Ölkə futbolu
İcraiyyə Komitəsinin yeni üzvü kim olacaq?
AFFA-nın növbəti Hesabat Konfransı və dərhal sonra keç…
AFFA-nın növbəti Hesabat Konfransı və dərhal sonra keçiriləcək İcraiyyə Komitəsinin iclasına sayılı günlər qaldı. Martın 16-da “Hilton” otelində baş tutacaq hər iki tədbir mühüm əhəmiyyət kəsb edir.
Konfransın gündəliyi bəllidi. Və qeyri-adi bir şey gözlənilmir. Hesabatlar, hesabatları müşaiyət edəcək alqışlar, alqışlar və s. Büdcə təsdiqlənəcək, hər hansı vakant vəzifəyə seçkilər reallaşacaq, bəzi AFFA üzvlərinin təkliflərinin qəbul olunacaq.
Konfransda İcraiyyə Komitəsinə mövcud olan 1 vakant yerə seçki də keçiriləcək. Adətən AFFA-da hər hansı posta namizəd vakant yer qədər olur. Yəni, hansısa rəqabət, seçki gözləmək mümkün deyil. Sadəcə, konfransda bəlli olacaq ki, həmin yerə hansısa namizəd var və həmin adam da təyin ediləcək/seçiləcək.
İcraiyyə Komitəsində boş qalan yer rəhmətlik Mirkamil Rəhimova məxsus idi. Uşaq Futbol Federasiyasının namizədi dünyasını dəyişdikdən sonra onun əvəzinə kimisə seçmək lazımdı. Nizamnaməyə görə, bu yerə Sahə Futbol Federasiyalarından birinin nümayəndəsi seçilməlidi. Yəqin ki, belə də olacaq.
Eyni zamanda İcraiyyə Komitəsinin tərkibində Təhsil Nazirliyindən və AGİN-dən bir nəfər təmsil olunur. Təhsil Nazirliyindən Firudin Qurbanov hazırda komitədədi, Rəhimovu AGİN-dən kimin əvəz edəcəyi isə bilinmir. Ola bilsin, Elmar Məmmədyarovun simasında Xarici İşlər Nazirliyi komitədə təmsil olunduqdan sonra AGİN-ə etimad göstərilməsin.
Bəs, namizəd kimdi? Bu sualı AFFA-nın mətbuat xidmətinin rəhbəri Mikayıl Nərimanoğluya ünvanladıq. O, hələlik heç bir müraciət olunmadığını,namizədlərin dəqiqləşmədiyini dedi. Bu proses yəqin ki, martın 1-dək yekunlaşacaq. Çünki namizədlərin qeydə alınmasının son tarixi Konfransa 15 gün qalmışadəkdi.
Nərimanoğlundan istədiyimiz cavabı ala bilməsək də, başqa mənbələrdən mümkün namizədlə bağlı müəyyən məlumatlar topladıq. Qeyri-adi bir şey baş verməsə, İcraiyyə Komitəsinin yeni üzvü SOCAR-dan olacaq. Həmin şəxsin üzvlüklə bağlı tələblərə cavab verib-verməyəcəyini bilmirik – yəqin ki, hansısa üsula yoluna qoyular – , lakin namizəd, daha sonra üzv olacağı dəqiqdi.
Bu yerə ilkin seçim hüququ Uşaq Futbol Federasiyasındadı. AFFA-nın birinci vitse-prezidenti olmaqla yanaşı, bu quruma da rəhbər seçilməyi özünə rəva görən Rauf Əliyev namizəd müəyyənləşdirməlidi. Lakin ona qeyri-rəsmi deyilib ki, seçim hüququ onda olmayacaq. Bu qurum indiyədək nə yığıncaq keçirib, nə namizəd müəyyənləşdirib. Vaxtın bitməsinə isə 6 gün qalıb.
Ola bilər ki, müəyyən rotasiyalara əl atısın, məsələn, Rauf bəy özü Sahə Futbol Federasiyalarından namizəd olsun, əvəzində seçildiyi Peşəkar Futbol Liqası xəttinin kvotası başqasının sayəsində doldurulsun. Əliyevin belə bir təcrübəsi var: o, AZAL-dan namizəd kimi irəli sürülüb, əvvəllər isə “Neftçi”nin namizədi idi. Lakin İcraiyyə Komitəsinin üzvləri 4 ildən biri seçildiyindən, indi bu, mümkün deyil.
“Neftçi”nin Müşahidə Şurasının üzvü olan Zaur Qəhrəmanovun da İcraiyyə Komitəsinə seçilmək istədiyi deyilir. Bakı klubundan komitəyə Elşad Nəsirov namizəd göstərildiyi üçün indi Zaur bəyin ora düşməsi üçün başqa variantlar fikirləşilməlidi. Bu səbəbdən o, yəqin ki, növbəti seçkini gözləməli olacaq.
FƏRİD
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Ölkə futbolu2024-04-19 21:00
“Sumqayıt” avrokubok iddiasını davam etdirir
- Ölkə futbolu2024-04-19 08:52
Yüksək əmsal “Qarabağ”a əlavə üstünlük verir
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi