Roman Qriqorçuk: "Fiziki gücləri gözə girir"

Avropa Liqasının qrup mərhələsinin 2-ci turu çərçivəsində Almaniya "Maynts"ını qəbul edəcək "Qəbələ"nin baş məşqçisi Roman Qriqorçuk oyundan 1 gün əvvəl mətbuat konfransı keçirib. Futbolinfo.az xəbər verir ki, ukraynalı mütəxəssis komandasının şanssız olmadığını bildirib.

– Oyundan öncə hansı problemlər sizi daha çox qayğılandırır?
– Deməzdim belə ciddi problemlər var. Müəyyən mənfi anlar var. İki futbolçumuz bizə kömək edə bilməyəcək. Söhbət Nika Kvekveskiri və Teo Uiksdən gedir. Ancaq qarşısına ciddi hədəflər qoyan komanda üçün bu, problem ola bilməz. sabahkı oyuna tam məsuliyyətlə yanaşırıq. Şanslarımızdan da istifadə etməyə çalışacağıq.

– Meydanın mərkəzindəki başağrısından danışdınız. Bu boşluqları necə dolduracaqsınız? Franyiç işinizə yarayacaqmı?
– Alternativ variantlar var. Ancaq Franyiç mərkəz yarımmüdafiəçisi deyil. O, cinah oyunçusudu. İşləri isə yaxşı gedir.

– "Maynts" digər rəqiblərinizdən daha elitar çempionatın təmsilçisi, həm də Avropa Liqasında sonadək mübarizə aparan ölkədən gəlir. Bu fikirlərlə razısınız?
– Biz hələ kimisə kiminləsə müqayisə edə bilmərik. RƏqiblərimizin hər biri adlı-sanlıdı. Ancaq bu, o demək deyil ki, şansımız yoxdu. Şanslar var və bundan maksimum faydalanmağa çalışacağıq. Düşünməyin ki, hansısa komanda zəif heyətlə oynayacaq. Hər komanda bu turnirə ciddi yanaşır.

– Rəqibin üstün tərəfləri barədə nə deyə bilərsiniz?
– Fiziki gücləri dərhal gözə girir. Etiraf edim ki, onları saxlamaq olduqca çətin olacaq. Üslublarına gəlincə, belə deyərdim: qısa yolla rəqib qapısına yol tapmaq. Onlar sürətli, olduqca sürətlidilər. Açılmağı bacarırlar, sürətli əks-hücumlar qura bilirlər. Əlbəttə, davam edə bilərəm, ancaq düşünürəm ki, kifayət qədər nəql etdim.   

– Nəzərə alsaq ki, yağışlı havada ot örtüyü bərbad vəziyyətə düşəcək, taktikanızda dəyişikliyə səbəb olacaqmı?
– İndidən bir söz deyə bilmərəm. Çünki meydan yenicə bərpadan çıxıb. Aydın məsələdi ki, ot örtüyü uzunmüddətli yağışdan sonra ağırlaşır. Belədə, hücum taktikamızda müəyyən düzəlişlər edə bilərək.

– Azərbaycan çempionatında daha çox topa sahib olan "Qəbələ"ni Avropa Liqasında daha şox müdafiə olunduğunu görürük. Sabah necə olacaq?
– Düşünməyin ki, biz bunu bilərəkdən edirik. Fəlsəfəmiz birdi: ancaq hücumda oynamaq. Ancaq Avropa Liqasında rəqiblərimiz o qədər güclüdür ki, istədiyimiz qədər hücum edə bilmirik. Dəst-xəttimizdən yayınmırıq, ancaq rəqiblərin imkan verdikləri qədər bunu edirik.

CEYHUN ƏLİYEV