Ölkə futbolu
Futbol təsərrüfatında səfərbərlik: hər şey “Qarabağ” üçün!
Yenə Bakı, yenə italyanlar, yenə qələbə lazımdı. Tərəzinin …
Yenə Bakı, yenə italyanlar, yenə qələbə lazımdı. Tərəzinin bir gözü barədə əlavə şərhə ehtiyac varmı? Təbii ki, yox. Elə digər gözü də tanışdı. Yenə ölüm-dirim mübarizəsinə “Qarabağ” qalxmalı olacaq.
Ölkə çempionunun Çexiyada aldığı məğlubiyyət öncəki turlarda qazandığı dividendlərin üstündən qalın bir xətt çəkdi. İndi hər şey sıfırdan başlamalıdı. Ancaq fərq bundadı ki, səhv etmək ixtiyarı olmadan. Əgər ilk turda “Slovan”la evdə uğursuz nəticəni sığortalamağa şans var idisə, “Fiorentina” ilə büdrəməni düzəltmək qeyri-mümkün olacaq.
O vaxt “İnter” səddini aşmaq mümkün olsa da, Miroslav Zelinkanın “qara fiti” çempionumuzun bütün zəhmətini yerə çırpmışdı. Lakin bu qədər bənzərliklə yanaşı, bir fərq də var. Özü də olduqca ciddi! Məsələ burasındadı ki, Milan klubu ölkəmiz gələndə 1/16 finala yüksəlmək vəzifəsinin öhdəsindən gəlmişdi. “Bənövşəilər” isə eyni uğuru təkrarlamaq üçün Bakıdan minimum 1 xalla ayrılmalıdılar. Özü də nəzərə alsaq ki, İtaliya klubları tarixən dəmir müdafiəylə seçiliblər, bu, “süvarilər”in işini daha da çətinləşdirir. Başqa sözlə, rəqib paytaxtımızı qol buraxmadan tərk etmək üçün əlindən, ayağından, başından gələni edəcək.
Əlbəttə, PAOK – “Slovan” matçı bərabərliklə bitsə, Ağdam təmsilçisinə də heç-heçə kifayət edəcək. Ancaq kim təminat verə bilər ki, son dəqiqələrdə tərəflərdən biri tərəzinin gözünü öz xeyrinə dəyişməyəcək? Axı, de-fakto nə Çexiya, nə də Yunanıstan klubuna bərabərlik sərf etmir. Liberetslilər isə Bakıdakı oyunun nəticəsindən asılı olmayaraq, heç-heçə oynayacaqları təqdirdə, 1/16 final şanslarını itirir. Deməli, Yunanıstandakı heç-heçəyə çox da bel bağlamaq olmaz.
Ancaq digər tərəfdən unutmaq da olmaz ki, rəqib İtaliyanın ən adlı-sanlı klublarından biridi. Yəni, Qurban Qurbanovun drujinası rəqibə açıq futbol təklif edib, start fiti ilə böyük qüvvəylə irəli atılsa, bu, faciəylə nəticələnə bilər. Böyük ehtimalla, hətta Yunanıstandan erkən qol sədası gəlsə belə, “süvarilər” ilk 75 dəqiqədə ehtiyatı əldən verməyəcəklər. Əlbəttə, bu versiya qapılarında qol görməmək şərti ilə qüvvəyə minəcək. Çünki italyanlar qol vursalar, Qurbanovun komandası “va-bank” getməyə məhkum olacaq.
Unutmayaq ki, çempionumuzun Avroliqa qrupunun son oyununda Maksim Medvedev və Miçel Madeyra kimi simaları iştirak edə bilməyəcəklər. Bu arada “kapitan göyərtəyə qayıdır” deməyi də unutmayaq. Ciddi zədə almasına rəğmən, müalicəni yarımçıq saxlayan Rəşad Sadıqov məşqlərə start verib. Təcrübəli kapitan həlledici görüşdə yaranan ağır duruma biganə qalmayıb və səhhətini riskə atmaq bahasına olsa belə, “Fiorentina”ya qarşı görüşdə iştirak etmək üçün əlindən gələni edir.
Fiqurlar üzrə qiymət verməklə bağlı yazını sabah təqdim edəcəyik. Hələliksə, hərbi terminologiya ilə yazıya yekun vuraq. Futbol təsərrüfatında milli səfərbərlik elan olunur: hamı və hər şey “Qarabağ” üçün!
CEYHUN ƏLİYEV
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı