Premyer-liqa
Premyer Liqada yubiley paytaxt derbisi
Bu gün Topaz Premyer Liqasında 17-ci tura yekun vurulacaq. Futbo…
Bu gün Topaz Premyer Liqasında 17-ci tura yekun vurulacaq. Futbolinfo.az xəbər verir ki, son oyun günündə də iki görüş baş tutacaq.
Öncə turnir cədvəlində qonşu olan iki komanda – “Sumqayıt” və “Kəpəz” üz-üzə gələcək. Turun qapanış matçında isə yubiley xarakterli paytaxt derbisi – “İnter” – “Neftçi” görüşü baş tutacaq.
Topaz Premyer Liqası
17-ci tur
9 fevral
“Sumqayıt” – “Kəpəz”
Hakimlər: Rəhim Həsənov, Akif Əmirəli, Cavanşir Yusifov, Orxan Məmmədov.
AFFA nümayəndəsi: Rauf Əmirov.
Hakim-inspektor: Əhmədağa Cabbarov.
Sumqayıt. “Kapital Bank Arena”, 15:00.
Bu komandalar arasında cari mövsümdəki hər iki qarşılaşma heç-heçə nəticələnib. Birinci dövrədə Sumqayıtda baş tutan oyunda bu qış komandanın sıralarını tərk edən Vaqif Cavadov meydan sahiblərini hesabda önə keçirsə də, Kərim Diniyev gəncəliləri məğlubiyyətdən xilas etmişdi. Gəncədə baş tutan son qarşılaşmada isə qapılara qol vurulmamışdı.
Ümumiyyətlə, “Sumqayıt” 7 oyundur bu rəqibinə qalib gələ bilmir. Baxmayaraq ki, tərəflər arasında baş tutan əvvəlki oyunlarda bütün göstəricilərdə bərabərlik mövcuddur. Belə ki, əvvəlki 14 oyunda tərəflər hərəyə 4 qələbə qazandığı halda qalan 6 oyun heç-heçə bitib. Vurulan qol sayında da bərabərlik var – hərəyə 17 top. Bu dəfə də heç-heçə qeydə alınsa, bu tendensiya ən azı növbəti dövrəyə qədər davam edəcək.
Amma bu oyunda Samir Abasovun komandasının qonaqları məğlub yola salmaq şansı daha çoxdur. Məsələ burasındadır ki, sumqayıtlılar qış fasiləsindən sonra "Qəbələ" (1:1) və "İnter" (2:2) kimi iddialı rəqiblərindən xal almağı bacardığı halda, Şahin Diniyevli "Kəpəz" müvafiq olaraq "İnter" (1:4) və "Zirə"yə (0:1) uduzub. İndi Gəncə klubu "Sumqayıt"la oyunda uğursuz gedişata son qoymağa çalışacaq. Lakin "Sumqayıt"ın doğma publika önündə uğurlu seriyanı davam etdirmək üçün əlindən gələni edəcəyi şübhəsizdi.
"Kəpəz" gənclik şəhərinin təmsilçisi ilə görüşə həm də ciddi itkilərlə çıxacaq. Belə ki, qonaq komandanın heyətində cəzalı və zədəli futbolçular var. “Zirə”yə qarşı son çempionat oyununda xəsarət alan Şəhriyar Əliyev və əvvəlki matçdan zədəli olan kapitan Tural Axundov sağalmayıb. Komandanın cəzalı üzvü isə Renan Da Silvadır.
Statistika: 14 oyun, +4=6-4, top fərqi 17-17
1-ci dövrə: 1:1
2-ci dövrə: 0:0
“İnter” – “Neftçi”
Hakimlər: Əliyar Ağayev, Rza Məmmədov, Zeynal Zeynalov, Mübariz Haşımov.
Əlavə köməkçi hakimlər: Ömər Paşayev, Elvin Əsgərov.
AFFA nümayəndəsi: Ramiz Mustafayev.
Hakim-inspektor: Vüsal Əliyev.
Bakı. “İnter Arena”, 17:30.
Bu oyun “İnter”lə “Neftçi” üçün xüsusi əhəmiyyət kəsb edir. Məsələ burasındadı ki, bu iki klub arasında paytaxt derbisi 50-ci dəfə baş tutacaq. Əvvəlki 49 oyundan cəmi 13-də "İnter" qalib gəlibsə, "Neftçi" 21 dəfə 3 xala sevinib. Elə top fərqində də "ağ-qaralar" daha öndədirlər. Bu komanda son 5 oyundan qolsuz ayrılmayıb.
Son iki oyunda meydan sahibi komanda eyni – 2:1 hesabı ilə qələbə qazanıb. Belə ki, birinci dövrədə "İnter", ikinci dövrədə isə “Neftçi” 3 xalı bayram edib. 5-ci turda indi "Qəbələ"nin şərəfini qoruyan Araz Abdullayevin penaltidən vurduğu qol "İnter"i məyus etsə də, Rauf Əliyevin son dəqiqələrdə vurduğu iki top "Neftçi" üzərində əzmkar qələbə üçün yetərli olmuşdu. İkinci dövrədə isə Jonas Pesalli ilə Araz Abdullayevin vurduğu qolların qarşılığında "İnter"in müdafiəçisi Zurab Xizanişvilinin vurduğu top sadəcə, təsəlli xarakteri daşımışdı.
Cari mövsümdəki ənənəyə əsasən bu dəfəki derbidə "İnter"in qalib gələcəyini düşünmək olar. Hər halda liderlərin turu qələbə ilə başa vurduğunu nəzərə alsaq, onların əsas izləyicisi olan Zaur Svanadzenin komandasının başqa çıxış yolu yoxdu. Son turda "Sumqayıt"la səfər oyunundakı xal itkisi də "bankirlər"i mütləq qələbə qazanmağa vadar edir. Amma "Neftçi" də uğursuz gedişata son qoymaq istəyindədi. Qış fasiləsində heyətini yeniləyən Elxan Abdullayevin komandası "Qarabağ"la görüşdə qələbəni əldən verdisə, son turda da "Qəbələ"yə minimal hesabla məğlub oldu. İndi "ağ-qaralar" nəhayət qələbə qazanmaq istəyindədi.
Statistika: 49 oyun, +13=15-21, top fərqi 51-70
1-ci dövrə: 2:1
2-ci dövrə: 1:2
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Premyer-liqa2024-04-30 09:30
“Yalnız birlikdə olaraq uğurlar qazana bilərik” – Ozobiç
- I Liqa2024-04-30 14:45
“Araz Saatlı”nın məşqçisinə 2 oyunluq cəza