İlk dövrənin mənzərəsi: “Üçbaşlı əjdaha” və başqaları

Premyer Liqanın ilk dövrəsi arxada qaldı. Ötən mövsüm olduğu kimi, yenə də 1-ci pillədə qərarlaşan “Qəbələ”di. Roman Qriqorçukun yetirmələrinin budəfəki liderliyi bir çox aspektlərdən fərqlidi.

Əvvəla, komanda ötən mövsümkündən fərqli olaraq, yalnız top fərqinə görə 1-ci yerdə qərarlaşmayıb. İkincisi, “qırmızı-qaralar” çempionluq yolunda “Qarabağ” səddini aşmağı bacarıb. Xatırladaq ki, 2015-2016-da bu komandalar arasındakı ilk görüş bərabərliklə başa çatmışdı – 2:2. Ukraynalı mütəxəssisin rəhbərlik etdiyi komandanın ilk dövrədən sonrakı top fərqi də tükürpədicidi: 19-0! Doğrudu, bu qollardan 8-i “Neftçi”nin payına düşüb, ancaq komandanın ardıcıl 7 oyunda qapısının toxunulmazlığını qoruması ciddi iştahdan xəbər verir.

“İnter” bəlkə də tarixinin ən uğurlu mövsümünü keçirir. Doğrudu, “ağ-göylər”in tarixində bundan da yaxşı nəticələr olub. Ancaq kimlərlə? Heyət başdan-ayağa əcnəbilərlə dolu, hətta inzibatçısı belə, legioner olan klub çempion olduğu dövrdə də “doğma” statusu daşımırdı. Bu gün isə “bankirlər” daha çox mövcud mühitə “əlcək atan” altruistləri xatırladır.  Özü də məhdud büdcə bir qırağa, oyunçu transferinə də qadağa qoyulan bu komanda prioritet kimi yerli kadrlara güvənc yolunu seçib. Nəticə göz qabağındadı – “İnter” ilk dövrədə məğlubiyyət acısı dadmayan 2 komandadan biridi.

“Qarabağ”ın hələ də yuxulu gəzməsinin bir sıra səbəbləri var. Ancaq fikrimizcə, ən başlıcası futbolçuların doymasıdı. Onlar üçün çempionluq adi hala çevrilib. Bu heyətin böyük əksəriyyəti ölkə daxilində qızıl medalın nə demək olduğunu əla bilir. Komandanın yeni qana ehtiyacı var. Əlbəttə, bunu birdən-birə etmək olmaz. Ancaq “süvarilər”in çempion olacaqları təqdirdə belə, islahatlara ehtiyacı var. Bu, xüsusilə yerli futbolçulara aiddi.

Turnir cədvəlinin 4-cü pilləsində “Sumqayıt”ın qərarlaşması komanda sayı ilə əlaqədardı. Təsəvvür edin, 7-ci yerdəki “Neftçi” Samir Abasovun komandasından cəmi 2 xal geri qalır. Ümumiyyətlə, 4-7-ci yerlər aralığındakı komandaları gedən qatarın son sərnişinlərinə banzətmək olar. İlk 3-lük elə möhkəm oturub ki, kiminsə çempionatın qalan ¾ hissəsində onlara badalaq vura biləcəyini söyləməyə heç bir əsas yoxdu. Söhbət tək xal ehtiyatından getmir. Axı, ortaya qoyulan futbol da göz qabağındadı. Hansısa klubun qış fasiləsində transferlərə 15-20 milyon xərcləyəcəyi də real görünmür.

4-cü yer uğrunda mübarizə “Sumqayıt”, “Kəpəz”, “Zirə” və “Neftçi” arasında gedəcəyini proqnozlaşdırmaq olar. Ancaq bu mübarizədə ən az şans tanıdığımız “Sumqayıt”dı. “Zirə” də ötənilki deyil. Elə “Kəpəz” də heç cür özünə gələ bilmir. “Neftçi” isə ötən tur qalib gəlsə də, “ağ-qaralar”ın quyunun dibindən çıxdığını iddia etmək doğru olmaz.

AZAL-ın heç kimlə rəqabət apara bilmədiyini hətta Afrika cəngəlliklərində də bilirlər. Ancaq hələ də Cahangir Əsgərov simicliyindən əl çəkmir. Mövcud vəziyyətdə Tərlan Əhmədova acımaqdan başqa çarə görünmür. Çünki istənilən futbolçunun bəlli potensialı var. “Təyyarəçilər”in sıralarında toplaşan futbolçuların da potensialı turnir cədvəlində öz əksini tapıb.

CEYHUN ƏLİYEV