Milli komanda
Emin Mahmudovu itirməyək!
Bəlkə də zamanı deyil. Ancaq sonra gec də ola bilər.
Emin Mah…
Bəlkə də zamanı deyil. Ancaq sonra gec də ola bilər.
Emin Mahmudova şans verilməlidi. Nə vaxt, hansı oyunda? Bu suallara cavab tapmaq çətindi. Ancaq Eminə mütləq şans verilməlidi. Başını aşağı salıb futbolunu oynayırdı. Rusiya yığmasına düşmək üçün nəzəri şansını da qoruyurdu. Evindən-eşiyindən didərgin salındı, yığmamızda oynamağa razılıq verdi. Özü də Ramil Şeydayevlə eyni gündə. Üstü açılamasa da, görünən budu ki, Şeydayev – Mahmudov tandemi məhz hər ikisinin cəlb olunduğuna görə millimizdə oynamağa razılıq veriblər.
Şeydayevin işi qaydasına düşməkdədi. İstedadlı forvard millimzdə tam 90 dəqiqə oynamaq şansı da qazandı, bu fürsətdən maksimum yararlanmağı da. Emində isə vəziyyət fərqlidi. Şərəfini qoruduğu “Boavişta”da meydana çıxa bilmir. Ümid qalır millimizə. Burada da hələ ki, “vakuum”du. Mahmudov hər oyuna dəvət alır, ancaq bütün qarşılaşmaları ehtiyat oyunçular skamyasından izləyir.
“Qalib heyəti dəyişməzlər” deyimini nəzərə aldıqda (Çexiya ilə səfər heç-heçəsi millimiz üçün elə qələbə səviyyəsində bir nəticədi), Robert Prosineçkini qınamağa heç bir əsasımız olmur. Ancaq Prosineçkinin bəzi anlarda ciddi riskə getdiyini xatırlasaq, düşünməyə dəyər. Kamran Ağayevin uzun müddət klubsuz qaldığı dönəmdə də, komadasında buraxdığı səhvlər zamanında da xorvatiyalı qolkiperə güvəndi, güvəndi, güvəndi… bu gün də bəhrəsini görür.
Elə Şeydayev də “Trabzonspor”da hələ də heyətə düşə bilmir. Doğrudu, Ramilin klubdakı işləri addım-addım irəliyə gedir. Ölkə kubokunda da heyətdə olub, çempionatda da “18-liy”ə düşməyə başlayıb.
İndi də növbə Mahmudovdadı. San-Marinoya qarşı matçda oyuna daxil olduqdan sonra yarımmüdafiə xəttində xeyli canlanma yaratmağı bacaran “Boavişta”nın futbolçusu hamımızı xeyli ümidləndirmişdi. Ancaq bundan sonra yalnız dəvət, dəvət, dəvət…
Bununla Prosineçkinin “bostanına daş atmırıq”. Əksinə, yuxarıda da qeyd etdik ki, “qalib heyəti dəyişmirlər”. Xorvatiyalı mütəxəssisin sürət yığan “mühərrik”inə müdaxilə etmirik. Sadəcə, Emini də düşünmək lazımdı. Bu futbolçuya sahib çıxmalıyıq. Özü də hansısa klubumuza dəvət etməklə yox. Onun ölkə xaricində çıxış etməsi futbolumuza hər iki tərəfdən xeyirdi: həm imic baxımından, həm də yığmamıza fayda vermək.
Mahmudov hazırda Kamran Ağayevlə birlikdə Portuqaliyada Azərbaycan futbolunun vizit vərəqəsidi. Kamran dividendlər gətirdiyi biz zamanda niyə də Emindən də maksimum yararlanmayaq? “Boavişta”da hələ ki, şans qazanmır, heç olmasa, yığmada güvənək və bu da onun üçün tramplin rolunu oynasın. Əgər Mahmudov da özünü sübut edə bilsə, artıq gələn mövsüm bu ölkədəki “səfirlərimiz”in sayı xeyli artacaq. “Avropa braziliyalıları”nın vətəni isə daim “köhnə qitə”nin tanınmış skautlarının diqqət mərkəzindədi. Axı, atalarımız əbəs yerə “qar qar üstə yağar” deməyiblər.
Robert müəllim, sən bir düşün, bəlkə dediyimiz yola yaşıl işıq yandırasan!?
CEYHUN ƏLİYEV
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Ölkə futbolu2024-04-19 08:52
Yüksək əmsal “Qarabağ”a əlavə üstünlük verir
- Ölkə futbolu2024-04-19 08:00
Juninyoya Niderlanddan da müştəri çıxdı
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi