmalarda 6 xal götürməyi çox şeydən xəbər verirdi. Amma bizim komanda şəklində daha tez formalaşmağımız sözünü dedi. Düzdü, futbolçuların xətlərarası əlaqəsi, müdafiədən hücuma tez çıxmaqla bağlı problemimiz var.20 günün komandasıdı. 4:0-dan sonra müdafiə xəttimizdə arxayınlıq yarandı və 2 qol buraxdıq. Bu da üzərində çalışmalı olduğumuz məsələlərdən biridi. 

– Cari mövsümdə hədəfiniz nədi?
– “Qaradağ Lökbatan” yaranandan bəri liderlər qrupunda olub. Premyer Liqada oynamaq üçün lazım olan bütün lisenziya şərtlərini də yerinə yetirməyə çalışacağıq. Akademiyamız da var, uşaqlarla bağlı olan bütn problemləri həll edib, gələn il Premyer Liqada çıxış etmək fikrindəyik. 

– İndiki vəziyyətdə komandanızda Premyer Liqanın tələblərini qarşılamayan nə var?
– Bizə deyilib ki, idman prinsiplərinə əsasən, ilk 3 pillədə yer almalıyıq. 

– Komandanızın büdcəsi Premyer Liqa üçün yetərlidi?
– “Qarabağ” və “Qəbələ”ni nəzərə almasaq, AZAL, “Sumqayıt” kimi komandaların büdcəsi ilə ayaqlaşırıq. 

– Premyer Liqaya vəsiqə qazanılacağı təqdirdə büdcə artırılacaqmı?
– Bəli. 

– 8 komandalı çempionat ürəyinizcədi?
– Xeyr. Bu, yaxşı hal deyil. Amma nəzərə almaq lazımdı ki, maliyyə dayaqları zəifləyib. Bir çox futbol ənənəsi olan bölgələr kənarda qalıb. 16 komandalı çempionatda rahat çıxış edə bilərik və bu komandalarda 10-15 yerli oyunçunun olması, futbolçularmızın gələcək inkişafına təkan verəcək. 

– Bundan əvvəlki illərdə divizionda tətbiq edilə limitin sizcə, faydası oldu?
– Belə fikir formalaşdı ki, bu, birdən-birə 1994-cü il təvəllüdlü uşaqların qarşsının alınmasına səbəb ola bilər. Heç olmasa, 3 ya 4 nəfəri saxlayaq. Birinci dövrədə bunun özünü doğruldub-doğrultmayacağı görünəcək. İndi görürsünüz ki, divizion Premyer Liqadan maraqlıdı. Artıq maraq getdikcə artır. Limitə görə əvəzedicilər, U-19 komandaları var. Düzdü, bizim əvəzedicimiz yoxdu, amma 19 yaşlılardan ibarət komandamız var. Ona görə də 1999-cu il təvəllüdlü uşaqları komandamıza cəlb edib, gələcək üçün  hazırlayırıq. 

– Onda ötən mövsümlərdə verilən qərarlar doğru deyildi?
– Doğru qərar idi. Mən 3 gənc futbolçu təklif edirdim. Bu, futbolçuların 17, 19 və 21 yaşlılardan ibarət milliyə düşməsi üçün hesablansın. Birdən-birə 8+3, 6+5 özünü doğrultmadı. Çünki gənc oyunçular özlərini rahat hiss edirdilər, bilirdilər ki, daimi əsas heyətdə yer alacaqlar.

ELMAR ABDULLA-ZADƏ