“Kəpəz” bayılır, “Neftçi” ayılır…

Qış fasiləsindən sonra baş tutan ilk tur məhsuldarlığı ilə yadda qaldı. Baş tutan 4 oyunda qapılara orta hesabla 3 qol vuruldu. Bu matçlarda ən böyük pay sahibi “İnter” – “Kəpəz” görüşünün iştirakçıları oldu.

Süni meydan ola, oyun da qar altında baş tuta. Bəh-bəh-bəh! Futbolçulara bircə xizək çatmırdı. Sürüş ki, sürüşəsən! Elə qapılara vurulan qollar da havanın şıltaqlığının nəticəsi idi. Oyuna gəlincə, Zaur Svanadze bir daha bacarığını nümayiş etdirməyi bacardı. Qış fasiləsində 2 aparıcı oyunçusundan məhrum olan, transfer qadağasına görə, heyətə heç kimi cəlb edə bilməyən “İnter”i, heç şok terapiyası – “Beynəlxalq Bank”ın sponsorluqdan imtina etməsi də sarsıtmadı. Bu boyda həngaməyə duruş gətirən kollektivi “Kəpəz”in “kakoy-to” qolu necə sındıra bilərdi? Heç cür! Gəncəlilər isə medal iddialarından daha 6 xal geri düşdülər. İndi 3-cü pilləylə onların arasındakı fərq 13 xalla ölçülür. Başqa sözlə, 3-cü pillə əlçatmaz zirvəyə bənzəyir.

Müvəqqəti olaraq, “Neftçi”nin vəkillik funksiyasını üzərinə götürən “Qəbələ” qalib gəlməyə borclu olduğu “Sumqaylt”la matçda 2 vacib xalından oldu. Bəli, Roman Qriqorçukun yetirmələri 90 dəqiqə hücum etdi. Bəli, “qırmızı-qaralar” saysız-hesabsız qol imkanları yaxaladı. Bəli, “futbol İlahəsi” bu görüşdə “Sumqayıt”ın tərəfində idi.  Bəli, zədəli Baqali Dabonun yoxluğunda komandanın hücumçusu yox idi və Daniel Subotiç yalnız növbəti turdan komandasına kömək edə biləcək. “Ac həriflər”də necə deyir? “Hə, noolsun?”. Əvvəla onu qeyd edək ki, tarixdə nəticə qalır və bu heç-heçə Samir Abasov və komandasının aktivinə yazıldı. İkinci, transferləri vaxtında həyata keçirmək lazımdı. Bu, qatar yola düşdükdən sonra taksiylə növbəti dayanacağa çatmağa çalışmağa bənzəyir.

“Zirə” “son vaqon”a çatmaq yürüşünə start verdi.  Ayxan Abbasovun debüt oyunu xoş sonluqla başa çatdı. Ancaq qələbə autsayder üzərində qazanıldığından, bu 3 xala “möhtəşəm dönüş” möhürü vurmaq doğru olmaz. “Cücəni payızda sayarlar”. Futbolumuzda isə apreldə. Hələliksə, “qəsəbəlilər” turnir cədvəlindəki mövqelərini bir qədər yaxşılaşdırdılar. Komanda Gəncə səfərindən də xalla dönməyi bacarsa, 4-cü pillə uğrunda mübarizəyə “əlcək atmış” olacaq. Niyə də yox!?

Sökülüb və yenidən yığılmış “Neftçi” pərəstişkarlarını sevindirdi. Komanda qalib gələ bilməsə də, “Qarabağ”la səfərdən 1 xalla dönməyi bacardı. Özü də hücumçusuz. Təlim-məşq toplanışından sonra bir qədər ağır görünən ağdamlılar yəqin ki, bu yükdən 2-3 turdan sonra azad olacaqlar. “Neftçi”isə elə bir vəziyyətdədi ki, rəqibin kimliyindən asılı olmayaraq, qalan 13 oyunun hamısında qələbəyə köklənməlidi. Əlbəttə, avrokuboklara çempionat vasitəsi ilə yollanmaq istəyirsə. 

CEYHUN ƏLİYEV