Ölkə futbolu
“Vətən” Vətənə xidmət edir?
Futbolun qocalmayan mövzusu – ələlxsus da Azərbaycanda – uşaq…
Futbolun qocalmayan mövzusu – ələlxsus da Azərbaycanda – uşaqların yetişdirilməsi ilə bağlıdı. İlk növbədə diqqətlər elita təmsilçilərinin aşağı yaş qrupları üzrə komandalarına yönəlsə də, diqqətdən yayınan klublar da mövcuddu. Özü də araşdırdıqda, daha qlobal problem gündəmi zəbt edir.
Söhbət Təhsil Nazirliyinin nəzdində olan uşaq futbol məktəblərindən gedir. Bu məktəblərə ayrılan vəsaitin həcmi barədə heç bir mənbə məlumat vermir. Yalnız qeyri-rəsmi məlumatları əldə edə bildik ki, bu rəqəmlər həqiqətən tükürpədicidi.
Misal kimi götürək “Vətən” Futbol Məktəbini. Hər il büdcədən 2,2 milyon manat vəsaitin ayrıldığı bu məktəbdən neçə-neçə milli üzvü çıxmalıdı? Axı, nə Premyer Liqada komanda saxlayırlar, nə də 1-ci divizionda. Deməli, bütün vəsait uşaqların yetişdirilməsinə xərclənməlidi. Hara xərclənir? Necə xərclənir? Kimə xərclənir?
Sualların cavabı maraqlı gələ bilər. Ancaq fakt budu ki, Vətənə xidmət etməli olan “Vətən” nədənsə heç bir nəticəylə öyünə bilməz. Bu gün Premyer Liqa təmsilçilərinin boğazından yapışıb “niyə azyaşlıları yetişdirmirsiniz” sualını veririksə, bundan qat-qat artığını elə həmin “Vətən”dən tələb etməliyik. Məşqçiləri kimlərdi? Nəyə görə heç bir yaş qrupu üzrə millidə “Vətən”in yetirməsi çıxış etmir? Acınacaqlı mənzərədi. Vəsait gəlir, ancaq ortada heç bir şey yoxdu.
Təhsil Nazirliyinin biganəliyidimi bu? Açığı, bizə maraqlı deyil, nazirlikdə bu yöndə məsul şəxslər ayrılan vəsaitdən gəlir əldə edirlər, yoxsa yox. Fakt budu ki, nə “Vətən” rəhbərliyi vəzifəsinin öhdəsindən gəlir, nə də Təhsil Nazirliyi ayrılan vəsaitin qarşılığını verməyən klubdan bunu tələb edir.
2,2 milyon manatlıq büdcəylə heç bəzi Premyer Liqa klublarımız öyünə bilməz. Məsələn, AZAL-ın illik büdcəsi heç yarım milyon deyil. Bir az da dərinə getsək, yəqin ki, bütün 1-ci divizion təmsilçilərinin ümumi büdcəsi bu qədər etmir. Bütün sahələrdə iqtisadi çöküş yaşanan bir vaxtda, Təhsil Nazirliyinin heç bir hüququ yoxdu ki, belə bir vəsaitin hansı şəkildə xərclənməsi ilə maraqlanmasın. De-fakto büdcə vəsaiti talan olunur… özü də ən məsuliyyətsiz şəkildə!
Bizə maraqlıdı, AFFA İcraiyyə Komitəsində təmsil olunan təhsil nazirinin müavini Firudin Qurbanov nəyə görə bu yöndə əməli tədbirlərin görülməməsinə göz yumur? İllərdi ayrılan astronomik vəsaitin hesabatını tələb etmək, daha sonra isə səmərəli xərclənməsi üçün AFFA rəhbərliyi ilə məsləhətləşmələr aparmaq Qurbanovun ümdə borcudu. Daha gəlib İcraiyyə Komitəsinin iclaslarında “lehinə” səs verməklə futbol təsərrüfatına töhfəsini bitmiş hesab etməli deyil. İlk növbədə məsul olduğu qurumun burnu altında görülən işlərə nəzarət etməli və keyfiyyətsiz işləyən təşkilat rəhbərliyindən hesabat tələb etməlidi.
Əlbəttə, nazirlik tək Firudin bəydən ibarət deyil. Lakin fakt budu ki, “Vətən” Vətənə lazımınca xeyir vermir. Ola bilər “Vətən” hansısa vətəndaşlar üçün faydalıdı, lakin biz futboldan danışırıq və bu sahədə işlər peşəkar səviyyədə qurulmalıdı, şəxsi mənafe güdülməməlidi. Arabir hansısa aşağı yaş qrupundan olan millilərimizdə görünən 1-2 yeniyetmə milyonların qarşılığında ümmandakı damladı.
CEYHUN ƏLİYEV