Ölkə futbolu
“Neftçi”nin baş məşqçisi: "Yığmanın hər bir üzvünə deyilib ki, klubun qapıları üzünüzə açıqdı"
Milli komandamızda Robert Prosineçkinin köməkçisi…
Milli komandamızda Robert Prosineçkinin köməkçisi olan Elxan Abdullayev futbolinfo.az saytına eksklüziv müsahibəsində bir çox məsələlərə aydınlıq gətirib. O, bəzi milli oyunçularının baş məşqçisi olduğu "Neftçi"yə keçmək üçün dilə tutulması haqda deyilənlərə də münasibət bildirib.
Abdullayev Portuqaliya "Boavişta"sında çıxış edən Emin Mahmudova, eləcə də "İnter"in üzvlərinə dəvət göndərilməsini "yalan" adlandırıb: "Mən həm də milli komandamızın məşqçisiyəm. Dəxli yoxdu, hansı komandada oynayırlar, əsas odu ki, oyun praktikası qazansınlar. Milli komandamızın hər bir üzvünə deyirəm ki, “Neftçi”nin qapıları üzünüzə açıqdı. Bu uşaqlar maksimum oyun praktikası qazanmalıdılar. Bu sözlər tək Emin Mahmudova aid deyil, yığmaya cəlb olunan hər bir oyunçuya şamil olunur. Heç kimi hansısa klubdan dartıb gətirmirik. Sadəcə, milli üzvlərimizdən hansısa “Neftçi”də çıxış etmək istəsə və bu, reqlamentə zidd olmasa, biz onu qəbul etməyə hazırıq. “İnter”in futbolçularına gəlincə, deyə bilmərəm, bu cür söz-söhbətlər hardan qaynaqlanır. Bütün deyilənlər cəfəngiyatdı. Özü də mənim də yox, guya Robert Prosineçkinin “İnter”in oyunçularına elçilik etdiyi deyilir. Gülməlidi. Millinin baş məşqçisinin hansısa oyunçuların “Neftçi”yə keçməsində hansı marağı ola bilər? Bəli, biz çiyin-çiyinə işləyirik. Ancaq hər ikimizə xoşdu və bizə kifayət edir ki, “İnter”dən milliyə cəlb olunan futbolçular öz komandalarında praktika sarıdan korluq çəkmirlər. Gizlətmirəm, istənilən milli üzvünü “Neftçi”də görməyə şad olaram. Ancaq konkret “İnter”in futbolçuları ilə bu səpkidə heç bir söhbətimiz olmayıb. Sadəcə, yığmada forma geyinən hər bir futbolçuya deyilib ki, sabah hansısa probleminiz çıxsa, klubsuz və ya praktikasız qalsanız, “Neftçi”nin qapıları üzünüzə açıqdı. Bu söz-söhbətin kökünü bilmirəm. Bəlkə də millimizin Şimali İrlandiyada aldığı məğlubiyyətdən qaynaqlanır. Ancaq sadə bir çıxış yolu var. Müraciət etsinlər həmin futbolçulara. Bu cür söhbət olubsa, qoy, futbolçular desin".