Ölkə futbolu
Əzəli rəqiblər yenidən üz-üzə
Bu gün Topaz Premyer Liqasında 2017-ci ilin ilk, cari mövs&…
Bu gün Topaz Premyer Liqasında 2017-ci ilin ilk, cari mövsümün isə 15-ci turuna yekun vurulacaq. Futbolinfo.az xəbər verir ki, son oyun günündə də iki qarşılaşma baş tutacaq.
Öncə “Zirə" öz meydanında AZAL-la münasibətlərinə aydınlıq gətirəcək.
Turun yekun qarşılaşmasında isə bütün çempionatların daimi iştirakçısı olan iki köklü klubumuz – "Qarabağ" və "Neftçi" üz-üzə gələcək.
Topaz Premyer Liqası
15-ci tur
29 yanvar
15:00. “Zirə” – AZAL
Hakimlər: Rəvan Həmzəzadə, Yaşar Abbasov, Mübariz Haşımov, Vüsal Qənbərov.
Əlavə köməkçi hakimlər: Orxan Məmmədov, Elvin Əsgərov.
AFFA nümayəndəsi: Rauf Hüseynli.
Hakim-inspektor: Murad Məmmədov.
Zirə İdman Kompleksinin stadionu.
Ötən mövsümlə müqayisədə bu mövsüm o qədər də inamlı təsir bağışlamayan "Zirə"ni yeni ilin ilk turunda AZAL-la görüş gözləyir. Hansı ki, bu komanda çempionatın aşkar autsayderinə çevrilib. Bu üzdən də Ayxan Abbasovun komandası yeni ilə qələbə ilə başlamağa çox yaxındır. Çünki zirəlilərdən fərqli olaraq, "təyyarəçilər" qış fasiləsini də ölkə daxilində keçirməli oldular. Maliyyə problemləri olan Şüvəlan təmsilçisinin heyətini gücləndirmək baxımından da ciddi addımlar atdığını söyləmək olmaz. Belədə AZAL-ın Zirədən sürpriz nəticə ilə dönmək şansları yüksək qiymətləndirilmir.
Elə statistika da "Zirə"nin daha şanslı olmasından xəbər verir. Tərəflərin son 4 qarşılaşmasında hər iki komanda qol vurub. “Zirə” öz meydanında xal itirməyib. AZAL son 4 matçda qalib gəlməyib. Cari mövsüm baş tutan görüşlərə gəlincə, Zirədə baş tutan mövsümün ilk duelində meydan sahibləri 3 xala sevinsələr də, Şüvəlandakı qarşılaşmada heç-heçə qeydə alınmışdı.
Statistika: 6 oyun, +3, =2, -1, top fərqi 10-6
1-ci dövrə: 3:1
2-ci dövrə: 1:1
17:30. “Qarabağ” – “Neftçi”
Hakimlər: Ramil Diniyev, Vaqif Musayev, Mehman Mahmudov, Coşqun Həsənov.
Əlavə köməkçi hakimlər: Rauf Cabbarov, İnqilab Məmmədov.
AFFA nümayəndəsi: Əsgər Əmirəliyev.
Hakim-inspektor: Xaqani Məmmədov.
Bakı. “Azersun Arena”.
Hesabat turuna Azərbaycan derbisi ilə yekun vurulacaq. Söhbət son çempion “Qarabağ”la əzəli rəqibi “Neftçi”dən gedir. Düzdü, hazırda bu komandalar turnir cədvəlinin tam fərqli qütblərində məskən salıblar. Ağdam klubu qış fasiləsinə lider kimi yollandığı halda, paytaxt təmsilçisi sonuncudan əvvəlki yerdə qərarlaşıb. Elə bu oyunda da Qurban Qurbanovun komandası daha şanslı sayılır. Reynaldonu Türkiyənin "Adanaspor" klubuna satan Ağdam klubu bu qış məhz "Neftçi"dən Elşən Abdullayevi heyətə qatmaqla yanaşı, həm də "İnter"dən Ağabala Ramazanovu aldı. Elə "Neftçi" də "Qarabağ"ın gənc yarımmüdafiəçisi Namiq Ələsgərovu sıralarına qatıb. Amma "ağ-qaralar"ın transfer siyahısındakı yenilərin sayı daha çoxdur. Georgi Navalovski, Zdenek Folprext, İqnasio Errera, Kirill Petrov, Pavel Dreksa, Ruslan Abışov və Hüqo Barqas kimi yeni gələn oyunçuların komandaya nə dərəcədə faydalı olduğunu elə bu gündən etibarən görə biləcəyik.
Tarixə nəzər saldıqda görürük ki, “Qarabağ” son 4 görüşdə xal itirməyib. “Neftçi” son iki səfərdə qola da həsrət qalıb. Bakılılar son 7 səfər matçında qələbə qazana bilməyib. Cari mövsüm baş tutan görüşlərə gəlincə, ilk dövrədə Ağdam klubu 3, ikinci dövrədə isə 2 cavabsız qolla qalib gəlib. Paytaxt təmsilçisinin həm bu rəqiblə oyunlardakı, həm də bütövlükdə cari mövsümdəki uğursuz gedişata son qoymaq yolunda nəyə nail olacağı maraqla gözlənilir.
Statistika: 66 oyun, +24, =24, -18, top fərqi 69-60
1-ci dövrə: 3:0
2-ci dövrə: 2:0