Jayro: “Qazandığımız qələbə puldan önəmlidir”

Premyer Liqanın 7-ci turu çərçivəsində “Kəpəz”i qəbul edən “Neftçi” 2:0 hesabı ilə qalib gəldi. Paytaxt klubunun braziliyalı müdafiəçisi Jayro matçdan sonra jurnalistlərin suallarını cavablandırdı.

– Uzun sürən aradan sonra qələbə qazandınız…
– Əlbəttə, ardıcıl məğlubiyyətlərdən sonra komanda özünə gələ bilmirdi. Bizə bu cür qələbə lazım idi ki, komandada özünəinam yaransın. Bunun növbəti oyunlarda bizə kömək edəcəyinə əminəm.

– Bundan sonra “Neftçi” ancaq qələbə qazanacaq?
– Biz hər oyuna qələbə üçün çıxırıq. Bu gün aqressiv oynadıq, hər top uğrunda döyüşdük və 3 xal əldə etdik.

– Çempionatda yaranacaq fasilə komandaya mənfi təsir göstərməz ki? 
– Əksinə, xeyirimizə olacaq. Yeni baş məşqçi gəlib və komandanı formalaşdırmaq üçün zamana ehtiyacı var. Fasilə işimizə yarayacaq.

– Sizin xəbəriniz varmı ki, Elxan Abdullayev həm də millidə çalışır və fasilədə “Neftçi” ilə birgə olamayacaq?
– Əlbəttə, bilirəm. Ancaq onun köməkçiləri var və onlar baş məşqçinin tapşırıqlarına uyğun məşqlər keçəcəklər. 

– Yəqin ki, bu qələbədən sonra mükafat da olar…
– Biz futbolçu kimi öz üzərimizə düşəni edirik. Mükafat vermək rəhbərliyə aid olan məsələdir. Bu barədə heç nə deyə bilmərəm. Qazandığımız qələbə puldan önəmlidir. Çalışacağıq bunun dadını çıxaraq.

– Elxan Abdullayev “Neftçi”də nəyi dəyişib?
– Deməzdim ki, böyük bir dəyişiklik olub. Eyni oyunçulardır. Sadəcə olaraq, özümüzə inamı qaytarıb. Məşqlərimizdə də artım var.

ELMAR ABDULLA-ZADƏ