Zirədə “qonşu davası”, “İnter” üçün çətin rəqib

Bu gün Premyer Liqada 10-cu tura yekun vurulacaq. Futbolinfo.az xəbər verir ki, ilk oyun günü lider “Qəbələ” ilə onun ən yaxın izləyicisi “Qarabağ”ın qələbəsi ilə əlamətdar oldu. Bu gün isə “dördlük”də yer alan “İnter” “Sumqayıt”ı  qəbul edəcək. “Kəpəz” isə “Zirə”nin qonağı olacaq.

14:00 “Zirə” – “Kəpəz”

Hakimlər: İnqilab Məmmədov, Nahid Əliyev, Vüsal Qənbərov, Cavanşir Yusifov.
Əlavə köməkçi hakimlər: Əliyar Ağayev, Orxan Məmmədov.
AFFA nümayəndəsi: Abas Hüseynov.
Hakim-inspektor: Asim Xudiyev.
Zirə İdman Kompleksinin stadionu (1300 yerlik).

Eyni – 11 xala malik olan “Zirə” ilə “Kəpəz” qonşu pillələrdə qərarlaşıblar. Gəncəlilər ilk dövrədə qəsəbə təmsilçisini məğlub etdiyi üçün bir addım öndədir. Şahin Diniyevin rəhbərlik etdiyi kollektiv 4-cü turda Julien Ebah və Şəhriyar Rəhimovun qolları ilə bugünkü rəqibini məğlub etmişdi. 
“Kəpəz” “Zirə”dən savayı, yalnız sonuncu sıradakı AZAL-ı məğlub edib. Qərb klubu “sülhsevərliyi” ilə diqqət çəkir. Gəncəlilər 9 oyundan 5-də bərabərə qalıblar.

“Zirə”nin gücü isə “Neftçi”yə çatır. Adil Şükürovun komandası 3 qələbəsindən ikisini “ağ-qaralar”la duellərdə əldə edib. Digər qələbə isə AZAL üzərində qazanılıb. 

Ötən mövsüm elitada debüt edən meydan sahibləri heç vaxt “Kəpəz”i məğlub edə bilməyiblər. Gəncəlilər hər matçda qol vurub. Bakı klubunun hər iki ev oyunu eyni – 2:2 hesabı ilə nəticələnib.

STATİSTİKA: “Zirə” – “Kəpəz” – 5 oyun, +0=3-2, top fərqi 5-9

İLK DÖVRƏ: 0:2

OYUNDAN NOTLAR
– Komandalardan heç birinin heyətində cəzalı futbolçu yoxdur.
– “Zirə”də Adil Nağıyev və Təmkin Xəlilzadənin, “Kəpəz”də isə Renan Silvanın balansında 3 sarı vərəqə var.
– Meydan sahiblərinin heyətində Yovan Krneta zədəlidir.
– Gəncə təmsilçisində isə zədəsi sağalmayan müdafiəçi Şəhriyar Əliyev ilə yarımmüdafiəçi Dario Frederiko “sarı-göylər”ə kömək edə bilməyəcək. Bu günlərdə qrup halında məşqlərə qoşulan Vüqar Bəybalayev isə tam hazır olmadığından oynamayacaq. 

REFERİ

İnqilab Məmmədov əsasən Birinci Divizion oyunlarına təyinat alan referidir. O, cari çempionatda Premyer Liqanın 2 qarşılaşmasını idarə edib: “Qəbələ” – AZAL (3:0) və “Sumqayıt” – AZAL (1:1).

16:00 “İnter” – “Sumqayıt”

Hakimlər: Ömər Paşayev, Namiq Hüseynov, Vüqar Bayramov, Yaşar Abbasov.
Əlavə köməkçi hakimlər: Rəhim Həsənov, Ramil Diniyev.
AFFA nümayəndəsi: Ramiz Abdullayev.
Hakim-inspektor: Kərim Ağayev.
“İnter Arena” (5300 yerlik).

Cari mövsümün gizli favoriti hesab olunan “İnter” bu statusu itirməmək üçün həftəni 3 xalla başa vurmalıdır. Çünki lider “Qəbələ” və 2-ci sıradakı “Qarabağ” dünən qələbə qazanıblar. “Ağ-göylər” qalib gələcəkləri halda, liderlə xal fərqi 4-ə enəcək.

Ötən tur “Qəbələ”ni büdrədən “Sumqayıt” isə növbəti sürpriz arzusundadır. Qonaq komanda bunu bacardığını dəfələrlə sübut edib. Hərçənd, “gənclik şəhəri” təmsilçisi ilk dövrədə Zaur Svanadzenin komandasına uduzub. Sumqayıtda baş tutan matçda “İnter” Denis Silva və Ağabala Ramazanovun qolları ilə önə keçmiş, meydan sahiblərinin yeganə qoluna isə Vaqif Cavadov imza atmışdı. 

Unutmayaq ki, son 5 qarşılaşmada qonaq kimi çıxış edən komanda məğlub olmayıb. 6 oyundur meydanı qolsuz tərk etməyən “İnter” 3 matçdır “Sumqayıt”a uduzmur.

STATİSTİKA: 17 oyun, +10=5-2, top fərqi 26-11

İLK DÖVRƏ: 2:1

OYUNDAN NOTLAR
– Komandalardan heç birinin heyətində cəzalı və ciddi zədədən əziyyət çəkən futbolçu yoxdur.
– “İnter”in 5 futbolçusunun – Səlahət Ağayev, Ağabala Ramazanov, Nizami Hacıyev, İlkin Qırtımov və Zurab Xizanişvilinin 3 “sarı”sı var. Növbəti xəbərdarlıq alan cəzalı duruma düşəcək.
– “Sumqayıt”da isə isə Yusif Nəbiyev diqqətli olmalıdır. Onun da 3 sarı vərəqəsi var.

REFERİ

Cari Premyer Liqada 3-cü oyununu idarə edəcək Ömər Paşayev 2-ci dəfə “İnter”in ev oyununda fit çalacaq. Onun söz sahibi olduğu “İnter” – “Kepez” matçı heç-heçə bitib (2:2).

Paşayevin idarə etdiyi digər qarşılaşma isə “Neftçi” –  “Kəpəz” dueli olub (2:0).

FƏRİD