Ölkə futbolu
Məşqçi işi, əzmkarlıq və reallaşmaq istəyən arzular
Belə start hətta Robert Prosineçkinin də yuxusuna girməzdi….
Belə start hətta Robert Prosineçkinin də yuxusuna girməzdi. Söhbət 3 oyuna qazanılan 7 xaldan, bunun 4-nün səfərdən gətirilməsindən getmir – milli komandamız hələ top da buraxmayıb. 54 komandadan yalnız Almaniya, İngiltərə, Belçika və biz bunu bacarmışıq!
Fantastik başlanğıcdı. Final mərhələsi xəyallarına düşmək üçün çox erkəndi, amma heç nə mümkünsüz deyil. Almaniyanı bir kənara qoyaq – hamını udacaqlar, qalanları ilə oynamaq olar. Norveçə ötən tsikldə səfərdə uduzmamışdıq, çexlərlə evdə oynamaq olar, San-Marinoya xal bağışlamaq mümkünsüzdü, Şimali İrlandiyanı isə artıq bir dəfə udmuşuq. Evdə qalib gəl, səfərdə xal üçün döyüş, bir də gördün seçmə mərhələ qurtardı.
Prosineçkinin oynatdığı futbol zövq oxşamır, darıxdırıcıdı, lakin Berti Foqtsun vaxtında da belə idi, hətta həmin vaxt ultramüdafiə izləyirdik. Xorvatsa əlindəki materiala görə oyun qurur və etiraf edək ki, bu, futbolçularımızın maksimumudu. Daha yaxşısına ümid etmək üçün daha yaxşı ifaşılar olmalıdı.
Döyüşkənlik, əzmkarlıq, iradə nümayişi, xarakter – millimizin qrupda 7 xal qazanmasının səbəbi bu amillərdi. Futbolçular 90 dəqiqə meydanın hər qarışı uğrunda mübarizə aparmaqla buna nail olub. Hamı can qoyur, şans qazanan formanı əldən verməmək, ümumi uğurda iştirak etmək üçün maksimum çalışır.
Yığmamızın baş məşqçisinin bir uğuru xüsusi vurğulanmalıdı. O, faktiki olaraq, ən vacib nöqtəni "yamaq"la yola verdi. Mərkəz müdafiəsindəki çatışmazlıqları ört-basdır etmək üçün eksperimentə əl atdı və yanılmadı. Bütün ölkədə Bədavi Hüseynovla Rəşad Sadıqova alternativ olmadığı, onların isə növbəylə zədələndiyi bir zamanda Prosineçki Maksim Medvedevdən məhsuldar stopper "icad etdi".
Norveç və Çexiyayla oyunlarda həqiqi məşqçi işi göründü. Cüt oyunlarda daim fiasko yaşayan millimiz indi 3 gün ərzində qazanılan 4 xalı bayram edir. Və bu uğurlar sıradan komandalarla deyil, Avropa ortababları ilə görüşlərdə qazanılıb.
Hələlik hər şey yolunda gedir. Hoyabrda Şimali İrlandiya səfərində qazanılacaq xal və ya xallar ümidimizi daha artıracaq. Artıq "Qarabağ" və "Qəbələ"nin avrokuboklarda qazandığı uğurun gətirdiyi stimul, özünəinam hissi milli komandaya da sirayət edib. Arxayınlaşmamalı, eyforiyaya qapılmamalı, rəqibləri bir-bir analiz edib xal ehtiyatını artırmalıyıq. Futbolda zəif-güclü anlayışı böyük ölçüdə qalmayıb, istək, məqsəd aydındısa, ona çatmaq üçün irəliləməyə dəyər.
FƏRİD
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-29 08:00
Avrokuboka vəsiqə üçün vacib qələbələr: Sumqayıtda hakimlər də iş başında idi
- Ölkə futbolu2024-04-29 09:25
“Nitsa” Benzianı istəyir
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib