"Məqsədimiz avrokuboklara vəsiqə qazanmaqdı"

“Zirə”nin futbolçusu Təmkin Xəlilzadənin futbolinfo.az saytına müsahibəsi:

– "İnter"lə oyunda komandanın vurduğu qolda sənin zəhmətin oldu. Həmin epizod və ümumi görüş barədə nə düşünürsən?
– Çətin olacağını bilirdik, oyuna da yaxşı hazırlaşmışdıq. Məqsədimiz üç xal qazanmaq idi. Amma bir xal da pis nəticə deyil. Meydanda azlıqda qaldıqdan sonra məcbur qalıb müdafiədə oturduq. Şükürlər olsun ki, xal qazandıq.

– “Zirə” son turlarda uduzmayıb. Bu komandanın avrokuboklara ciddi yanaşmasından irəli gəlir, yoxsa bəxt də kömək olur?
– Xeyr, bəxt deməzdim. Hazırlaşırıq, üzərimizdə işləyirik. Özü də öz oyun sistemimiz var. İstəyirik ki, yaxşı nəticələr qazanaq, hər oyuna da rəqibin kimliyindən asılı olmayaraq maksimum nəticə üçün çıxırıq. Çempionat da gərginləşib və hər bir komanda qış fasiləsindən sonra çox güclənib. İşimiz də göz qabağındadı. Allah da əziyyətimizin mükafatını verirsə, demək ki, doğru yoldayıq.

– Meydanda azlıqda qalanda rəqibin ikinci qolu vuracağını düşünürdün?
– Beynimdən keçdi elə fikirlər. Amma on nəfərlə qalsaq da, müdafiə olunmağı bacardıq. Yaxşı müdafiə olunduq. Belə halla birinci dəfə üzləşmirik. “Kəpəz”lə oyunda da Sezar Meza Kolli qırmızı vərəqə almışdı, ancaq qolumuzu vurduq və ikinci yarı arxada oturduq, qalib gəldik.

– Hakim səhvləri davam edir. Yovan Krneta topu vurub uzaqlaşdırmaq istəyərkən top Anar Nəzirova getdi və Orxan Məmmədov bunu sərbəst zərbə kimi dəyərləndirdi…
– Açığı, bu qərar bizim özümüzü də təəccübləndirdi. Biz də həmin epizodda qaçdıq hakimin üstünə ki, “nə edirsən sən?” Çünki orada Krneta topu sürüşmə fəndi ilə uzaqlaşdırmaq istəyirdi. Yaxşı ki, yan xətt hakimi öz fikrini bildirdi və baş hakim ondan sonra qərarını dəyişdi. Bir az diqqətli olsalar, daha yaxşı olar. Ancaq yenə də hakimləri qınamıram. Çünki futbolçular çoxdu, hakimlər azdı. İnsandılar, səhv də olar. Sadəcə, etdikləri səhv nəticəyə təsir edəndə, istər-istəməz söz-söhbət olur. Yan xətt hakimi və baş hakim bir-birini 90 dəqiqə ərzində yaxşı sığorta etməlidi. Həmin epizodda da yaxşı ki, yan xətt hakimi müdaxilə etdi. Yoxsa 100 faizli qol epizodu yaranacaqdı.

– Qarşıdakı turda qışdan sonra uğurlu çıxışları ilə yaddaqalan “Sumqayıt” və “Neftçi” ilə qarşılaşacaqsınız. Sizi hansı nəticələr razı salacaq?
– Avroliqaya getmək üçün ən yaxın rəqiblərimizlə oynayacağıq. Hər ikisi altı xallıq oyundu. Qələbə qazanmağa çalışacağıq.

– Təmkin, bu dəqiqə “Zirə”nin oyunlarını daha çox fikirləşirsən, yoxsa millidən sənə dəvət gəlib-gəlməyəcəyini? Çünki mətbuatda milliyə dəvət olunacağın qeyd olunur…
– Əlbəttə ki, bu dəqiqə üçün “Zirə”nin oyunlarını düşünürəm. Bəli, millidən də dəvət gözləyirəm. Ancaq sırf bu dəqiqə “Zirə”nin oyunlarına fikrimi yönəltmişəm. Yiğmadan da təkli gələrsə, çox sevinəcəm. Qismət olsa, dəvət edərlər.

– Robert Prosineçkinin diqqətində olduğunu düşünürsən?
– Mətbuatda, Mahmud Qurbanovun bir müsahibəsini oxumuşdum və o, orada demişdi ki, Təmkin Xəlilzadə Prosineçkinin diqqətin mərkəzindədi. Belə bir şeyi oxumuşdum bir dəfə. Çağırsalar, özümü ən yaxşı tərəfdən göstərməyə çalışacağam.

– “Zirə” özünü klub olaraq avrokuboklara hazır sayırmı?
– Əlbəttə. Ötən il çox adam bizə inanmırdı. Hər şeyin bəxt sayəsində olduğunu bildirirdilər. Ancaq ikinci yeri qazandıq. Bu il də maksimum nəticə üçün çalışırıq. Əsas məqsədimiz avrokuboklara vəsiqə qazanmaqdı.

ELMAR ABDULLA-ZADƏ