Ölkə futbolu
Havada tet-a-tet: millimiz "fırlanıb getdi"
Saat 14:00-ı göstərir. Bakı Hava Limanında bir qrup jurnalist…
Saat 14:00-ı göstərir. Bakı Hava Limanında bir qrup jurnalist uçuş saatını gözləyir. Təqribən 2 saat sonra hava gəmisi uzaq Çexiyaya üz tutacaq.
Hələliksə, üfüqdə sakitçilikdi. Dünən Norveç üzərində tarixi qələbə qazanan Azərbaycan millisinin üzvləri qeydiyyat masasına yaxınlaşır. Az sonra Dmitri Nazarova yaxınlaşdıqda, olduqca aqressiv reaksiyayla üzləşirəm: "Mən futbol oynayıram, müsahibə vermirəm". Nə deyirik, oyna, Nazarov, oyna…
Nəhayət, saat 16:00-ı göstərir və sərnişinlər mühərrikin səsini eşitmək arzusunu gizlətmir. Ancaq bu prosedur da 12-13 dəqiqə sonra baş verir. Niyə bu qədər mühərrik və texniki məsələdən danışıram? Çünki saat 16:25-i göstərəndə həyəcan elanı bortda sükut yaratdı: "Hörmətli sərnişinlər! Texniki nasazlıq səbəbindən təyyarə Bakıya qayıdır". Yox-yox, kiminsə təşvişə düşdüyü deyə bilmərik, ancaq bir incə məqam var: təyyarə dolu yanacaqla enə bilməz.
Az sonra daha bir məlumat gəldi. Bu xəbəri AFFA-nın İctimaiyyətlə Əlaqələr Departamentinin rəhbəri Mikayıl Nərimanoğlu gətirdi: "Yanacaq boşalanadək havada dövrə vuracağıq. Təqribən 2 saatdan sonra Bakıya enəcəyik. Bundan sonra təyyarəmizdəki nasazlıq barədə məlumat verməməyinizi xahiş edirəm. Gedək çataq Ostravaya, sonra ətraflı bilgi verərsiniz. Çünki hər birimiz evdən çıxmışıq, hər kəsin ailə üzvləri narahat olacaq".
Konkret nasazlığa gəlincə, şassinin biri yığılmamışdı. Güclü küləyin hökm sürdüyü havada bu, təyyarə üçün ciddi təhlükəyə səbəb ola bilərdi. Elə Nərimanoğlunun monoloqu yenicə başa çatmışdı ki, daha bir xəbər salon əhlini coşdurdu: "Şassidəki nasazlıq aradan qaldırıldı". Həə, demək ki, yenidən üz tutmaq olar Ostravaya…
Prosineçki ara-sıra futbolçulara yaxınlşır, hal-əhval tutur, bəziləri nahar etdikdən sonra Morfeylə qucaqlaşmağa üstünlük verib, digərləri isə bəndənizlə dünənki oyunun qızğın mübahisəsinə girişib. Belələri sırasında Maksim Medvedev və onun "Qarabağ"da da kapitanı olan Rəşad Sadıqovdu.
Əlbəttə, 40 dəqiqəyə yaxın davam edən bu fikir mübadiləsinin təfərrüatı qələmə alınmayacaq. Elə Rəşadla tet-a-tet etdiyimiz qabırğa söhbəti də. Ancaq bu zaman kəsiyi kifayət edəcək ki, millimizin Çexiyada hansı əhval-ruhiyyədə olduğuna dair proqnozlarımı verim.
Futbolçularımız dünənki oyunda xeyli yorulublar. Norveç yığması xüsusilə daha yaşlı oyunçularımızı xeyli enerji sərf etməyə məcbur edib. Elə bu üzdəndi ki, Prosineçki dünənki mətbuat konfransında "Çexiya ilə oyunda bugünkü ilə müqayisədə, bir neçə əvəzetməyə əl atacam" demişdi. Ancaq daha bir müsbət məqam da var. Söhbət oyunçularımızın psixoloji durumundan gedir. Əhval-ruhiyyə fontan vurur.
Təyyarə Ostrava Hava Limanına enmək üzrə olarkən, "CBC-Sport"un əməkdaşı Səmra Əliyeva milli komandamızın heyət üzvlərinin adlarını bir-bir çəkərək, dünənki uğur münasibəti ilə təbrik etdi. Maraqlıdı ki, baş məşqçi Robert Prosineçkinin adı səsləndirildikdə, Kamran Ağayev ayağa qalxdı. Olmaya əlcək sahibi xorvatiyalının yerinə göz dikib?
Nəhayət, 5 saatlıq uçuş başa çatdı. Düz təyyarənin şassisi yerə dəydiyi an, məhz bu cümləni yığdım. Niyə də yox!?
CEYHUN ƏLİYEV, Bakı – Ostrava