Milli komandaya dəstək aksiyası – NİYƏ DƏ YOX?

Ayaz Əhmədov. Futbol ictimaiyyəti onu təzə-təzə tanımağa başlayıb. MFL-in yaradıcısı, SMG şirkətinin rəhbəri yaxınlarda daha bir layihəyəylə diqqət mərkəzinə düşdü. O, milli komandamızın dünya çempionatının seçmə mərhələsindəki 4-cü oyununu canlı izləmək istəyən fanatlar üçün əla fürsət yaratdı.

Şimali İrlandıyaya getmək istəyən azarkeşlərimiz çarter reysi ilə Belfasta uçaraq, meydan sahiblərinə qarşı matçda millimizi tribunadan dəstəkləyə bilərlər. Bunun üçün nəzərdə tutulan xərclər fərdi qaydada getmək istəyənlərdən təqribən 3 dəfə ucuzdu. Səfərin təşkil edilməsi ilə bağlı da yetərincə sualların olduğunu, ümumiyyətlə, bu cür təşəbbüsün ölkəmizdə ilk dəfə irəli sürdüyünü nəzərə alaraq, SMG-nin prezidenti ilə görüşməyə ehtiyac duyduq.

– Gəlin lap əvvəldən başlayaq. SMG barədə məlumat verməyinizi xahiş edərdik.
– Bu kompaniya ötən ilin noyabrında yaradılıb. Yaxın günlərdə 1 yaşımızı qeyd edəcəyik. SMG-ni yaratmaqda məqsədimiz idmanı kommersiyalaşdırmaq olub. Ölkəmizdə istedadlı atletlər,  uğurlu nəticələrə imza atmış idmançılar, perspektiv vəd edən gənclərimiz var. Hesab edirəm ki, idmanımızın başlıca problemi məhsulu düzgün təqdim etməməkdədi. Dünya inkişaf edir. Bu gün dərk etməliyik ki, idman təkcə idmançılar üçün deyil. İdman həm də istifadəçilər üçündü. İstifadəçilərin sayı isə idmançılardan qat-qat çoxdu. Məhsulu keyfiyyətli təqdim etmək lazımdı. Rəsmi statistika var. Televizorla futbola baxan kişilərin 70 faizi əlavə olaraq, telefonda hansısa məlumatı toplayır. Kimisi paralel oyunlardakı nəticələri izləyir, kimisi qolların videotəkrarına baxır, kimisi “facebook”da status yazır. Biz indi-indi saytlara, “facebook”a ciddi yanaşmağa başlayırıqsa, bu, dünyada 10 ildi var. Biz bu məhsulu keyfiyyətli şəkildə təqdim etməliyik. Götürək MFL-i. Bu gün bunu yaratmışıq. Ancaq hər gün yeni-yeni addımlar atırıq ki, daha cəlbedici, daha maraqlı olsun. Biz futbolla məşğul olmuruq. Bunun üçün federasiya var. Biz bu məhsulun təbliğatı, kommersiya tərəfi ilə məşğuluq.

– Qeyd edirsiniz ki, istifadəçi idmançılardan çoxdu. MFL çempionatında 600-ə yaxın həvəskar futbol oynayır. Başqa sözlə, bu insanlar futbol xəstəsidi. Bu gün Premyer Liqa oyunlarına 600 azarkeş gəlmir. MFL iştirakçılarını tribunalara aparmaq perspektivi barədə düşünməmisiniz?
– Tamamilə doğrudu. Bax, məqsədimiz də elə budu. Biz gözəl başa düşürük ki, stadiona gələnlər istifadəçilərdi, idmanın istifadəçiləri. MFL futbol xəstələrinin toplaşdığı bir mərkəzdi. Burda təcrübəli jurnalistlərdən ibarət komanda da iştirak edir, dəmirçi də, bankir də. Ancaq bütün bunlar iş başındadı. MFL-də isə onları birləşdirən qüvvə var: futbola məhəbbət. Məsələn, sabah  “Neftçi” – “Qarabağ” matçı var. Bizim üçün 600 nəfərin qapısını döymək su içmək kimi bir şeydi. Çünki hamısı gözümün qabağındadı. Sabah bu 600 insanın 50-100 nəfəri tribunaya gəlsə, bu, artıq böyük uğurdu. Hə, bundan sonra məhsulun keyfiyyəti başlıca rol oynayacaq. Onlar sərf etdikləri 2 saatdan məmnun qalsalar, inanın, növbəti dəfə bu say 200-ə qalxacaq. Bu mövzuda artıq bir sıra klublarımızla danışıqlarımız olub. Bunun üçün heç bir pul istəmirik.

– Rəhbəri olduğunuz qurum Şimali İrlaniya – Azərbaycan matçına azarkeşlər üçün təklif paketi hazırlayıb. İstənilən fanat bu oyunu Belfastda tribunadan izləmək şansı əldə edə bilər. Hazırda vəziyyət nə yerdədi? Maraq göstərən varmı?
– İngiltərədə yaxın dostum yaşayır. Onun rəhbəri olduğu şirkət təxmini bizimlə eyni yöndə fəaliyyət göstərir. İngiltərədə yaşayan xeyli soydaşımız həmin matçı izləməyə gəlmək arzularını bildiriblər. Biz də fikirləşdik ki, niyə də vətənimizdəki fanatlar üçün analoji şansı yaratmayaq? AFFA rəhbərliyi bu matça çarter reysi ayırıb.  Azarkeşlər üçün 50-60 yer ayrılıb. Əlbəttə, fanatlar bunun üçün müəyyən vəsait  xərcləməlidilər. Təsəvvür edin, Bakı-London-Belfast-London-Bakı reysinin qiyməti 2300 manatadı. Çarterlə birbaşa Belfasta və geriyə, üstəlik oyunun bileti də daxil olmaqla azarkeşlər üçün 900 AZN-lik paketimiz var. Bu vəsait heç xərcləri ödəmir. Sadəcə, millimizə dəstək olmaq istəyirik. Hər kəs bacardığı kimi komandamızın yanında olmalıdı. Biz də bunu bacarırıq. Açığı, vaxtımız olduqca məhdud idi. Cəmi 3 gün. Buna baxmayaraq, maraq göstərənlərin sayı gözlədiyimizdən də artıq oldu. Fürsətdən istifadə edib “futbolinfo”ya da, bizə bu məsələdə dəstək olan hər kəsə də təşəkkürümü bildirirəm. Təqribən 130-150 zəngə cavab verdik. Bunlar arasında əlbəttə ki, sadəcə, maraqlananlar da var idi. Bu, “ilk qaranquş”umuzdu. Artıq azarkeşlərimiz millimizə inanmağa başlayıb. Norveçlə, Almaniya ilə səfər qarşılaşmalarında bir neçə ay öncədən belə bir elan verəcəyik ki, azarkeşlərimizin də rahat-rahat planlarını cızmağa vaxtları olsun.

– Elə bizə də bu səfərlə müraciət edənlər olmuşdu. Lakin səfər bir neçə iş gününü əhatə edir və bu, onlar üçün heç də əlverişli deyil. Azarkeşlər isə istirahət günlərini ölkə xaricində keçirmək istəyirlər. Gələcəkdə belə bir variant mümkündürmü ki, azarkeşlər üçün ayrıca çarter reysi ayrılsın və onlar qarşılaşmadan 3 gün əvvəl deyil, oyun günü səfərə çıxsınlar və növbəti 2 günü də həmin ölkədə keçirsinlər?
– Əvvəl-axır buna gəlməliyik. Məhsula tələbat varsa, bu məhsulu ən yüksək səviyyədə təqdim etmək lazımdı. Sabah 250 fanat hansısa səfər matçına toplansa, biz AFFA-ya müraciət edib, onlar üçün ayrıca çarter reysinin açılmasını xahiş edəcəyik. Çünki belədə, təyyarənin xərclərini toplanan vəsaitlə ödəmək mümkün olacaq. İndiki vəziyyəti isə gözəl başa düşürəm ki, cümə axşamı gündüz saat 3-də yola düşmək əksəriyyət üçün müşkül məsələdi. İş vaxtının qızğın çağıdı. Gələcək planlarımız barədə isə, elə özünüz sualı verdiniz.

– Belədə, yada yenə də MFL düşür. Axı, səfərə getmək üçün potensial azarkeş ordusu elə təşkil etdiyiniz çempionatda oynayır. Körpü yaratmaq üçün milli üzvlərimizin çempionat iştirakçıları ilə görüşlərini təşkil etmək yaxşı olmazdımı?
– Təki Belfastda da uğurlu nəticə qazanaq. AFFA rəhbərliyi ilə bu mövzuda söhbətimiz olub. Belə bir matç təşkil etmək istəyirik: “MFL ulduzları” – Azərbaycan yığması. Əlbəttə, mini-futbol matçı. Milli üzvləri ilə sıravi görüşlər də təşkil etmək istəyirik. Götürək Rəşad Sadıqovu. O, bizim fəxrimizdi. MFL iştirakçılarına Rəşadla söhbətləşmək, maraqlandıqları sualları ünvanlamaq imkanı yaratmağı planlaşdırırıq. MFL bir ailədi. Bir-birimizə imkan, şərait yaratmaq istəyirik. Bir real misal çəkim. Bu gün MFL-də oynayan uşaqlar var ki, bizə müraciət ediblər. Jurnalistika fakültəsində oxuyurlar. “Futbolinfo”nun çempionatımızda iştirak etdiyini bilib, müraciət ediblər ki, onlarla əməkdaşlıq edə bilərikmi? Burda oynayan komandaların üzvləri addım-addım qarşılıqlı işlər quracaq. Addım-adım buna doğru gedirik.

CEYHUN ƏLİYEV