Bəs, “Neftçi”nin günahı nə?

“Neftçi” peşəkarlıq nümayiş etdirir. Bu klubun indiki rəhbərliyi əvvəlkilərdən fərqli olaraq, hər turdan sonra şivən salmır, səhvləri səhv kimi qəbul edir, qərəz olaraq yox. Halbuki “Qarabağ”la oyunda 3, “Qəbələ” ilə matçda 2 xalı haikm səhvləri nəticəsində oğurlanan bakılılar bəlkə də AFFA Hakimlər Komitəsini ağ yuyub, qara sərməliydi.

Düzdü, “Neftçi”nin lehinə də hakim səhvləri olub. İlk turun AZAL-la oyununda, eləcə də “Bakcell Arena”da “İnter”lə görüşdə məhz hakim səhvləri onları qələbəyə aparmışdı. İndi isə məhz həmin “borclar bağlanılır”.

Qəbələdəki son matçda “Neftçi” təkcə ofsayddan buraxdığı qola görə narazı qalmamalıdı. Həmin epizodda yan xətt hakiminin kobud səhvi matçın nəticəsini müəyyənləşdirdi. Lakin hələ 20-ci dəqiqədə “Qəbələ”nin qapısına penalti təyin olunmalıydı. Müdafiəçinin cərimə meydançası daxilində əlinə dəyən topun penaltidən başqa cəzası yox idi. Lakin ofsayddan qolu sayan Yaşar Abbasov həmin vəziyyətdə baş hakim Fariz Yusifova yardım etmədi.

Bu kimi səhvlərdən sonra nə meydan sahiblərinin baş məşqçisi Roman Qriqorçukun səmimiliyinə inanırsan, nə də vitse-prezident Fariz Nəcəfovun. “Qəbələ”nin bəyanatı isə sadəcə, gözdən pərdə asmaq üçündü. Hakimləri “Qarabağ”a kömək etməkdə suçlayan klub özü bundan yararlanmamalıdı. Deməli, “Qəbələ”nin lehinə olarkən bu, “sadəcə, səhv”, “Qarabağ”ın lehinə olarkən “ağdamlılara kömək” adlanır? Bəs, hər 2 oyunda zərbə alan “Neftçi” neyləsin?

Futbol səhvlər oyunudu – bu səhvi hakim də edə bilər, məşqçi də, futbolçu da, rəhbər də. Səhvləri ictimaiyyətə necə sırımaq əsl məharət işidi. Kimisi səhvini etiraf edir, kimisi bunu başqasının boynuna atır, kimisi də sudan səbəb gətirib iz itirir. Əslinə qalsa, “Qəbələ” son matçda hakimləri səhvə özü təhrik edirdi. Dəfələrlə penalti üçün simulyasıya edən futbolçular 2 epizodda buna görə sarı vərəqə də aldı. Hakimi aldatmaq cəhdi isə adətən instinktiv olmur, məşqçilər tərəfindən tapşırılır.

Heç kəs özünü mələk kimi göstərməsin, adətən başqasını nədə ittiham edirsənsə, özün də o üsuldan xəbərdar olur və tətbiq etməyə çalışırsan. Amma bəlkə də “Qəbələ” “Qarabağ”ın digər rəqiblərlə oyunlarını müzakirəyə çıxarmasaydı, təzyiq altına saldığı hakimlərdən belə hədiyyələr almayacaqdı. İndi “Neftçi” də eyni üsula əl atsın? O zaman bu xaosun sonu nə olar?

CAVAD