Liderlər üçün paytaxt klubları ilə sınaq

Bu gün Topaz Premyer Liqasında 17-ci tura start veriləcək. Futbolinfo.az xəbər verir ki, iki gün davam edəcək turun iki oyunu Bakıda, digər ikisi paytaxtdan kənarda baş tutacaq. 

Turun açılış matçında çempionluq uğrunda mübarizə aparan, lider "Qarabağ"ın əsas izləyicisi "Qəbələ" AZAL-la münasibətlərinə aydınlıq gətirəcək. İlk oyun gününün digər görüşündə ötən mövsümün mükafatçıları “Qarabağ”la “Zirə”nin dueli də maraq doğurur. 

Topaz Premyer Liqası
17-ci tur
8 fevral

“Qəbələ” – AZAL

Qəbələ şəhər stadionu, 15:00.

Hazırda ikinci pillədə qərarlaşmış “Qəbələ”ni bu turda çox da çətin sınaq gözləmədiyini söyləmək olar. Hər halda sonuncu pillədə qərarlaşmış AZAL-ı, özü də doğma meydanda məğub etmək Roman Qriqorçukun komandası üçün problem olmamalıdır. Axı bu klubun hədəfi cari mövsümdə ilk çempionluğunu rəsmiləşdirməkdir. Bu yolda "təyyarəçilər"i Bakıya xalsız yola salmaq bölgə klubu üçün vacibdir.

Bu komandaların əvvəlki oyunlarının statistikası da “Qəbələ”nin qələbə qazanacağından xəbər verir. Hər halda bölgə təmsilçisi evdəki son iki oyunda xal itirməyib. AZAL son 3 matçda qol da vura bilməyib. Tərəflərin bu mövsüm baş tutmuş oyunlarına gəlincə, "Qəbələ" öz meydanında birinci dövrəyə təsadüf edən görüşdə 3 cavabsız qola sevinmişdi. İlk yarıda Filip Ozobiç, fasilədən sonra isə Ruslan Qurbanova Roman Hüseynov fərqlənmişdi. İkinci dövrədə Bakıda baş tutan qarşılaşmada isə qapılara qol vurulmamışdı. Hətta qalmaqalla da yadda qalan həmin görüşdə "Qəbələ" vacib xallar itirmişdi. 

Bütövlükdə isə, indiyə qədər tərəflər arasında baş tutan 28 oyunda paytaxt təmsilçisinin daha çox qələbə qazandığını görürük. Qəbələlilər bu mənada hesaba tarazlıq gətirə bilərlər. Top fərqində də AZAL üstündür. Amma məlum səbəblərdən Tərlan Əhmədovun komandası daha iddialı və imkanlı "Qəbələ"yə əvvəlki illərdəki kimi müqavimət göstərməyə qadir deyil. Hətta qış fasiləsindən sonrakı oyunlarında da Şüvəlan təmsilçisi "Zirə" və "Qarabağ"a oxşar hesabla (1:2) uduzub. Ağdamlılarla görüşdə aparıcı fiqurlarından Sadio Tounkaranın qırmızı vərəqə alaraq cəzalı duruma düşməsi də AZAL-ın şanslarını azaldan məqamlardandır.

Statistika: 28 oyun, +9=9-10, top fərqi 31-34

1-ci dövrə: 3:0
2-ci dövrə: 0:0

“Qarabağ” – “Zirə”

Bakı. “Azersun Arena”, 17:30.

Əsas izləyicisi ilə müqayisədə, lider “Qarabağ”ı bu turda nisbətən daha çətin sınaq gözləyir. Axı Ağdam klubunun rəqibi ötən mövsümün gümüş mükafatçısı "Zirə"dir. Düzdür, Qurban Qurbanovun çalışdırdığı komanda indiyədək “Zirə”yə uduzmayıb. Son 4 oyunda eyni – 2:0 hesabı ilə qələbə qazanan Ağdam təmsilçisi evdə ümumiyyətlə xal itirməyib. “Zirə” son 5 matçda hətta qol da vura bilməyib. 

Statistikaya inansaq, "Qarabağ" yenə də qələbə qazanacaq. Amma Ayxan Abbasovun çalışdırmağa başladığı "Zirə" qış fasiləsindən sonra inamlı çıxış edir. Öncə AZAL-a (2:1), ardından "Kəpəz"ə (1:0) qalib gələn zirəlilər üçün liderlə səfər matçında heç-heçə də sərfəli nəticə sayıla bilər. Lakin "Qəbələ"nin autsayder AZAL-la oyunda xal itirmək ehtimalının çox az olduğunu nəzərə alsaq, Ağdam klubu liderliyi əldən verməməyə çalışacaq.

Bu mövsüm baş tutan oyunlara gəlincə, bir daha "Qarabağ"ın hər iki oyunda 2:0 hesablı qələbə qazandığını xatırladaq. Birinci dövrədə Ağdam klubu Rahid Əmirquliyevin dublu sayəsində 3 xala sevinmişdi. İkinci dövrədə isə Dani Kintana ilə Elvin Yunuszadə "Zirə"ni məyus etmişdi.

"Zirə"nin əsas heyət oyunçularından olan Sezar Meza Kolli liderlə oyunda komandasına kömək edə bilməyəcək. O, ötən tur "Kəpəz"lə oyunda qırmızı vərəqə aldığına görə cəzalı duruma düşüb. "Qarabağ"da isə itkilər daha çoxdur. Son turda uzun müddətə sıradan çıxan Dani Kintana ilə yanaşı, kapitan Rəşad Sadıqov da hələ tam hazır deyil. Komandanın digər aparıcı futbolçusu Riçard Almeydanın isə cəza müddəti başa çatmayıb.

Statistika: 6 oyun, +5=1-0, top fərqi 12-1

1-ci dövrə: 2:0
2-ci dövrə: 2:0