Premyer-liqa
Qartopu atəşi altında…
Peşəkar Futbol Liqası bu dəfə də əyalətdə keçirilən t…
Peşəkar Futbol Liqası bu dəfə də əyalətdə keçirilən turun mərkəzi matçına jurnalistlərin səfərini təşkil etməyi unutmamışdı. Yüksək səviyyədə təşkil olunan səfərdə hamımızın arzusu elə yüksək səviyyədə bir oyun izləmək idi. Necə də olmasa hazırda Premyer Liqanın 2 ən güclü komandası bir-birinə qarşı savaşacaqdılar.
Amma başqa savaş da baş tutdu. Meydanda gedən amansız mübarizə öz yerində, azarkeşlər də oyuna zövq qata bildi. Demək olar ki, dolu tribunalarda tərəflər bir-birini didməyə hazır idi. Bu mənada meydan sahibləri daha hazırlıqlı idi. Onlar "Zirə" ilə zirvəyə!" İmza: "Qarabağ", “Qardan adam oldu, Xəqanidən adam olmadı” “Sifarişlər halqası, hakimlərin liqası” yazılmış pankartlarla silahlanmışdı.
Tərəfdarlar hətta bir-birini qartopuna tutmağı da unutmadı. Elə bu qarşılıqlı qartopu atışmalarından biri yerli azarkeşlər üçün heç də yaxşı sonluqla qurtarmadı. Maraqlıdı ki, qarşı tərəfə “atəş” açanlar çox olsa da, polislər və bir neçə mülki geyimli şəxs (çox güman ki, Polisə İctimai Dəstəkin üzvləri – PİD) 18-20 yaşlı gənci sanki böyük bir cinayət eləyibmiş kimi, sürüyərək, maşına qoyaraq apardılar. Tabe olmaq istəməyən gəncə hətta yolboyu bir iki zərbə də vuruldu…
Qəbələlilərin fərqli “Qarabağ”ı
13-cü turda tərəflər arasında Suraxanıda oynanılan məlum qalmaqallı matçdan sonra “Qarabağ” Qəbələyə fərqli ampluada yollanmışdı. Təxminən, 2 il əvvəl ağdamlılar Avroliqada İtaliya “İnter”i ilə oyunundan sonra hakimin səhvinin qurbanı olmasından sonra Qəbələ səfərində yerli fanatların dəstəyini hiss etmişdi. Qəbələli azarkeşlər “Qarabağdı bu millətin yarası, yaddan çıxmaz o hakimin anası” yazılmış pankartla rəqibinə dəstəyini əsirgəməmişdi. Birvaxtlar rəqibinin məğlubiyyətinə bais olan hakimi söyən azarkeşlər bu dəfə “Qarabağ”ı hakimlər və “Zirə” ilə əlbir olmaqda günahlandırırdı. Köhnə dostlar indi düşmənə çevrilib.
Ümumiyyətlə, indi dövran dəyişib. Artıq “Qarabağ”ın qarşısında daha güclü “Qəbələ” var idi. Əbəs yerə deyil ki, cari mövsümdə dağların qoynunda keçirilən hər iki görüşdə Qurban Qurbanovun yetirmələri rəqibinə qol vurmadan məğlub olur.
Bu görüş həm də də jurnalistlərin “savaş”ı idi. Yox səviyyəsində olan internetlə savaşı… İlk yarıda çox əziyyət çəksək də, problem ikinci hissədə həllini tapdı.
Turun qəhrəmanı Əsgərov
Meydandan kənarda nə qədər “atışmalar” olsa da, bu, futbolçulara sirayət etmədi. Təmkinlə öz növbəsini gözləyən komandalardan istəyinə çatan meydan sahibləri oldu. Sergey Zenyov hesabı açdı – 1:0. Amma baş hakim Fariz Yusifov bu fikirdə deyildi. Ədalət təmsilçisi az qala böyük qalmaqala səbəb olacaqdı. Belə ki, o, topu estoniyalı hücumçuya ötürən Filip Ozobiçin bunu top çöldə olarkən etdiyini bildirirək, qolu ləğv etdi. Amma laysman Azər Əsgərovun vaxtında müdaxiləsi həm Yuifovu, həm də rəhbəri Xaqani Məmmədovu “ip”dən aldı. Bu qol qeydə alınmasaydı və sonluq fərqli olsaydı, yəqin ki, indi bu yazının əvəzinə Valentin İvanov, Pyerluici Kollina və s. bu kimi mütəxəssislərin Fariz bəyin verdiyi qərarın nə dərəcədə doğru, səhv olduğu ilə bağlı şərhini oxuyacaqdınız. Amma yaxşı ki, hər şey müsbət sonluqla qurtardı və fit sahibi qartopu yağışı altında qərarını dəyişdi.
Bundan sonra qarşılıqlı hücumlar şəraitində keçən görüşdə növbəti qolu bir də 38 dəqiqə gözləmək lazım gəldi. Bu dəfə Nika Kvekveskirinin ötürməsindən sonra Ozobiç fərqləndi – 2:0. Bu, həm də xorvatiyalı yarımmüdafiəçinin cari mövsümdə 11-ci, “Qarabağ” qarşı isə 3-cü oyununda 3-cü qolu oldu.
İlk qolda azarkeşlər hakimin tərəddüdü zamanı meydanı qartopu atəşinə tutmuşdusa, növbəti dəfə bunu sevindiklərindən edirdi.
Ümidsiz çırpınış
Matçın qalan dəqiqələrində isə “Qarabağ”ın cəhdləri fayda vermədi. Müdafiəyə çəkilən rəqib arxa xəttdə etibarlı oyunu ilə seçilirdi. “Qırmızı-qaralar”ın heyətində yeganə nominal mərkəz müdafiəçisi olan Voyislav Stankoviçin oyununu xüsusi vurğulamaq lazımdı. Məcburiyyətdən onunla eyni mövqedə oynadılan Rəşad Sadiqov isə bəzi səhvləri ilə yadda qalsa belə, işinin öhdəsindən gələ bildi.
Sevindirici reallıq
Beləcə mövsümün oyunu olan matç meydan sahiblərinin qələbəsi ilə yekunlaşdı. Qarşılaşma həqiqətən də futbol ictimaiyyətinin gözlədiyi səviyyədə keçdi. Tərəflər sübut etdi ki, matçöncəsi mətbuatın və azarkeşlərin yaratdığı “parıltı” sabun köpüyü yox, reallıqdı.
ELMAR ABDULLA-ZADƏ, Bakı – Qəbələ – Bakı
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı