ÇL-də 1/8 finalın püşkü atıldı

Bu gün bütün Avropanın diqqəti İsveçrənin Nyon şəhərinə yönəlib. Futbolinfo.az xəbər verir ki, Bakı vaxtı ilə saat 15:00-da Çempionlar Liqasının 1/8 final mərhələsinin püşkü atılıb.

Avropanın 16 ən güclü komandası 8 cütlük təşkil edib. Öncədən klublar qrup mərhələsində tutduğu yerlərə görə səbətlərə bölünüb.

Qrup qalibləri 1-ci, ikinci yer sahibləri isə 2-ci səbətdə yer alıb. Eyni qrupdan çıxan komandalar bir-birinə rəqib ola bilməzdi. Həmçinin, eyni ölkə təmsilçiləri 1/8 finalda qarşılaşmayacaqdı.

Qeyd edək ki, 1/8 final mərhələsinin ilk oyunları 2017-ci il fevralın 14-15 və 21-22-də keçiriləcək. Cavab oyunları isə martın 7-8 və 14-15-də baş tutacaq. Qrup qalibləri ilk oyunu səfərdə keçirəcək.
 
Çempionlar Liqası
1/8 final
 
Qrup qalibləri: “Arsenal” (İngiltərə), “Atletiko” (İspaniya), “Barselona” (İspaniya), “Borussiya” (Dortmund, Almaniya), “Lester” (İngiltərə), “Yuventus” (İtaliya), “Monako” (Fransa), “Napoli” (İtaliya). 

Qrup ikinciləri: “Benfika” (Portuqaliya), “Bavariya” (Almaniya), “Bayer” (Almaniya), “Mançester Siti” (İngiltərə), PSJ (Fransa), “Porto” (Portuqaliya), “Real” (İspaniya), “Sevilya” (İspaniya).

Püşkatma nəticəsində 1/8 final cütlükləri belə formalaşıb:

“Mançester Siti” (İngiltərə) – “Monako” (Fransa)
“Real” (İspaniya) – “Napoli” (İtaliya)
“Benfika” (Portuqaliya) – “Borussiya” (Dortmund, Almaniya)
“Bavariya” (Almaniya) – “Arsenal” (İngiltərə)
“Porto” (Portuqaliya) – “Yuventus” (İtaliya)
“Bayer” (Almaniya) – “Atletiko” (İspaniya)
PSJ (Fransa) – “Barselona” (İspaniya)
“Lester” (İngiltərə) – “Sevilya” (İspaniya)