Elxan Abdullayev: "Hamıya şans verilib"

"Neftçi"nin baş məşqçisi Elxan Abdullayev Azərbaycan Premyer Liqasının 11-ci turu çərçivəsində "İnter"ə qarşı keçirdikləri oyunu şərh edib. Futbolinfo.az xəbər verir ki, paytaxt klubunun çalışdırıcısı 2:1 hesabıyla bitən qarşılaşmadan sonra bunları söyləyib:

– Maraqlı oyun izlədik. Oyunumuzdan razı qaldıq. Yerli futbolçulara üstünlük verdik. Özlərini doğrultdular.

– Qışdan sonra yeni futbolçuların gələcəyini deməyiniz futbolçulara mənfi təsir etmir?
– Niyə etsin ki? Yeni gələnlər indikilərin əvəzinə gəlmir ki, komandaya futbolçu lazımdı.

– Oyunu tribunada izləyənlər arasında Adrian Piti də gördük. Onun adı gündəmdədi?
– Xeyr.

– Hakimin qərarı qələbənizə kölgə salır?
– Bu haqda danışmaq mənim səlahiyyətimdə deyil.

– “Qarabağ” və “Qəbələ” ilə oyundan fərqli, bu dəfə 5 yox, 4 müdafiəçi buraxmışdınız..
– İlk gündən 4-1-4-1 sistemindən oynadıq. Amma bu özünü doğrultmadı. “Qarabağ”la bu sistem alınmazdı. Çünki onların hücum potensialı daha böyükdü.

– “Neftçi” azarkeşləri Rəhman Hacıyev və Araz Abdullayevi tənqid edirdi. Mahir Şükürov isə oyunu meydanda idarə edirdi.
– Bu komandaya gələndə Araz kapitan idi. Onu futbolçular seçib, məşqçilər yox. Mənim onu dəyişməyə haqqım yoxdu.

– Elşən Abdullayevin zədəsi necədi?
– Müalicə olunur. Bir ara komanda ilə məşqə başlamışdı. Amma yenə də nəsə problem yaranıb. Amma çox güman ki, qışa kimi meydana çıxmayacaq.

– Araz meydanı tərk edəndə kapitanlıq sarğısını Mahirə versə də, o, bundan imtina etdi.
– Bunu Mahirdən soruşun. Yəqin komandada yenidi deyə bunu qəbul etmədi. 

– Bu qələbədən sonra komandanızın özünə gəldiyini düşünmək olar?
– Hər qələbə bizim üçün önəmlidi. Özünəinam yaranır. Düz istiqamət seçmişik və bu yolla da gedirik.

– 5 oyunçunu əvəzedici komandaya yolladınız. Bu qərarı daha əvvəl verməyinizə görə peşman deyilsiniz?
– Xeyr. Ona görə ki, mən onlara şans verməsəydim, özümü qınayardım. Bu komandaya yeni gəlmişəm. İlk gündən kimisə əvəzedici heyətə göndərsəydim, düz olmazdı. Hamıya şans verilib, amma istifadə edə bilməyiblər.