Müsahibə
Oruc Balaşlı: "Qollarımın sayını 40-45-ə kimi yüksəltməyə çalışacağam"
Azərbaycan çempionatının 1-ci divizionunda ilk dövrə b…
Azərbaycan çempionatının 1-ci divizionunda ilk dövrə başa çatıb. Fasiləyə qədər olan hissəni “Zaqatala” üçün uğurlu saymaq olar. Əyalət təmsilçisi turnir cədvəlində 2-ci pillədə yer alıbsa, komandanın hücumçusu Oruc Balaşlı 20 qolla ən çox fərqlənən oyunçudu. Adıçəkilən oyunçu mövsümün 1-ci dövrəsi ilə bağlı futbolinfo.az saytına müsahibə verib:
– Əvvəla ötən həftəsonu“Qəbələ” ilə baş tutan matçla bağlı fikirlərini bilmək maraqlı olardı. Yaxşı mübarizə aparsanız da, mərhələ adlayan tərəf rəqib oldu…
– Çətin oyun olacağını bilirdik. Turu keçmək istəyirdik, bunun üçün də mübarizə apardıq. Hesabda da 2 dəfə geri düşməyimizə baxmayaraq, bərabərliyi təmin edə bildik. Amma penaltilər seriyasında yenildik.
– Oyundan əvvəl penaltilər üzərində məşq etmişdiniz?
– Bəli, matçdan əvvəl bunun üzərində çalışmışdıq. Hər gün yarım saat penaltiləri vurmaq üçün məşq edirdik.
– Bəs sonda qələbə qazanmaq üçün nə çatmadı?
– Yəqin ki, soyuqqanlı ola bilmədik.
– Baş məşqçiniz Şaban Şirdanov da 120 dəqiqə ərzində heç bir oyunçu dəyişikliyindən istifadə etmədi…
– Bu haqda bir şey deyə bilmərəm, məşqçimizin fikridi. Görünür, belə məsləhət bilib.
– Artıq 1-ci dövrə başa çatıb. 2-ci pillə sizin üçün nə dərəcədə gözlənilməz oldu?
– Mövsümün əvvəlində əsas hədəfimiz ilk 2 pillədən biri idi. Son turda məğlub olmasaydıq, fasiləyə ilk pillədə yollanacaqdıq. Amma mövsüm 1-ci pillədə başa vurmağı hədəfləmişik.
– Səncə, “Zaqatala” Premyer Liqaya nə dərəcədə hazırdı?
– Fikrimcə, komanda Premyer Liqaya vəsiqə qazansa, 3-4 nəfər səviyyəli oyunçuya ehtiyac var. Bu legioner də ola bilər, təcrübəli yerli də…
– Bombardirlər yarışında 20 qolla zirvədəsən…
– Mövsümün əvvəlində də əsas məqsədim bu idi. 30 qol vurmaq istəyirdim, artıq 20-sini vurmuşam. Çalışacam ki, qollarımın sayını 40-45-ə kimi yüksəldim.
– Bu qədər qol vurmağın nədən irəli gəlir? Divizionda səviyyə aşağıdı, ya sən formanın pik nöqtəsindəsən?
– Düzdü, səviyyə bir az aşağıdı. Ötən mövsüm bundan da zəif idi. O zaman 18 qol vurmuşdum. Amma yayda formama diqqət etdim, çalışdım. Bunun da bəhrəsini görürəm.
– Sənə elə gəlmir ki, divizionda bombardir olmaq hələ ölçü deyil? Çünki ötən illərdə Röyal Nəcəfov, İlham Allahverdiyev eyni uğura imza atmışdılar, amma davamı gəlmədi.
– Hədəfim var ki, Premyer Liqada da bombardir olum, bunun üçün çalışıram.
ELMAR ABDULLA-ZADƏ