Premyer-liqa
Gözəl futbol ümidi ilə…
Dövrənin, bəlkə də mövsümün şah oyunu. Az son…
Dövrənin, bəlkə də mövsümün şah oyunu. Az sonra Qəbələdə çempionatın liderləri azarkeşlərə futbol zövqü yaşatmaq üçün meydana çıxacaqlar. Avrokuboklardakı ən uğurlu təmsilçilərimiz bu dəfə ölkənin ən güclüsünü müəyyən etmək üçün mübarizədə bir-birlərinə güc göstərəcəklər.
AFFA və PFL rəhbərliyi, hətta millinin baş məşqçisi Robert Prosineçkinin biganə qalmasına, yolunu əyalət şəhərindən salmamasına rəğmən, əsl futbolsevərlər üçün “Qəbələ” – “Qarabağ”dueli əsl derbidi. Əvvəlki oyunlarda başverənlər, mətbuatda, sosial şəbəkələrdə yazılanlar öz yerində, məhz turnir mövqeyi baxımından bu oyunun əhəmiyyətinə şübhə yoxdu.
Oyun haqda geniş danışmağa gərək yoxdu. Turnir cədvəlinə baxanda meydanda hansı mübarizənin gedəcəyini təxmin etmək olur. Yalnız “Qarabağ”ın qələbəsi bütün intriqanı azalda, hətta öldürə bilər, digər 2 nəticənin reallaşması halında isə qızıl medal savaşı sonadək davam edəcək. Xüsusilə “Qəbələ”nin qələbəsi rəqabəti ən üst səviyyəyə qaldıracaq.
Bu oyundan azarkeşlər zövq ala biləcəkmi? Hazırda ən vacib məsələ məhz budur. Hər 2 komanda – xüsusilə də son turlarda – əsasən hakim səhvləri ilə gündəmə gəlib: əleyhlərinə də qərarlar olub, amma daha çox “güzəşt”ə seviniblər. Bu səbəbdən oyunətrafı ajiotaj daha güclüdü.
Lakin bu gün hər iki komandanın öhdəsinə həm də futbolu azarkeşlərə yenidən sevdirmək, ölkə əhalisinin diqqətini cəlb etmək, onları tribunalara qaytarmaq üçün təmiz, gözəl futbol oynamaq düşür.Matçı Fariz Yusifovun idarə edəcək olması tərəfləri müəyyən mənada sakitləşdirib. Ölkənin ən təcrübəli referisi bəzən səhvlərəyol versə də, ədalətli oması ilə tanınır. Onun sifarişlə, qərəzlə oyun idarə etməsi demək olar, mümkünsüzdü. Bu səbəbdən güclü olanın qalib gəlməsi üçün heç bir əngəl yoxdu.
Təbii ki, səhvlər də olacaq. Ancaq qərəz axtarmaqdansa tərəflərin əsl futbol oynaması, azarkeşlər üçün şou göstərməsi əla olardı. Taktiki savaş, meydanın hər qarışıuğrunda mübarizə, gözəl oyun – hamınıngözlədiyi məhz budur. “Qəbələ” və “Qarabağ” elə futbol oynamalıdı ki, nəticədən asılı olmayaraq, final fiti səslənəndə bir-birinin əlini sıxa bilsinlər.
Artıq intriqalara, davalara, şikayətlərə son qoymaq, futbol oynamaq vaxtıdı. Mövsümün ən gözəl matçlarından biridi, hamının gözü bu matçdadı. Onsuz da nəticə böyük ölçüdə heç nəyi dəyişməyəcək. Hələ marafon bitmir, lap bitsə də, bütün klublarımızın əsas hədəfi olan avrokuboklara vəsiqə bu çütlüyün cibindədi. Azərbaycan analoqu olmayan ölkədi – burada çempionat iştirakçılarının tən yarısı beynəlxalq arenaya çıxır. Ona görə də böyük ölçüdə heç nə dəyişməyəcək.
Artıq matça saatlar qalıb. Ümid edirik, oyundan sonra hansısa hakim səhvini, xoşagəlməz hadisəni yox, gözəl oyunu, layiqli rəqabəti müzakirə edəcəyik. Üzbəüz dueldi – ən yaxşı olduğunuzu özünüz sübut edin!
CAVAD