Ölkə futbolu
Xronologiyanı pozmayan “Qəbələ”
“Qəbələ” Avropa Liqasının qrup mərhələsinin 5-ci t…
“Qəbələ” Avropa Liqasının qrup mərhələsinin 5-ci turunda da xal üzünə həsrət qaldı. Təmsilçimiz bu dəfə “Anderlext”lə bacarmadı. Birinci dövrədə olduğu kimi, Bakıdakı qarşılaşmada da eyni nəticə qeydə alındı – 1:3. Maraqlıdı ki, qolların xronoloji ardıcıllığı da eyni oldu: hesabı belçikalılar açdı, futbolçularımız bərabərliyi yaxaladı, Rene Vaylerin yetirmələri daha 2 dəfə fərqləndi.
Roman Qruqorçuk hələ oyundan əvvəl eksperimental heyətə güvənəcəyini bildirmişdi. Doğrudu, ukraynalı mütəxəssis bu addımı meydana çıxma şansları az olan oyunçulara praktika qazandırmaq istəyi kimi qələmə vermişdi. Lakin qrupdan çıxmaq şansını itirən klubun çalışdırıcısı heç şübhəsiz ki, ölkə çempionatının növbəti turunda qarşılaşacaqları “Qarabağ”la oyunöncəsi əsas bir neçə futbolçusuna dincəlmək imkanı yaratmağı düşünmüşdü. Voislav Stankoviç, Rəşad Sadiqov, Ruslan Qurbanov kimi futbolçular məhz bu səbəbdən ehtiyatda qalmışdılar.
Qriqorçuk futbol fəlsəfəsinə hətta eksperimental heyətlə də sadiq qaldı: rəqibin kimliyindən asılı olmayaraq, hücum etmək üçün maksimum səy göstərmək. Lakin belçikalıların ustalıq səviyyəsi ilk dəqiqələrdən təşəbbüsə yiyələnmələrini şərtləndirdi. Tilemans, Teodorçik, Sova, Kapelin rəngarəng oyunu artıq 11 dəqiqədə bəhrəsini verdi. Yuri Tilemansın bir hərəkətlə Nika Kvekveskirini “vakuum”a salması məhz ustalıq səviyyəsi arasındakı fərqin təzahürü idi. Zərbə isə həqiqətən qarşısıalınmaz idi – 0:1.
Doğrudu, komandamızın bərabərlik qolunu çox gözləməli olmadıq: Qriqorçukun həmvətəni Yevgeni Aranovskinin təyin etdiyi haqlı penalti zərbəsi Rikardinyonun cavab qoluyla nəticələndi. Lakin bu zərbəni xatırlamağa dəyər. Müdafiəçi hakimin işarəsindən sonra təqribən 7-8 saniyə düşündü və yalnız bundan sonra topa sarı şığıdı. Aşkar hiss olunurdu ki, o, olduqca həyəcanlıdı. Ən qəribəsi isə budu ki, referinin final fitinə 16 dəqiqə qalmış təyin etdiyi 2-ci penalti zərbəsi zamanı da “nöqtə”yə Rikardinyo yaxınlaşdı…
Bərabərlik qolundan sonra da oyunu diqtə edən tərəf qonaqlar idi. Stankoviçin meydanda yoxluğu aşkar hiss olunurdu. “Qırmızı-qaralar”ın heyətində ən bərbad fiqurlar isə Rəşad Eyyubovla Ürfan Abbasov idi. Ən üzücü məqam Ürfanla bağlıdı. Cinah müdafiəçisi ötən il olduğu kimi, yenə də kobud mövqe səhvləri ilə yadda qalır. Yerli futbolçuların qıtlığında isə ona qapını göstərmək olmur. Görünən budu ki, ya Abbasov üzərində işləmir, ya da potensialı “Qəbələ”də çıxış etməyə imkan vermir. Bütün hallarda, “Anderlext”lə oyun bir daha göstərdi ki, nəinki beynəlxalq arenada, heç yerli yarışlarda da ona bel bağlmaq olmaz.
Fasiləyədək tablodakı hesab dəyişməyincə, qonaqların daha böyük qüvvəylə irəli atılacağı və belədə, əzmkar Baqali Dabo üçün geniş ərazi açılacağını proqnozlaşdırmaq olardı. Lakin forvardın ikinci 45 dəqiqədəki oyunu cəmi 7 dəqiqə sürdü. Topuğundan zədələnən hücumçunu Ruslan Qurbanov əvəzlədi. Ruslan oyuna apis daxil olmadı. Onun sürətli reydləri belçikalıların başağrısına çevrilmişdi. Görüşün 73-cü dəqiqəsində Frank Buksla üz-üzə qalan Qurbanov yerdə qaldı. Belçikalı qolkiper futbolçumuza toxunmasa da, Aranovski düşünmədən penalti təyin etdi. Təəssüf ki…
Oyunboyu çoxsaylı səhvlərlə yadda qalan Rəşad Eyubov vurulmayan penaltidən az sonra gərəksiz yerdə ikinci sarı vərəqəni alaraq, meydandan qovuldu. Məhz təyin olunan həmin cərimə zərbəsindən sonra 2-ci yarıda oyuna daxil olan Massimo Bruno Dmitri Bezotosnını məyus etdi – 1:2. Yorulmaq bilməyən Lukaş Teodorçik isə hakimin əlavə etdiyi dəqiqələrdə komandamızın 3-cü dəfə meydanın mərkəzinə dəvət edilməsini təmin etdi.
“Qəbələ” bu qrup marafonunda yenə qələbəyə yaxın olduğu görüşdən məğlub ayrılsa da, heç də pis təsir bağışlamadı. Ötən il komanda qrupda bundan çox xal toplasa da, cari mövsüm daha baxımlı futbol sərgiləyir. Ən azından komandanın oyununa görə xəcalət çəkmirik. “Maynts”la son görüşdən sonra isə “qırmızı-qaralar”ın cari avrokubok mövsümünə dair yekun fikri yürütmək olacaq.
CEYHUN ƏLİYEV