Premyer-liqa
Dumanın gizlətmədiyi səhv
“Qəbələ” – AZAL. Turun Abşeron yarımadas?…
“Qəbələ” – AZAL. Turun Abşeron yarımadasından kənarda keçirilən tək matçı. Qarlı dağlar aşaraq, çox olmasa da, bir neçə el dolaşaraq qarşılaşmadan 3 saat əvvəl – təxminən saat 12-də Qəbələyə çatdım.
Matçın startından çox əvvəl gəldiyimdən nə iləsə vaxt keçirməli idim. Bu yerdə U-19 liqasının oyunun olması yerinə düşdü. Çempionatın məğlub olmayan yeganə komandasının, turnir cədvəlində 2-ci pillədə yer alan “Qəbələ”nin 19 yaşlıları orta sıralarda qərarlaşan “İnter”li həmyaşıdlarını qəbul edirdi. Hər nə qədər turnir cədvəlində meydan sahibləri üst pillələrdə qərarlaşsa da, qonaqlar bu görüşdə rəqibini bir baş üstələyirdi.
Qarşılaşmanı izləyənlər arasında “Qəbələ”nin futbol akademiyasının direktoru Halim Fıçıcı və müavini Nail Kərimov da var idi. Kərimovla söhbətdən aydın oldu ki, meydanda olanlar heç də U-19-un əsas heyət üzvləri deyilmiş. Əsas heyətin oyunçuları dünən əvəzedicilərin oyununda iştirak etdiyindən bu gün baş məşqçi Emin İmaməliyev onlara istirahət vermişdi. Amma meydanda olanlar da işinin öhdəsindən pis gəlmədilər və qarşılaşma sülhlə yekunlaşdı – 1:1.
Ən diqqətçəkən məqam isə qarşılaşmanın təbii ot örtüyünə malik meydançada keçirilməsi idi. Hansı ki, bəzi Premyer Liqa klubları bunu ancaq səfər matçlarında görə bilir.
Görüşün keçirildiyi köməkçi meydança əsas meydançanın 4-5 metrliyindədi. Məsafə qısa olsa da, əsas meydançada oynamaq üçün məşq edib, əziyyət çəkmək və buna layiq olmaq lazımdı. Hansı ki, az sonra əsas komandaların matçında meydana çıxan Tellur Mütəllibov, Ürfan Abbasov kimi futbolçular buna nail olub.
Əsas komandanın futbolçularının isə yolu dumanlı görünürdü. Matçın startına 1 saatdan az vaxt qalmış meydançanı qatı duman öz cənginə almışdı. Getdikcə qatılaşan duman bir az da davam etsəydi, görüşün təxirə salınmasına səbəb olacaqdı. Xoşbəxtlikdən bu, baş vermədi və görüş təyin olunduğu vaxtda – saat 15:00-da start götürdü.
Qarşılaşma, gözlənildiyi kimi, meydan sahiblərinin üstülüyü ilə başlasa da, onların erkən qol vurmaq istəyi elə istək olaraq da qaldı. Baş məşqçi Roman Qriqorçukun cəza səbəbindən tribunadan izlədiyi görüşdə komanda öz oyununu tapmaqdan çətinlik çəkirdi. Ümumiyyətlə, həm meydandakı futbolçular, həm də klubun rəsmilərinin üzərində çox böyük psixoloji təzyiq hiss olunurdu. Bu, xal itirmək qorxusu idi. Təbii ki, heç kim ilin-günün bu vaxtı autsayder sayılan AZAL-la ev görüşündə 3 xalı əldən vermək istəmirdi. Ona görə də hamıda bir tələskənlik var idi. Elə bu tələskinliyin nəticəsidi ki, “qırmızı-qaralar”ın futbolçuları sanki meydanda öz yerlərini tapmaqda çətinlik çəkirdi. İnamla müdafiə olunan “təyyarəçilər” isə öz məqamlarını gözləməkdə idi. Əks-hücumlara bel bağlayan komandada Elnur Süleymanov və Nuqzar Kviritiya fəallığı ilə seçilirdi. Görünür, elə baş məşqçi Tərlan Əhmədov da Süleymanovun sürətinə daha çox bel bağlayırdı. Məhz AZAL-ın qapısına vurulan künc zərbələri zamanı mərkəz hücumçusu Röyal Nəcəfov müdafiə xəttinə köməyə gedirdisə, onu məhz Elnur əvəzləyirdi.
Epizodların birində qonaqlar az qala əks-hücumda istəyinə nail olacaqdı. Amma son anda cinahda yerlə ötürməyə ayaq qoyan “Qəbələ”li müdafiəçilər bunun qarşısını aldılar. Meydanın “Qəbələ”yə aid hissəsində pressinqə əl atan AZAL futbolçuları bəzən rəqib komandada çaşqınlıq yaratmağa nail olur, onların hücuma başlamasına imkan vermirdi.
Filip Ozobiç, Nika Kvekveskiri, Rəşad Sadiqov və Cavid Hüseynov kimi ifaşılardan qurulmuş orta xətt hücumları çox vaxt sağ cinahdan qurmağa çalışırdı. Komandanın köhnə-yeni hücumçusu Subotiçin qayıdışından sonra onun bacarığına güvənən komanda məhz verilən tapşırığı tam yerinə yetirə bilmirdi. Belə ki, isveçrəli hücumçuya ünvanlanan bütün asmalar qeyri-dəqiq olurdu.
Fasilədən sonrakı ilk20-25 dəqiqədə də ssenari dəyişmədi – 64-cü dəqiqəyə kimi… Cinah asmasından sonra Subotiç çölə çıxan topu son anda komanda yoldaşı Zenyova ötürdü. Estoniyalı futbolçunun fərqlənməsinin qarşısını isə Omeqa Roberts kobudluqla aldı. Penalti və qırmızı vərəqə… Ağ nöqtəyə yaxınlaşan Ozobiç yerli publikanın çoxdan gözlədiyi qolu vurmağı bacardı.
Hesabda və oyunçu sayında geri düşən AZAL-ın müqaviməti azalmalı idi. Lakin gözlənilənin əksinə, qonaqlar itirməyə heç nəyin qalmadığını düşünərək irəli atılddı. Yenilgi ilə barışmaq istəməyən Tərlan Əhmədovun yetirmələri xalsız qalmaq istəmirdi. İnsaf naminə, onlar əslində, istəyinə çatmaq üzrə idi. Amma baş hakim İnqilab Məmmədovun "inqilabi qərar"ı onların arzusunu gözündə qoydu. Referi 74-cü dəqiqədə Rəşad Abdullayevin cərimə zərbəsindən asmasının qarşısını açıq əllə alan Subotiçin bu hərəkətinə penalti qərarı verməməklə daha bir qalmaqala səbəb oldu. Hamılıqla etiraz edən şüvəlanlı futbolçuların qışqır-bağırı da Məmmədovu fikrindən daşındırmadı.
Buna baxmayaraq, hücumlarını davam etdirən qonaqlar 2 dəqiqə sonra daha bir real qol şansını qaçırdı. Bu dəfə də Abdullayevin zərbəsini qarşısını Dimitri Bezatosnı kəsdi – amma qaydalar çərçivəsində.
Hamının matçın elə bu hesabla yekunlaşacağını gözlədiyi vaxtda “Qəbələ” 2-ci topu rəqib qapısından keçirdi. Məhəmməd Mirzəbəyovun cinah keçidindən sonra Ozobiç matçda 2-ci, mövsümdə isə 9-cu qolunu vurmaqla dublunu rəsmiləşdirdi.
İnqilab Məmmədovun final fiti həm də özünün və sədri Xaqani Məmmədovun tənqidlərinin start fiti sayılmalıdı. Qış fasiləsindən sonra oynanılan 10 matçın yarısında – 5-də ciddi, hətta nəticəyə təsir edən səhvlər qeydə alınıb. Bu görüşlərin 4-ü isə məhz “Qarabağ”la “Qəbələ”nin payına düşür. “Böyük”lərin davasında isə ayaq altda qalan uşaq rolunu autsayderlər – “Neftçi” və AZAL oynayıb.
ELMAR ABDULLA-ZADƏ, Bakı – Qəbələ – Bakı
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-22 08:34
Musa “Yurqorden” dəftərini bağladı?
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”