Ölkə futbolu
Çempionluğu “Qəbələ” rəhbərliyi də istəməlidi
Bir həftə içində iki “Qəbələ” gördü…
Bir həftə içində iki “Qəbələ” gördük. Öncə “Qarabağ”la çempionat matçında əla oyun göstərib uduz(durul)an, daha sonra kubokda “Zaqatala” qarşısında aciz qalıb penaltilərlə mərhələ adlayan komanda.
Təzaddı. Elə “Qəbələ”nin bu heyətlə çempionluq mübarizəsindən qopmaması da təzaddı. Əsas rəqibi “Qarabağ”la yarışda daha zəif büdcəyə, heyətə malik olmaqla qızıl medal arzusundan əl çəkməmək kollektivin fədakarlığından başqa bir şey deyil. Pulun daha çox olduğu vaxtlarla müqayisədə, indi “Qəbələ” nəticə baxımından daha yaxşıdı. Bununla belə, finişdə belə durumla davam gətirmək olmayacaq.
“Qəbələ” çempion ola bilməz. Çempionluğu Roman Qriqorçuk qədər rəhbərlik də istəməlidi.
Azərbaycan kubokunun 1/8 final mərhələsi çərçivəsində keçirilən oyunlar arasında ən çox diqqətçəkən məqam çempionluğa iddialı “Qəbələ”nin evdə 1-ci divizion təmsilçisi “Zaqatala”nı 120 dəqiqə ərzində üstələyə bilməməsi oldu. Qonaqların baş məşqçisi Şaban Şirdanov matç ərzində heç bir dəyişikliyə əl atmadan güclü rəqib qarşısında 2 saat davam gətirən kollektiv seçə bilmişdi.
“Qırmızı-qaralar”ın diviziondan olan rəqibi üstələyə bilməməsi də göstərdi ki, komandada hər şey qaydasında deyil. Baş məşqçi əlinin altındakı döyüşkən “11-lik”də dəyişiklik edən kimi işlək motorda problemlər ortaya çıxır. Əvəzedicilərin səviyyəsi qaneedici olmadığından komandada xaos başlayır və nəticə pisləşir.
Faktiki “Qəbələ”də çempionluğa oynayan komandanın yükünü çəkmək gücündə olan 12-13 futbolçu var. Rəşad Eyyubov, Ürfan Abbasov, Asif Məmmədov, Tellur Mütəllimov və heyətdəki əksər gənclər Qriqorçukun tələblərini yerinə yetirə biləcək gücdə deyil. Petar Franyiç ilk gündən özünü doğrultmayıbsa, Rafael Santosda da ciddi geriləmə var. Hətta bu futbolçuların məcburiyyətdən – oyunçu qıtlığı üzündən heyətdə olduğunu da deyə bilərik.
Nə etməli? Bu sualı “Qəbələ” rəhbərliyi özünə verməlidi. Həqiqətən çempionluq, komandanın inkişafını, uğurların davamını istəyirlərsə, problemin həllini tapmalıdılar. “Qəbələ” Azərbaycanda brendə çevrilməkdədi, qitə səhnəsində də nəticələri yaxşılaşdırmağa ümid var. İndiki məqamda yeganə lazım olan komandaya diqqəti artırmaq, kəsilmiş büdcəni bərpa etməkdi. Baş məşqçinin, inzibati heyətin, kollektivin əməyi heyfdi, əziyyət çəkib, iş görüblər. İndi klub rəhbərliyi onlara dəstəyini əsirgəməməli, heyəti həqiqətən gücləndirəcək futbolçuların alışı üçün vəsait xərcləməlidilər.
Komandanın bu gün əla forvarda, sağ cinah müdafiəçisinə, kənar yarımmüdafiəçilərə ciddi ehtiyacı var. Elə dayaq yarımmüdafiəçi funksiyasını yerinə yetirən Rəşad Sadiqova da layiqli əvəzedici lazımdı. Rotasiya aparılması mümkün olan, hansısa futbolçunun yoxluğu hiss olunmayan heyətlə Qriqorçuk “Qarabağ”la mübarizə aparacaq komanda qura bilər. Hər nə qədər çətin olsa da, bu işi elə qışda görmək lazımdı. Heç nə itirilməyib, digər Premyer Liqa klublarından yaxşı yerli oyunçular da tapmaq olar, uyğun qiymətə əcnəbi də – təki rəhbərlik kisənin ağzını açsın.
Çempionatdakı məlum limitə görə Qriqorçuk hər tur hansısa əcnəbi oyunçusunu məcburiyyətdən ehtiyatda oturdur. “Qırmızı-qaralar”ın yerlilərindən isə yalnız Ruslan Qurbanov istənilən səviyyədə oyun sərgiləyə bilir. Cavid Hüseynov məlum səbəblərdən hələ tam formada deyil, Məhəmməd Mirzəbəyovun çıxışını isə normal saymaq olar. Amma digərləri “Qəbələ”ni çempionluğa daşıyacaq gücdə deyil. Avrokuboklarda əsasən, əcnəbi oyunçulara güvənən Qriqorçukun komandasının oyununu burada da məhz meydana buraxdığı az sayda olan yerlilər korlayır. Məsələn, “Anderlext”lə matçlarda Mirzəbəyovla Rəşad Eyyubovun, “Maynts” və “Sent Etiyen”lə Bakıdakı qarşılaşmada Rəşad Sadiqovun kobud səhvləri “qırmızı-qaralar”ın xalsız qalmağına səbəb olmuşdu.
“Qarabağ”la oyundakı məlum hakim səhvi danılmazdı. Lakin “Qəbələ” bir səhvin altında əziləcək vəziyyətdə olmamalıdı. “Zaqatala” ilə oyun göstərdi ki, komandada sabitlik və rotasiyaya imkan verən heyət yoxdu. Qızıl medal istəyən komandanın 2 bərabərgüclü heyəti olmalıdı, “Qəbələ”də isə bunun heç biri də tam deyil.
ELMAR ABDULLA-ZADƏ