Tərlan Əhmədov: "Hakimlər klublara büdcəsinə və adına görə fərq qoyur"

Azərbaycan kubokunun 1/4 final mərhələsi çərçivəsində keçirilən AZAL və “Qəbələ” arasındakı cavab matçından (0:1, ilk oyun 1:2) sonra meydan sahiblərinin baş məşqçisi Tərlan Əhmədov mətbuat konfransında jurnalistlərə oyunla bağlı fikirlərini bildirib. Futbolinfo.az xəbər verir ki, o, öncə bunları söyləyib: 

– Şansımız var idi. Yaxşı oynadıq. İkinci yarıda qol buraxandan sonra ümuumiyyətlə sürətli oyunadıq. Təəssüf ki, bəzi amillər… Fariz (Yusifov) hansı oyunumuzdadısa, bizə qarşı qərəzlidi. Fərq qoymaq lazım deyil, görünür, hakimlər klublar arasında büdcə və ad baxımından fərq qoyur. Tounkaranın gəlişi hücum xəttimizdə daha aqressiv oynamağımıza səbəb olub. Çalışacağıq ki, daha istəkli AZAL yaradaq.

– Penalti epizodunun təkrarına baxmısınız?
– Mən belə şeylərə baxmıram. Onsuz hər şeyə bəhanə tapılacaq. “Sumqayıt”la oyunda şans 50/50 idi, amma referi penalti verdi. 17 oyuna çıxmışıq, amma penalti vurmamışıq. Kimə deyirik, cavab verirlər ki: “var idi”. Komandalara fərq qoyulursa, deyin işimizi bilək.

– Məsələ ilə bağlı harasa şikayət etmək fikriniz var?
– İndiyə kimi nəsə edən olub ki? Mən yazmışam ki, bəzi hakimlər oyunumuza təyinat almasın. 

– Sizə elə gəlmir ki, “Qəbələ” ilə çempionat oyununa görə bu gün Fariz təyin edilmişdi?
– Hər şey ola bilər. Onsuz da “Qəbələ” ilə aramızdakı büdcədə fərq var. Çalışırıq, düşdüyümüz vəziyyətdən çıxaq.

– Demişdiniz ki, lazım gəlsə, öz hesabıma yeni futbolçular alacağıq…
– Komandadan gedənlər də olacaq. Artıq vəziyyət elədi ki, 1 futbolçuya görə bunu etmək olar. Rəhbərliklə söhbət etmişəm, 20-21 səviyyəli futbolçu saxlamalıyıq. Əvəzedici komandadan yaxşı oyunçu götürmüşük. 2-3 yaxşı futbolçu cəlb edəcəyik.

ELMAR ABDULLA-ZADƏ